Read KO E TOH TAPU KATOA TONGA Kolinitō 1 10 Bible Online

Kolinitō 1 10 - KO E TOH TAPU KATOA TONGA bible

Kolinitō 1 10

¹HE ‘oku ou loto, kāinga, ke ‘oua na ‘a puli ‘a e me‘a ni; ko ‘etau ngaahi kui na‘a nau ‘i he malu ‘o e ‘Ao kotoa pē, ‘o nau ‘asi kotoa pē ‘i he Tahi;

²pea nau papitaiso kotoa pē kia Mōsese ‘i he ‘ao mo e tahi;

³pea nau kai kotoa pē mei ha me‘akai mana pē taha;

⁴pea nau inu kotoa pē mei ha me‘a inu mana pē taha: he na‘a nau inu ai pē mei he Maka mana na‘e tulimui kiate kinautolu: ka ko e Maka ko ia ko Kalaisi pē.

⁵Ka neongo ia, ka tala‘ehai na‘e hōifua ‘a e ‘Otua ki hanau tokolahi; he na‘e tulaki holo kinautolu ‘i he toafa.

⁶Pea ko eni, na‘e fai ‘a e ngaahi me‘a ko ia, ko e taipe kiate kitautolu; ke ‘oua na‘a tau hoko ko e koto holi ki he kovi, ‘o hangē ā ko kinautolu na.

⁷Kae‘uma‘ā ke ‘oua te mou hoko ko e kau tauhi ‘aitoli, ‘o hangē ko e ni‘ihi ‘i he kakai na; ‘a ē ‘oku tu‘u ‘i he Tohi, Na‘e nofo ‘a e kakai ke kai mo inu, pea nau tu‘u hake ke fakavā.

⁸Pea ke ‘oua na‘a tau fe‘auaki, ‘o hangē ko e fe‘auaki ‘a e ni‘ihi ‘o e kakai na, pea tō ai hanau toko ua mano ma tolu afe ‘i he ‘aho pē ‘e taha.

⁹Pea ‘oua te tau ha‘aki ‘ahi‘ahi‘i ‘a e ‘Eiki,[12] ‘o hangē ko e ‘ahi‘ahi‘i ‘e he ni‘ihi ‘o e kakai na, pea nau mole ‘i he ngāue ‘a e fanga ngata.

¹⁰Pea ‘oua te mou lāunga ‘o hangē ā ko e lāunga ‘a e ni‘ihi ‘o e kakai na, ‘o nau mole ‘i he ngāue ‘a Faka‘auha.

¹¹Pea ko eni, na‘e hoko kiate kinautolu ‘a e ngaahi me‘a ko ia ko e fakataipe: pea na‘e tohi mo‘ota na‘ina‘i, ‘a kitaua kuo ta fenāpasi mo e aofangatuku ‘o e ngaahi kuonga.

¹²Ko ia, ‘ilonga ‘a ia ‘oku ne pehē kuo ne tu‘u, ke vakavakai na‘a ne hinga.

¹³Kuo te‘eki ke mo‘ua kimoutolu ‘e ha fa‘ahinga ‘ahi‘ahi ‘oku ta‘ehoa mo e tangata: pea ko e ‘Otua ko e toko taha ‘oku fai ki he‘ene lea, pea ‘e ‘ikai te ne fakangofua ke ‘ahi‘ahi‘i kimoutolu ‘o makehe atu ‘i ho‘omou mafai; kaekehe, te ne ngaohi fakataha mo e ‘ahi‘ahi hono hao‘anga foki mei ai, koe‘uhi ke lava hono kātaki‘i.

¹⁴Ko ia, si‘oku ‘ofa‘anga, mou hola mei he tauhi ‘aitoli.

¹⁵Seuke, ko ‘eku lea ki ha kakai ‘oku fakapotopoto, ke ‘amoutolu ke ‘utangi ‘a e me‘a ‘oku ou tala.

¹⁶Ko e ipu fakafeta‘i, ‘a ia ‘oku tau fakatapu ‘aki ha fakafeta‘i, ‘ikai ko e me‘a ia ‘oku tau kautaha ai ‘i he ta‘ata‘a ‘o Kalaisi? Ko e mā ‘oku tau pakipaki, ‘ikai ko e me‘a ia ‘oku tau kautaha ai ‘i he sino ‘o Kalaisi?

¹⁷He neongo pe ‘oku tau tokofiha, ka ko e mā pē taha kitautolu, ‘a ia ko e sino taha: he ‘oku tau ‘inasi kotoa pē mei he mā pē ko ia ‘e taha.

¹⁸Vakai ‘a ha‘a ‘Isileli fakaetangata: ‘ilonga kinautolu ‘oku kai feilaulau, ‘ikai ‘oku nau kautaha ai mo e ‘ōlita?

¹⁹Ka ko e hā ‘a e me‘a ‘oku hu‘u ki ai ‘eku lau? ko ‘eku pehē ko ha mo‘oni ia ‘a e feilaulau ‘oku ‘atu ki ha ‘aitoli? pe ko ha mo‘oni ia ‘a e ‘aitoli, ‘ō?

²⁰Ka ko ‘eku lea pē, ‘ē, ko e ngaahi feilaulau ‘oku ‘atu ‘e he hīteni, ‘oku nau ‘atu ki he ngaahi fa‘ahikehe, ‘o ‘ikai ki he ‘Otua: pea ‘oku ‘ikai te u loto ke mou kautaha mo Fa‘ahikehe.

²¹Tala‘ehai te mou lava ke inu ‘a e Ipu ‘a e ‘Eiki, mo e ipu foki ‘a Fa‘ahikehe: tala‘ehai te mou lava ke ‘inasi ‘i he Tēpile ‘a e ‘Eiki mo e tēpile foki ‘a Fa‘ahikehe.

²²He ko e pehē ke ta fakatupu fua‘a ki he ‘Eiki? he ‘oku ta mālohi ‘iate ia?

²³Ko e me‘a kotoa pē ‘oku ngofua, ka ‘oku ‘ikai ‘aonga ‘a e me‘a kotoa pē: ko e me‘a kotoa pē ‘oku ngofua, ka ‘oku ‘ikai ke fai ‘e he me‘a kotoa pē ha langa hake.

²⁴Ke ‘oua na‘a kumi ‘e ha taha ‘ene lelei ‘a‘ana, ka ko e lelei ‘a e taha.

²⁵‘Ilonga ha me‘a ‘oku fakatau ‘i he fale fahi manu, mou kai pē, ‘o ‘oua ‘e fai ha ‘eke ma‘a konisēnisi;

²⁶he ‘Oku ‘a e ‘Eiki ‘a māmani, Mo e me‘a ‘oku ‘i ai.

²⁷Kapau ‘e tala kātoanga atu ‘e ha taha ‘o e kau ta‘elotu, pea ‘oku mou tokanga ke ‘alu ki ai, ‘ilonga ha me‘a ‘oku tuku ‘i homou ‘ao, mou kai pē, ‘o ‘oua ‘e ‘eke ma‘a konisēnisi.

²⁸Ka ‘oka ‘iloange ‘e pehē atu ‘e ha taha, Ko e me‘a na‘e ‘atu ki he temipale, pea ‘oua leva te mou kai, koe‘uhi ko e toko taha ne ne fakahā, pea koe‘uhi ko konisēnisi.

²⁹Ka ‘oku ‘ikai te u pehē, koe‘uhi ko e konisēnisi ‘o‘ou, ka ko e konisēnisi ‘o e taha kehe ko ia: he ko e pehē koā ke fakamo‘ua ‘ete tau‘atāina ‘e ha konisēnisi kehe, ko e hā?

³⁰Kapau ‘oku te kai mo e fakafeta‘i, pea fēfē ai hoto lau‘ikovi‘i ‘i he me‘a ‘oku te fakafeta‘i ai?

³¹Ko ia, pe ko ho‘omou kai, pe ko ho‘omou inu, pe ko ho‘omou fai ha me‘a, mou fai kotoa pē ke ongoongolelei ai ‘a e ‘Otua.

³²Ke ta‘emelengatamaki ho‘omou tō‘onga ki he Siu mo e Kalisi fakatou‘osi.

³³Pea ki he siasi foki ‘a e ‘Otua: ‘o hangē foki ‘oku ou fai fakaoleole ‘e au ki he kakai kehekehe ‘i he‘ete me‘a kotoa pē, ‘o ‘ikai te u kumi ‘a e lelei ‘a‘ata, ka ko e lelei ‘a e tokolahi; hei‘ilo ‘e lava ai honau fakamo‘ui.