Read KO E TOH TAPU KATOA TONGA Loma 9 Bible Online

Loma 9 - KO E TOH TAPU KATOA TONGA bible

Loma 9

¹KO ‘eku lea mo‘oni ē, ‘a au ko e toko taha ‘oku tu‘u ‘ia Kalaisi: ‘oku ‘ikai ko ‘eku loi; pea ‘oku fakamo‘oni kiate au ‘e hoku konisēnisi, he‘ene Laumālie-Mā‘oni‘oni‘ia —

²‘a ‘eni, ‘Oku ‘iate au ha mamahi lahi, pea ‘oku mahuhu ma‘u pē hoku loto.

³Seuke, na‘a ku mei loto ke u mala‘ia ‘a au, ‘o mama‘o mo Kalaisi, ko e fetongi ‘o hoku ngaahi tokoua, ko si‘oku ngaahi kāinga fakakakano.

⁴He ko e ha‘a ‘Isileli kinautolu; ‘oku ‘onautolu tonu ‘a e Ohi, mo e Sikaina, mo e ngaahi Fuakava;[13] pea ko kinautolu na‘e ‘omi ki ai ‘a e Lao, mo e ngaahi Feingalotu, mo e ngaahi Palōmesi.

⁵Pea ‘oku ‘onautolu ‘a e Mātu‘a, kae‘uma‘ā ‘oku meiate kinautolu ‘a Kalaisi, ‘a hono anga kakano, ‘a ia ko e ‘Otua ‘oku pule ki he me‘a kotoa pē, pea ‘o‘ona ‘a ‘e fakamālō ‘o ta‘engata, ‘Ēmeni.[14]

⁶Ka ‘oku ‘ikai ke fou pehē ‘a e me‘a, ko e pehē kuo ka‘anga ‘a e folofola ‘a e ‘Otua. He tala‘ehai ‘oku ‘Isileli kotoa pē ‘a kinautolu kuo tupu meia ‘Isileli.

⁷‘Io, neongo ko e hako ‘o ‘Epalahame, ka ‘oku ‘ikai lau ai kotoa pē ko ‘ene fānau: he ‘oku pehē ‘e he Tohi, ‘E ngata ‘ia ‘Aisake ‘a e lau ko ho hako.

⁸‘A ia ‘oku tatau mo e pehē, ‘Oku ‘ikai ko e fānau ‘oku fou fakakakano mai,[15] ‘a ia ko e fānau ‘a e ‘Otua, ka ko e fānau ‘oku fou fakapalōmesi, ko eni ia ‘oku lau ko e hako.

⁹He ko e palōmesi ia ‘a e lea ko eni, Ko e taimi ni[16] te u ha‘u ai, pea ‘e ma‘u ‘e Sela ha tama.

¹⁰Pea ‘ikai ko ia pē; ka ‘oku hā foki ‘i he feitama ‘a Lepeka ki ha toko taha, ko ‘etau kui ko ‘Aisake.

¹¹He neongo kuo te‘eki fā‘ele‘i kinaua, pea te‘eki ke na fai ha me‘a lelei pe kovi; ka koe‘uhi ke tu‘u ma‘u ‘a e tu‘utu‘uni fili ‘a e ‘Otua, ‘o ‘oua ‘e tu‘u ‘i he ngāue, ka ‘iate ia ‘oku fai ‘a e ui,

¹²ko ia na‘e fakahā ki he fefine, Ko ta‘okete te ne tauhi ‘a tehina.

¹³Pea ‘oku hoa mo ia ‘a e tohi, Na‘a ku ‘ofa kia Sēkope; ka ko ‘Īsoa na‘a ku fehi‘a ki ai.

¹⁴Pea ta fēfē ai? Te ta pehē koā, Tā ‘oku ‘i ai ha‘ane fai ta‘etotonu ‘a e ‘Otua, ‘ō?

¹⁵Molekemama‘o! He na‘a mo Mōsese ‘oku ne folofola kiate ia, ‘o pehē, ‘Ilonga ‘a ia ‘oku ou ‘alo‘ofa ki ai, te u fai ‘alo‘ofa ki ai, ‘io, ‘ilonga ‘a ia ‘oku ou manava‘ofa ki ai te u fai manava‘ofa ki ai.

¹⁶‘Āua; pea tā ‘oku ‘ikai tu‘unga ki he‘ete loto ki ai, pe ki he‘ete lele ki ai, ka ki he fai ‘alo‘ofa ‘a e ‘Otua.

¹⁷‘Io, ko eni ‘a e lau ‘a e Tohitapu kia Felo, Ko e me‘a pē ia na‘a ku fokotu‘u ai koe, koe‘uhi ke u ‘ai ke hā ‘eku māfimafi ‘iate koe, pea koe‘uhi ke ongoongoa ai hoku hingoa ‘i māmani kātoa.

¹⁸‘Āua; pea tā ‘oku ne ‘alo‘ofa kiate ia ‘oku ne finangalo ke ‘alo‘ofa ki ai, pea ‘oku ne fakafefeka ‘a ia ‘oku ne finangalo ke fakafefeka.

¹⁹Pea tā te ke pehē mai, Pea ko ‘ene toe lāunga ai ko e hā? he ‘e ta‘ofi ‘e hai ‘ene tu‘utu‘uni?

²⁰‘Isa! ko hai koe, tangata, ‘oku tali fakaanga ki he ‘Otua? ‘E lea koā ‘e he me‘a ngaohi kiate ia na‘a ne ngaohi, ‘o pehē, Ko e hā kuo ke ngaohi ai au ke pehē?

²¹‘Io! ‘ikai ‘oku fa‘iteliha ‘a e tufunga ipu ki he ‘umea, ke ngaohi mei he takaonga pē taha ha ipu ‘e taha ke kinokinoifie, mo e ipu ‘e taha ke palakū?

²²Kae fēfē ai ‘o kapau na‘e peheni ‘a e me‘a, neongo na‘e finangalo ‘e he ‘Otua ke fakae‘a ‘ene houhau, pea ke ‘ai ke mahino ‘a e me‘a te ne lava, ka ka anga mokomoko ia ‘o fuoloa, mo ne kātaki ‘a e ngaahi ipu ‘angahouhau ‘a ia kuo ‘osi sāuni ki he mala‘ia;

²³koe‘uhi ke ne ‘ai ke mahino ‘a e koloa ‘o hono lāngilangi, he hā ‘i he ngaahi ipu ‘anga‘alo‘ofa, ‘a ia na‘a ne tomu‘a teuteu ke lāngilangi‘ia —

²⁴‘a ē na‘a ne fakaului ai ‘a kitautolu foki, ‘o ‘ikai mei he Siu pē, ka mei he Senitaile foki.

²⁵‘O hangē foki ko ‘ene folofola ‘i he Tohi ‘a Hosea; Te u lau ko hoku kakai ‘a ia na‘e ‘ikai ko hoku kakai, pea ‘ofeina ‘a ia na‘e ‘ikai ‘ofeina.

²⁶Pea ‘e hoko ‘o pehē, ko e potu ‘a ia na‘e pehē ai kiate kinautolu, ‘Oku ‘ikai ko hoku kakai kimoutolu, ko e potu pē ia ‘e lau ai kinautolu, ko e ngaahi foha ‘o e ‘Otua Mo‘ui.

²⁷Pea ko e me‘a ki ha‘a ‘Isileli, ‘oku kalanga ‘e ‘Aisea ‘o pehē, Neongo ‘e tatau ‘a e lau ‘o e hako ‘o ‘Isileli pea mo e ‘one‘one ‘o e matātahi, ko e toenga pē ‘e fakamo‘ui:

²⁸he ‘oku ‘i ai ha tu‘utu‘uni ‘e fai ‘e he ‘Otua ‘i māmani, ‘o ne faka‘osi mo fakato‘oto‘o.

²⁹Pea ‘oku hoa mo ia ‘a e lea ‘a ‘Aisea ‘oku tu‘u mu‘a atu, Ka ne ta‘e‘oua ‘a e fakatoe ‘e he ‘Eiki Sāpaoti ha‘atau fo‘i tenga, pehē kuo tau hoko ‘o hangē ko Sōtoma, pea kuo fakatatau ‘a kitautolu mo Komola.

³⁰Pea ko e hā ai ‘etau lea ‘e fai? ‘A ‘eni, Ko Senitaile ta‘etuli ki he mā‘oni‘oni, kuo nau ma‘u ‘a e mā‘oni‘oni ‘oku mei he tui:

³¹ka ko ‘Isileli tuli ki ha lao ‘oku mei ai ha mā‘oni‘oni, na‘a mo e lao ko ia ne ‘ikai te nau a‘usia.

³²Koe‘uhi ko e hā? Koe‘uhiā, ko e me‘a ‘i he ‘ikai te nau kamata mei he tui, ka nau fou fakangāue pē, ko ia na‘a nau tūkia ‘i he maka tūkia‘anga.

³³‘O hangē ko ia kuo tohi, Ko eni ‘oku ou ‘ai ‘i Saione ha maka tūkia‘anga, mo ha makatu‘u fakatupu fifisi: pea ko ia ‘oku tui kiate ia ‘e ‘ikai fakamaa‘i.