Read KO E TOH TAPU KATOA TONGA Loma 8 Bible Online

Loma 8 - KO E TOH TAPU KATOA TONGA bible

Loma 8

¹KO ia, ‘i he tu‘u ko eni, ‘oku ‘ikai ha momo‘i fakahalaia ‘o e kakai ‘oku ‘ia Kalaisi Sīsū.

²He ko e lao ‘a e Laumālie ko e Mo‘ui‘anga, kuo ne fakatau‘atāina koe[9] mei he lao ‘a angahala mo mate, ‘i ho‘o tu‘u ‘ia Kalaisi Sīsū.

³He ko e me‘a na‘e ‘ikai lava ‘e he Lao, ko ‘ene vaivai koe‘uhi ko e kakano, ne lava ‘e he ‘Otua; he‘ene fekau mai hono ‘Alo ‘o‘ona ‘i he tatau ‘o e kakano angahala‘ia, pea mo‘o feilaulau he angahala, ‘o ne hifo ai ‘a angahala mei he‘ene pule ‘i he kakano:

⁴koe‘uhi ke fakakakato ‘a e me‘a ‘oku ‘eke ‘e he Lao ‘iate kitautolu, ‘a kitautolu ‘oku ‘ikai ke tau angimui ki he kakano, ka ki he Laumālie.

⁵He ko kinautolu ‘oku nau anga fakakakano, ‘oku nau toka ki he ngaahi me‘a ‘a e kakano; ka ko kinautolu ‘oku anga fakalaumālie, ‘oku nau toka he ngaahi me‘a ‘a e Laumālie.

⁶Pea ko e feinga ‘a e kakano ko e koto mate ia: ka ko e feinga ‘a e laumālie ko e koto mo‘ui mo melino.

⁷Koe‘uhi ko e feinga ‘a e kakano ko e koto fakafili ki he ‘Otua: he ‘oku ‘ikai te ne fakavaivai ia ki he lao ‘a e ‘Otua; seuke, ‘oku ‘ikai ‘aupito te ne lava.

⁸Pea ko kinautolu ‘oku tu‘u ‘i he kakano ‘oku ‘ikai te nau lava ke fakahōifua ‘a e ‘Otua.

⁹Ka ko kimoutolu, ‘oku ‘ikai te mou tu‘u ‘i he kakano, ka ‘i he Laumālie; ‘o kapau ā ‘oku fale ‘iate kimoutolu ‘a e Laumālie ‘o e ‘Otua. Ka ‘o kapau ‘oku ai ha taha ‘oku ‘ikai te ne ma‘u ‘a e Laumālie ‘o Kalaisi, ‘oku ‘ikai ‘o‘ona ‘a e toko taha ko ia.

¹⁰Pea ko eni, kapau ‘oku ‘iate kimoutolu ‘a Kalaisi, tā kuo mate ‘a e sino koe‘uhi ko e angahala; ka ko e koto mo‘ui ‘a e laumālie koe‘uhi ko e mā‘oni‘oni.[10]

¹¹‘Io, kapau ‘oku fale ‘iate kimoutolu ‘a e Laumālie ‘o ia na‘a ne fokotu‘u ‘a Sīsū mei he pekia, pea tā ko ia na‘a ne fokotu‘u ‘a Kalaisi mei he pekia, te ne ‘ai ke mo‘ui ‘a e koto mate na ko homou sino, koe‘uhi ko hono Laumālie ‘oku nofo‘ia kimoutolu.

¹²Pea kapau ko ia, kāinga, tā ko e kakai mo‘ua kitaua; ka tala‘ehai ko e mo‘ua kia Kakano, ke ta mo‘ui fai ki he kakano.

¹³He kapau te mou mo‘ui fai ki he kakano, ko hono ālonga pē ‘o ha‘amou mate: ka ‘o kapau te mou fai‘aki ‘a e Laumālie, ‘o ‘ai ke mate ‘a e feinga kovi ‘a e sino, te mou mo‘ui.

¹⁴He ‘ilonga kinautolu ‘oku tākiekina ‘e he Laumālie ‘o e ‘Otua, ko kinautolu ia ‘a e ngaahi foha ‘o e ‘Otua.

¹⁵He tala‘ehai na‘a mou ma‘u ha Laumālie anga pōpula, ke mou foki ai ki he manavahē: ka na‘a mou ma‘u ‘a e Laumālie anga-faka-tama-ohi; pea ‘i he‘etau ‘iate ia ‘oku tau kalanga, ‘Apā Tamai.

¹⁶Ko e Laumālie, ‘oku ne kaungā fakamo‘oni ‘e ia mo hotau laumālie, ‘o pehē, ko e fānau ‘a e ‘Otua ‘a kitautolu.

¹⁷Pea kapau ko e fānau, tā ko e ngaahi ‘ea foki, ko e ngaahi ‘ea ‘o e ‘Otua, pea kaungā ‘ea mo Kalaisi; ‘o kapau ā ‘oku tau kaungā mamahi mo ia, ka tau kaungā hākeaki‘i foki mo ia.

¹⁸Seuke, ‘oku te pehē, ko e ngaahi mamahi ‘o e taimi ni ‘oku ‘ikai kākunga ke tatau mo e lāngilangi ‘oku ene ke fakae‘a mai, ‘o ‘ai kiate kitautolu.

¹⁹‘Io, ko e ‘amanaki tu‘u ‘a Natula ‘oku ne nofo‘aki tali ki he fakae‘a ‘o e ngaahi foha ‘o e ‘Otua.

²⁰He na‘e fakamo‘ulaloa ‘a Natula ki he muna: ka tala‘ehai ko hono loto, ka koe‘uhi pē ko ia na‘a ne fai ‘a e fakamo‘ulaloa.

²¹Ka na‘e tuku ke ne ‘amanaki pē, ‘o pehē, na‘a mo ia, ‘a Natula, ‘e faifai pea faka‘ata‘atā mei he‘ene pōpula ki he ‘auha, kae fakahoko ia ki he tau‘atāina fakalangi ‘a e fānau ‘a e ‘Otua.

²²Seuke, ‘oku tau lāu‘ilo pē, ‘oku fai ‘o a‘u ki he taimi ni ‘a e fetō‘eaki mo langā ‘a Natula kātoa.

²³Pea tala‘ehai ko ia pē, ka na‘a mo kitaua, neongo ‘oku ta ma‘u ‘a e fua tapu ‘o e Laumālie, ka ‘oku ta to‘e loto kitaua foki, he talitali ki he fakakakato ‘o e ohi,[11] ‘a ia ko e huhu‘i ‘o hotau sino.

²⁴He na‘e fakamo‘ui ‘amanaki pē kitautolu: ka ‘oka kuo hā ‘ete ‘amanaki, ‘oku ‘ikai kei ko e ‘amanaki ia: he ka ko ha me‘a ‘oku sio ki ai ha taha, pea fēfē ai ha‘ane kei ‘amanaki ki ai?

²⁵Ka ‘o kapau ko ha me‘a ‘oku ‘ikai te tau sio ki ai, ‘a ia ‘oku tau ‘amanekina, tā ‘oku tau talitali ki ai ‘aki ‘a e kātaki.

²⁶Pehē foki, ko e Laumālie ‘oku ne tokoni‘i ‘eta vaivai: ‘o pehē, ‘oku ‘ikai te ta ‘ilo pe ko e hā te ta lotua ke hoa mo ‘eta faingata‘a: ka ko e Laumālie ‘oku ne hufekina ‘e ia ‘a kitaua, ‘aki ‘a e ngaahi to‘e ‘oku ‘ikai fa‘a fakamatala.

²⁷Ka ko ia ‘oku ne hakule ‘o e loto, ‘oku ne mea‘i ‘a e me‘a ‘oku feinga ki ai ‘a e Laumālie; koe‘uhi ‘oku fai ‘i he funga ‘o e finangalo ‘o e ‘Otua ‘ene hufekina ‘a e kakai lotu.

²⁸Kae‘uma‘ā ‘oku tau ‘ilo, ‘ilonga ‘a e kakai ‘oku ‘ofa ki he ‘Otua, ‘oku fengāue‘aki ‘a e me‘a kotoa pē ma‘anau lelei;[12] he ko e kakai kinautolu kuo ului ‘o fakatatau ki he‘ene tu‘utu‘uni.

²⁹He ko kinautolu na‘a ne toka mea‘i, na‘a ne toka tu‘utu‘uni foki ke nau hokosi ‘a e ‘īmisi ‘o hono ‘Alo; koe‘uhi ke ne ta‘okete ki he tehina tokolahi.

³⁰Pea ko kinautolu na‘a ne toka tu‘utu‘uni, na‘a ne ui foki kinautolu; pea ko kinautolu na‘a ne ui, na‘a ne fakatonuhia‘i foki kinautolu; pea ko kinautolu na‘a ne fakatonuhia‘i na‘a ne fakalāngilangi‘i foki kinautolu.

³¹Pea ko e hā ai ha‘ata lea ‘e fai ki he ngaahi me‘a ni? ‘Ā, kapau ‘oku kau ‘a e ‘Otua ma‘atautolu, pea ko hai tū ‘e ta‘ofi mai?

³²Seuke, kapau na‘e ‘ikai mamae ‘e he ‘Ene ‘Afio ki hono ‘Alo mo‘oni, ka ka tukuange ia ke pekia koe‘uhi ko kitautolu fuli pē, pea fēfē ai ha‘ane mamae ke foaki mai mo ia ‘a e me‘a kotoa pē.

³³Ko hai te ne talatalaaki ‘i ‘a e kakai kuo fili ‘e he ‘Otua? ‘a e ‘Otua koā, ‘a ia ‘oku ne fakatonuhia‘i kitautolu?

³⁴Ko hai ‘a e fakahalaia? ‘A Kalaisi koā, ‘a ia na‘a ne pekia ma‘atautolu, kae‘uma‘ā ‘ene toetu‘u; ‘a ia ‘oku ne ‘i he nima to‘omata‘u ‘o e ‘Otua, ‘a ia foki ‘oku ne hufekina kitautolu?

³⁵Ko hai tū ha taha te ne motuhi kitautolu mei he ‘ofa ‘a Kalaisi? ‘A mamahi? ‘A faingata‘a? ‘A fakatanga? ‘A honge? ‘A taka pē? ‘A tu‘utāmaki? ‘A heletā?

³⁶(‘o hangē ko e lau ‘a e Tohitapu, ‘Oku ‘osi atu ‘a e ‘aho mo e fai homau tāmate‘i koe‘uhi ko koe: Ne lau kimautolu ko e fanga sipi pē ke tāmate‘i).

³⁷‘Ikai; ka ‘i he ngaahi me‘a ni kotoa pē ‘oku tau ikuna noa pē ‘iate ia ne ne ‘ofa‘i kitautolu.

³⁸Seuke, ‘oku te tui, ‘e ‘ikai lava ‘e he mate, pe ko e mo‘ui, pe ko ha kau ‘āngelo, pe ko ha kau pule, pe ko ha ngaahi me‘a ‘oku lolotonga ni, pe ko ha ngaahi me‘a ka hoko mai,

³⁹pe ko ha ngaahi mālohi, pe ko ha mā‘olunga, pe ko ha loloto, pe ko ha me‘a ‘e taha ‘i Natula, ‘e ‘ikai te ne lava ke motuhi kitautolu mei he ‘ofa ‘a e ‘Otua, ‘a ia ‘oku ‘ia Kalaisi Sīsū ko hotau ‘Eiki.