Read KO E TOH TAPU KATOA TONGA Loma 5 Bible Online

Loma 5 - KO E TOH TAPU KATOA TONGA bible

Loma 5

¹KO ia, tau tuku ke fakatonuhia‘i kitautolu ‘i he tui, ka tau ma‘u[5] melino ai mo e ‘Otua ‘i hotau ‘Eiki ko Sīsū Kalaisi;

²‘a ia foki kuo fou mei ai hotau tataki ‘i he tui ki he kelesi ko eni ‘oku tau matu‘u ai: pea ke tau vīkiviki[6] ‘i he ‘amanaki kau ‘i he lāngilangi ‘o e ‘Otua.

³Pea ‘ikai‘ia ko ia pē, ka ke tau vīkiviki[7] foki ‘i he‘etau ngaahi mamahi; he‘etau ‘ilo ‘oku tupu mei he mamahi ‘a e kātaki,

⁴pea mei he kātaki, ‘a e lava ‘o e ‘ahi‘ahi; pea mei he lava ‘o e ‘ahi‘ahi ‘a e fakatu‘amelie.

⁵Pea tala‘ehai ko e me‘a fakamā ‘a e fakatu‘a ko ia; koe‘uhi kuo taumalingi ‘a e ‘ofa ‘a e ‘Otua ‘i hotau loto ‘i he Laumālie Mā‘oni‘oni, ‘a ia ne foekina kiate kitautolu.

⁶‘Ē, kapau ā ne pekia ‘a Kalaisi ma‘a e faka‘otuamate, ‘i he hoko ‘a e kuonga totonu, neongo na‘e kei vaivai kitautolu —

⁷Seuke, neongo ko ha faitotonu, hei‘ilo pe ‘e ai ha taha te ne fie mate ma‘ana: ‘io, kapau ko ha tangata lelei, tokaange nai ha taha te ne fakato‘oto‘a nai ‘o mate ma‘ana.

⁸Ka ko e ‘Otua ‘oku ne fakahā ‘a e mo‘oni ‘o ‘ene ‘ofa ‘a‘ana kiate kitautolu ‘i he pekia ‘a Kalaisi ma‘atautolu, lolotonga ‘oku tau kei angahala. —

⁹Pea kapau ko ia, pea ka kuo tau ma‘u ‘eni ‘a e fakatonuhia ‘i hono ta‘ata‘a,[8] pea huanoa hotau fakamo‘ui ka fai ‘iate ia mei he houhau.

¹⁰He kapau na‘e fakalelei ‘a e ‘Otua kiate kitautolu ‘i he pekia ‘a hono ‘Alo, lolotonga ‘ene fili ‘aki kitautolu, pea huanoa hotau fakamo‘ui ka fai ‘i he mo‘ui ‘a‘ana, ka kuo ne hōifua mai.

¹¹Pea ‘ikai‘ia ko ia, ka ‘oku vīkiviki foki ‘i he ‘Otua ‘a kitautolu ‘eni, ko e me‘a ‘i hotau ‘Eiki ko Sīsū Kalaisi, ‘a e toko taha ko ia kuo fou mei ai ‘eni ‘etau ma‘u fakalelei.

¹²Ko ia, ko e hoko ‘a e fakamo‘ui na‘e tatau mo e hoko ‘a e angahala ki māmani, ‘i he tangata pē taha; mo e hoko ‘a e mate ‘i he angahala; mo ‘ene a‘usia pehē ‘a e kakai kotoa pē ‘e he mate, koe‘uhi ne angahala kotoa pē. —

¹³He na‘e ‘i māmani ‘a e angahala ‘i mu‘a, ‘o a‘u atu ki he Lao; ka tala‘ehai ‘oku lau angahala ‘i he ‘ikai ha lao.

¹⁴Ka neongo ia, ka na‘e Hau pē ‘a Mate meia ‘Ātama ‘o a‘u kia Mōsese; ‘o ne pule foki kiate kinautolu kuo te‘eki fai ha angahala, ‘o fa‘ahinga mo e talangata‘a ‘a ‘Ātama ‘a ia ko e taipe ‘o e ‘Ātama ka hoko mai.

¹⁵Ka ‘oku ‘ikai ke fai tatau ‘aupito ‘a e ‘omi kelesi mo e faihala. He kapau na‘e mate ‘a e tokolahi ‘i he fai hala ‘a e toko taha, huanoa ‘ene a‘usia ‘a e tokolahi, ‘o fu‘u hulu atu, ‘e he ‘ofa ‘a e ‘Otua, mo ‘ene me‘a‘ofa, ko e me‘a ‘i he ‘ofa ‘a e tangata ‘e toko taha ko Sīsū Kalaisi.

¹⁶Pea na‘e ‘ikai tatau ‘a e me‘a na‘e foaki pea mo e me‘a na‘e hoko ‘i he toko taha na‘e angahala. He ko e fakamaau ia na‘e langa‘i ‘e he toko taha, pea iku ki he fakahalaia: ka ko e ‘omi kelesi na‘e langa‘i ‘e he ngaahi faihala lahi, pea iku ki he fakatonuhia.

¹⁷He kapau na‘e Hau ‘a Mate ‘i he faihala ‘a e toko taha, pea founga ‘ene Hau ‘i he toko taha ko ia; huanoa ‘enau Hau ‘i he mo‘ui, ‘e kinautolu ‘oku ma‘u hono lahi faufau ‘o e kelesi, mo e me‘a‘ofa ko e fakatonuhia, ko e fou ‘enau Hau ‘i he toko taha ko Sīsū Kalaisi.

¹⁸‘Āua; ko ia, hangē na‘e fou mai ha me‘a mei ha fai faihala, ‘a ia na‘e a‘u ki he kakai kotoa pē mo‘o fakahalaia: pehē foki, na‘e fou mai ha me‘a mei ha fo‘i Fai totonu ‘a ia na‘e a‘u ki he kakai kotoa pē mo‘o fakatonuhia ke nau mo‘ui.

¹⁹He hangē na‘e fakahalaia‘i ‘a e tokolahi, ko e me‘a ‘i he talangata‘a ‘a e tangata ‘e toko taha: pehē foki, ‘e fakatonuhia‘i ‘a e tokolahi, ko e me‘a ‘i he talangofua ‘a e toko taha.

²⁰Pea ko eni, na‘e hū ange ‘a e Lao, koe‘uhi ke lahi ‘a e faihala: ka ko ‘ene lahi leva ‘a e angahala, pea hulu atu noa pē ‘a e kelesi.

²¹Koe‘uhi ke hangē na‘e Hau ‘a Angahala ‘i he mate, pehē foki ke Hau ‘a Kelesi mei he fakatonuhia, ‘o iku ki he mo‘ui ta‘engata, ‘ia Sīsū Kalaisi ko hotau ‘Eiki.