Read KO E TOH TAPU KATOA TONGA Loma 7 Bible Online

Loma 7 - KO E TOH TAPU KATOA TONGA bible

Loma 7

¹HE ‘oku ‘ikai te mou ‘ilo, kāinga — seuke, ‘oku ou lea ki ha kakai ‘oku maheni mo e lao — ‘oku ‘ikai te mou ‘ilo koā, ‘oku pule ‘a e lao ki he tangata lolotonga ‘ene mo‘ui pē?

²He ko eni, ko e fefine alafia ‘oku ne ha‘isia mei he lao ki hono husepāniti ‘oku mo‘ui; ka ‘o kapau kuo pekia ‘a e husepāniti, kuo ne ‘ata‘atā ai mei he lao ‘o e husepāniti.

³Pea ko ia, lolotonga ‘oku mo‘ui hono husepāniti, ‘e lau ia ko e fe‘auaki, ‘o kapau te ne nonofo mo ha tangata kehe: ka ‘o kapau kuo pekia hono husepāniti, ‘oku ne tau‘atāina mei he lao ko ia; ko ia ‘oku ‘ikai ko e fe‘auaki ia, he‘ene nonofo mo ha tangata kehe.

⁴Ko ia, si‘oku kāinga, na‘e ‘ai ke mate kimoutolu foki kia Lao ‘i he sino ‘o Kalaisi; koe‘uhi ke mou nonofo mo ha taha kehe, ‘io, mo e Toko Taha ko ia na‘e fokotu‘u mei he pekia; koe‘uhi ke tau fakatupu fua ma‘a e ‘Otua.

⁵He lolotonga na‘a tau ‘i hotau anga kakano, ko e ngaahi o‘i ke angahala, ‘a ia na‘e langa‘i ‘e he Lao, na‘e ngāngāue ia ‘i hotau ngaahi kupu, ke fakatupu fua kia Mate.

⁶Ka ‘i he tu‘u ko eni, kuo faka‘ata‘atā kitautolu meia Lao, he‘etau mate ki he me‘a ‘a ia na‘e ma‘u puke ai kitautolu; ko ia, ‘oku tau ngāue ‘eni ‘i ha anga fo‘ou ko ha laumālie, ‘o ‘ikai ‘i he anga motu‘a, ko ha tohi.

⁷Pea fēfē ai? te ta pehē, ko e Lao ko e koto angahala? Molekemama‘o! Ka neongo ia, ka na‘e ‘ikai te u lave‘i ‘a e angahala, ka ne ta‘e‘oua pē ‘a e Lao. ‘O pehē; ne ‘ikai te u ongona ‘a e mānumanu, ka ne ta‘e‘oua ‘a e pehē mai ‘e he Lao, ‘Oua na‘a ke mānumanu.

⁸Ka ka tu‘unganaki ‘aki ia ‘e Angahala, ‘o ne ngāue‘aki ‘a e fekau ke fakatupu ‘iate au ‘a e fa‘ahinga mānumanu kehekehe. He ka mama‘o ‘a e lao, ‘oku mate pē ‘a Angahala.

⁹Pea na‘e ai ha taimi na‘a te mo‘ui pē kita, ‘o mama‘o ‘a e lao: ka ‘i he a‘u mai ‘a e fekau, ne ake mo‘ui ‘a Angahala, ka te mate kita.

¹⁰Pea u ‘ilo ‘a e fekau na‘e tu‘utu‘uni ko e mo‘ui‘anga, tā ko e mate‘anga ia.

¹¹Ko hono ‘uhinga, ko Angahala na‘a ne tu‘unganaki ‘aki ia, ‘o ne ngāue‘aki ‘a e fekau ke kākaa‘i au, mo ne fai‘aki ia hoku tāmate‘i.

¹²Ko ia, ko e me‘a ki he Lao, ‘oku mā‘oni‘oni pē ia, pea mā‘oni‘oni mo totonu mo lelei ‘a e fekau na.

¹³‘Io! Pea tā ko e me‘a lelei na na‘e hoko kiate au ko e mate, ‘ō? Molekemama‘o! Ka ko angahala ia na‘e pehē; koe‘uhi pē ke hā ai ko e angahala, ‘i he‘ene fakatupu mate kiate au ‘aki ‘a e me‘a lelei na; ‘io, koe‘uhi ke hoko ‘a e Angahala ko e toki tama fai kovi ‘i he ngāue ‘a e fekau.

¹⁴He ‘oku tau lāu‘ilo ‘oku fakalaumālie ‘a e Lao; ka ko kita ko e kakano ‘atā, pea kuo fakatau kia Angahala.

¹⁵He tala‘ehai ‘oku ou ‘ilo ‘a e me‘a ‘oku ou ngāue ki ai: he ‘oku ‘ikai ko e me‘a ‘oku ou fie fai ‘a ia ‘oku ou fai; ka ko e me‘a ‘oku ou fehi‘a ki ai, ko ia ‘oku ou fai.

¹⁶Pea kapau ko e me‘a ‘oku ‘ikai te u fie fai ‘a ia ‘oku ou fai, tā ‘oku ou fakamo‘oni ai ki he Lao ‘oku lelei ia.

¹⁷Pea ‘i he tu‘u ko ia, tala‘ehai ‘oku kei ko kita ia ‘oku ngāue ki he me‘a ko ia, ka ko angahala ‘oku fale ‘iate au.

¹⁸Seuke, kuo u ‘ilo, ko e me‘a kiate au, ‘a ia ko e pehē ki hoku kakano, ‘oku ‘ikai ke fale ai ha lelei ‘e taha: he ‘oku tolotui mai ‘a e fie fai lelei, ka ko hono fai, ‘oku ‘ikai.

¹⁹‘Io, ko e lelei ‘oku ou fie fai ‘oku ‘ikai te u fai; kaekehe, ko e kovi, ‘a ia ‘oku ‘ikai te u fie fai, ko ia ia ‘oku ou feia.

²⁰Pea kapau ko e me‘a ‘oku ‘ikai te u fie fai, ko ia ia ‘oku ou fai, tala‘ehai ‘oku kei ko kita ia ‘oku ngāue ki he me‘a ko ia, ka ko Angahala ‘oku fale ‘iate au.

²¹Pea ko ia, ‘oku ou ongona, lolotonga ‘oku te tokanga kita ki he Lao ke te fai lelei, tā ‘oku tolotui mai kia kita ‘a e fai kovi.

²²Seuke, ‘oku te kaungamālie‘ia mo e lao ‘a e ‘Otua, ‘a hoto tangata-‘i-loto.

²³Ka ‘oku hā kiate au ha lao kehe ‘oku nofo ‘i hoku ngaahi kupu, ‘o fai tau mo e lao ‘o hoku loto, mo taki pōpula au ki he lao angahala‘ia ‘oku nofo ‘i hoku ngaahi kupu.

²⁴‘Oiauē! si‘i toki mala‘ia kita! ko hai tū te ne hamusi au mei he sino ‘oku mei ai ‘a e mate ni?

²⁵Fakafeta‘i ki he ‘Otua, ‘a ia kuo ne fai ‘ia Sīsū Kalaisi ko hotau ‘Eiki! Pea tā ko au, fakaekita, ‘oku te ngāue ki he lao ‘a e ‘Otua ‘i hoku loto, ka ko e lao ‘a angahala ‘i hoku kakano.