Read KO E TOH TAPU KATOA TONGA Loma 4 Bible Online

Loma 4 - KO E TOH TAPU KATOA TONGA bible

Loma 4

¹PEA ko ‘emau fakaka‘anga ai koā ‘a e Lao, he fai‘aki ‘a e tui? Molekemama‘o! kaekehe, ‘oku mau poupou ‘a e Lao. Pea kapau ko ia, pea ko e hā ‘etau lea ‘ia ‘Epalahame, ko hotau ‘ulumotu‘a fakasino? Ko e hā ha me‘a kuo lava ‘e ia?

²Seuke, kapau na‘e fakatonuhia ‘a ‘Epalahame mei he‘ene ngāue, tā ‘oku ‘i ai ha‘ane me‘a ke pōlepole ai. Ka tala‘ehai ‘oku ‘i ai ha‘ane me‘a pehē ke fai ki he ‘Otua:

³he ko e hā ‘a e lau ‘a e Tohitapu? ‘a ‘eni, pea na‘e tui ‘a ‘Epalahame ki he ‘Otua, pea na‘e lau ia ma‘ane mā‘oni‘oni.

⁴Pea ko eni, kapau ko ha toko taha ‘oku ngāue, ‘oku ‘ikai lau ‘a e totongi ‘oku ne ma‘u ko e me‘a ‘ofa, ka ko e mo‘ua.

⁵Ka ka ‘ilonga ha taha ‘oku ‘ikai ngāue, ka ‘oku ne tui falala kiate ia ‘oku ne fakatonuhia ‘a e faka‘otuamate, ‘oku lau ‘a e tui ‘a‘ana ma‘ane mā‘oni‘oni.

⁶Hangē foki ko e fakamālie ‘e Tēvita ‘a e tangata ‘oku lau mā‘oni‘oni ki ai ‘e he ‘Otua, ‘o ta‘ekau ha‘ane ngāue, he‘ene pehē.

⁷Monū‘ia ā ka ko e kakai kuo fakamolemole ‘enau ngaahi talangata‘a, Pea ‘u‘ufi ‘enau ngaahi angahala.

⁸Monū‘ia ā ka ko e tangata ‘a ia ‘e ‘ikai si‘i lau ki ai ‘e he ‘Eiki ha hia.

⁹Pea ko eni, ‘oku lau ‘a e fakamālie ni ki he kamu pē, pe ki he ta‘ekamu foki? he ‘oku tau pehē, ko ‘Epalahame ia na‘e lau ‘ene tui ma‘ane mā‘oni‘oni.

¹⁰Pea na‘e fakafēfē hono lau kiate ia? He‘ene kamu, pe he‘ene ta‘ekamu? Na‘e ‘ikai ‘i he‘ene kamu, ka ‘i he‘ene ta‘ekamu.

¹¹Pea na‘a ne ma‘u ‘a e faka‘ilonga ko ia ko e kamu mo‘o sila ‘o e mā‘oni‘oni mei he tui, ‘a ia na‘a ne ma‘u lolotonga ‘ene ta‘ekamu: koe‘uhi ke ne hoko ko e tamai ‘anautolu kotoa pē ‘oku tui ta‘ekamu, ke lau mā‘oni‘oni kiate kinautolu.

¹²Pea ko e tamai foki ‘a e ta‘ekamu, ‘a kinautolu ‘oku ‘ikai te nau ngata ‘i he tupu ko e kamu, ka ‘oku nau topuva‘e taha foki mo e tui ‘a ‘etau Tamai ko ‘Epalahame, ‘a e tui na‘a ne ma‘u lolotonga ‘ene ta‘ekamu.

¹³He tala‘ehai na‘e fou fakalao mai ‘a e tala‘ofa kia ‘Epalahame pe ko hono hako, ‘a e pehē ko e ‘ea ia ‘e ‘o‘ona ‘a māmani: ka na‘e fou mai ‘i he mā‘oni‘oni mei he tui.

¹⁴He kapau ‘oku ‘ea ‘a e kakai ‘oku tu‘unga ki he Lao, tā ‘oku ma‘ama‘a ‘a e tui, pea ka‘anga ‘a e tala‘ofa:

¹⁵he ko e me‘a ‘oku fakatupu ‘e he Lao ko e houhau: ka ka ‘ikai leva ha lao, pea ‘ikai ai foki ha talangata‘a.

¹⁶Ko hono ‘uhinga ‘eni ‘o ‘ene tu‘unga ki he tui, koe‘uhi ke fou mai ko e me‘a‘ofa; koe‘uhi ke pau ‘a e tala‘ofa ki he hako kotoa, ‘o ‘ikai ki he hako pē ‘oku tu‘unga ki he Lao, ka ki he hako foki ‘oku tu‘unga ki he tui faka-‘Epalahame; ‘a ‘Epalahame ‘a ia ko e Tamai ‘atautolu kotoa ‘i he ‘ao ‘a e ‘Otua na‘a ne tui ki ai;

¹⁷(‘o hangē ko ia kuo tohi, Kuo u tu‘utu‘uni koā ko e tupu‘anga ‘o ha fuifui pule‘anga ‘a ‘Ene ‘Afio ‘oku ne fakamo‘ui hake ‘a e pekia, mo ne lau ‘a e ngaahi me‘a ‘oku ‘ikai, ‘o hangē ‘oku nau ‘i ai.

¹⁸‘A ‘Epalahame na‘a ne tui, ‘o piki ki he‘ene ‘amanaki, neongo kuo ‘ikai ‘a e ‘amanakinga; koe‘uhi ke ne hoko ko e tupu‘anga ‘o ha fuifui pule‘anga; ‘o hangē ko e me‘a kuo folofola‘aki mai, ‘E pehē ho hako.

¹⁹Pea ‘i he ‘ikai vaivai ‘ene tui, na‘a ne tokanga‘i leva hono sino ‘o‘ona, ‘ene mate, he ‘oku ne ofi ke teau ta‘u; kae‘uma‘ā ‘a e mate ‘a e manava ‘o Sela.

²⁰Ka na‘e ‘ikai te ne tāla‘a ki he tala‘ofa ‘a e ‘Otua ‘i ha‘ane ta‘etui; ka na‘e hoko ‘o kaukaua ‘ene tui, mo ne fakahīkihiki‘i ‘a e ‘Otua.

²¹Mo mātu‘aki falala, ko e me‘a kuo ne tala‘ofa ki ai ‘oku ne malava foki ke fai.

²²Ko hono ‘uhinga ia foki na‘e lau ia ma‘ane mā‘oni‘oni.

²³Ka tala‘ehai na‘e tu‘u ‘i he Tohi ‘o pehē, “Na‘e lau ma‘ana,” koe‘uhi ko ia pē.

²⁴Ka koe‘uhi ko kitaua foki: ‘io, ‘e lau ma‘ataua, ‘a kitaua ‘oku ta tui kiate ia na‘a ne fokotu‘u ‘a hotau ‘Eiki ko Sīsū mei he pekia —

²⁵‘a ‘Ene ‘Afio na‘e tukuange ke pekia koe‘uhi ko ‘etau ngaahi faihala, pea fokotu‘u koe‘uhi ko hotau fakatonuhia.