Read KO E TOH TAPU KATOA TONGA Kolinitō 1 1 Bible Online

Kolinitō 1 1 - KO E TOH TAPU KATOA TONGA bible

Kolinitō 1 1

¹TŪ KO KIMAUA — ‘a Paula ko e ‘Aposetolo ‘a Sīsū Kalaisi, na‘e ui ki he lakanga ko ia ‘i he tu‘utu‘uni ‘a e ‘Otua, pea mo si‘i kāinga ko Sositene —

²Ko ‘ema tohi ki he siasi ‘a e ‘Otua — ‘a e kakai na‘e fakatapu ma‘ana ‘ia Kalaisi Sīsū — ‘a e siasi ‘i Kolinito, ‘a e kakai ne fakaului ki he fa‘ahinga tapu; pea ‘ilonga ha potu ‘oku ‘omoutolu mo kimaua, ‘oku kau ‘ema tohi kiate kinautolu ‘i he potu ko ia, ‘a ia ‘oku nau lotu ki he huafa ‘o hotau ‘Eiki ko Sīsū Kalaisi.

³‘Ofa ke mou ma‘u kelesi mo e fiemālie mei he ‘Otua ko ‘etau Tamai; mo e ‘Eiki ko Sīsū Kalaisi.

⁴‘Oku ou fakafeta‘i ma‘u ai pē ki hoku ‘Otua ‘iate kimoutolu, ko e me‘a ‘i he kelesi ‘a e ‘Otua kuo foaki atu ‘ia Kalaisi Sīsū;

⁵koe‘uhi ‘oku alaisia alaikolonga homou fakakoloa ‘iate ia, ‘o mou ma‘u kotoa ‘a e ngaahi faiva lea mo e ngaahi faiva poto foki;

⁶‘o taau mo ‘ene fu‘u o‘o ‘a e fakamatala ‘o Kalaisi ‘iate kimoutolu.

⁷Ko ia, ‘oku ‘ikai te mou tōmui ‘i ha ni‘ihi ‘i ha kelesi ‘e taha; ‘o mou nofo ‘amanaki ki he fakapū mai ‘o hotau ‘Eiki ko Kalaisi:

⁸‘a ia foki te ne poupou kimoutolu, ‘o a‘u ki he ngata‘anga, ke ta‘elau‘i kimoutolu ‘i he ‘aho ‘o hotau ‘Eiki ko Sīsū Kalaisi.

⁹Ko e ‘Otua ko e toko taha ia ‘oku fai ki he‘ene lea, pea ko ia ia na‘e fou mei ai homou tala ko e kau tangata mo Hono ‘Alo ko Sīsū Kalaisi ko hotau ‘Eiki.

¹⁰Ka ‘oku te kole atu, kāinga, ‘i he huafa ‘o hotau ‘Eiki ko Sīsū Kalaisi, ke mou lea taha pē kotoa pē, pea ke ‘oua te mou fakafa‘afa‘ahi: kaekehe, ke mou ma‘opo‘opo, ‘o loto taha mo fakakaukau taha.

¹¹He kuo u ma‘u talanoa kiate kimoutolu, si‘oku kāinga, mei he fāmili ‘o Koloi, tokua ‘oku ‘i ai ha ngaahi fetu‘usi ‘iate kimoutolu.

¹²‘O pehē, tokaange hamou taha ‘oku ne pehē, ‘Oku ‘o Paula au; pea ko e taha, ‘Oku ‘o ‘Āpolosi au; pea ko e taha, ‘Oku ‘o Kīfasi au; pea ko e taha, ‘Oku ‘o Kalaisi pē au.

¹³Kuo vahevahe koā ‘a Kalaisi?[1] He na‘e kalusefai ‘a Paula koe‘uhi ko kimoutolu, ‘ō? pe na‘e papitaiso kimoutolu ki he hingoa ‘o Paula?

¹⁴Mālō mo e ‘Otua na‘e ‘ikai te u papitaiso hamou toko taha, ngata pē ‘ia Kalisipo mo Keio.

¹⁵Tā ko e fai pē ke ‘oua na‘a lau ‘e ha taha, na‘a mou papitaiso ki he hingoa ‘o‘oku.

¹⁶‘Io, na‘a ku papitaiso foki mo e fale ‘o Setivena: hei‘ilo pe na‘e ai mo ha taha na‘a ku papitaiso.)

¹⁷He na‘e ‘ikai fekau au ‘e Kalaisi ke fai papitaiso, ka ke malanga‘aki ‘a e Kōsipeli: ‘o ‘ikai ke fai ia ‘i he poto ‘o e tokāteline, na‘a hoko ‘o ma‘ama‘a ai ‘a e Kolosi ‘o Kalaisi.

¹⁸He ko e tokāteline ‘o e Kolosi ko e me‘a ngali vale ia ki he kakai ‘oku fakatau ki mala; ka ki he kakai ‘oku fakatau ki he mo‘ui, hangē ko kitaua, ko e ivi ia ‘o e ‘Otua.

¹⁹He kuo tohi, Te u faka‘auha ‘a e poto ‘o e kau poto, Pea te u fakaikunoa ‘a e ‘ilo ‘a e kau ‘ilo‘ilo.

²⁰He koma‘ā ia ‘a e tama poto faka-e-maama ko eni? koma‘ā ia hono tama Lāpai? Koma‘ā ia hono tama filōsefa? ‘Ikai kuo fakaikulaunoa ‘e he ‘Otua ‘a e poto ‘o māmani.

²¹He ‘i he ‘iloange, ‘i he fai‘aki ‘a e poto ‘o e ‘Otua, na‘e ‘ikai lave‘i ‘a e ‘Otua ‘e māmani ‘aki ‘enau poto, na‘e toki finangalo ‘a e ‘Otua ke fai‘aki ‘a e me‘a ngali vale ko ia ‘i he‘emau malanga ke fakamo‘ui ‘a e kakai ‘oku tui.

²²Tala ‘e he Siu ke ‘omi ha ngaahi mana, tangi ‘e he Kalisi ki ha me‘a ‘oku ngali poto;

²³ka ka malanga‘aki ‘e kimautolu ha Kalaisi kuo kalusefai, ‘a ia ko e tūkia‘anga leva ki he Siu, pea ko e koto vale ki he Senitaile;

²⁴ka ki he kakai ko ia, ‘a e kakai kuo ne fili, pe ‘oku nau Siu pe Kalisi, ko e Kalaisi ko ia ko e ‘Ivi ‘o e ‘Otua, mo e Poto ‘o e ‘Otua.

²⁵He ko e me‘a ‘a e ‘Otua ‘oku ngali vale, ‘oku poto ia ‘i he kakai; pea ko e me‘a ‘a e ‘Otua ‘oku ngali vaivai, ‘oku mālohi ia ‘i he kakai.

²⁶He vakai ‘a e ui ‘omoutolu, kāinga. Tala‘ehai ko hamou tokolahi koni poto fakakakano; tala‘ehai ko e tokolahi koni mālohi; tala‘ehai ko e tokolahi koni hou‘eiki.

²⁷Kehe, kuo fili ‘e he ‘Otua ‘a e ngaahi me‘a ‘o māmani ‘oku vale ke fakamaa‘i ‘a e kau poto; pea kuo fili ‘e he ‘Otua ‘a e ngaahi me‘a ‘o māmani ‘oku vaivai ke fakamaa‘i ‘a e ngaahi me‘a ‘oku mālohi;

²⁸pea ko e ngaahi me‘a fākatu‘a ‘o māmani, mo e ngaahi me‘a ‘oku ta‘etoka‘i, ‘io, ko e ngaahi me‘a ‘oku ‘ikai ko ha me‘a, kuo fili ia ‘e he ‘Otua ke fakanoa‘i ‘a e ngaahi me‘a ‘oku lau ko e me‘a:

²⁹koe‘uhiā ke tuku ‘ene pōlepole ‘e he kakano kotoa pē ‘i he ‘ao ‘o e ‘Otua.

³⁰He ‘oku mei He‘ene ‘Afio ho‘omou tu‘u ni pea ‘ia Kalaisi Sīsū: ‘a ia kuo fokotu‘u mei he ‘Otua, ko hotau poto‘anga, ko hotau fakatonuhia mo fakamā‘oni‘oni‘anga, pea mo hotau huhu‘i.

³¹Koe‘uhiā ke hoko ‘o hangē ko e tohi, Ko ia ‘oku vīkiviki, ke ne vīkiviki ‘i he ‘Eiki.