Read KO E TOH TAPU KATOA TONGA Kolinitō 1 11 Bible Online

Kolinitō 1 11 - KO E TOH TAPU KATOA TONGA bible

Kolinitō 1 11

¹MOU hoko ko e kau fa‘ifa‘itaki kiate au, ‘o hangē foki ko ‘eku fa‘ifa‘itaki ‘aku kia Kalaisi.

²Pea ko eni ‘oku ou fakamālō atu ‘i ho‘omou manatu kiate au ‘i he me‘a kotoa pē, mo ho‘omou pukepuke ‘a e ngaahi tu‘utu‘uni ‘o fakatatau ki he‘eku tuku atu.

³Ka ‘oku ou loto ke mou ‘ilo, ko e ‘ulu ‘o e tangata kotoa pē ko Kalaisi; pea ko e ‘ulu ‘o e fefine ko e tangata; pea ko e ‘ulu ‘o Kalaisi ko e ‘Otua.

⁴‘Ilonga ha tangata ‘oku fai ha hū, pe ha malanga palofisai, ka ‘oku tatā hono ‘ulu, ‘oku ne fakatōkilalo‘i ai hono ‘ulu.

⁵Ka ‘ilonga ha fefine ‘oku fai ha lotu, pe ha malanga palofisai, ta‘e‘ufi‘ufi hono ‘ulu, ‘oku ne fakatōkilalo‘i ai hono ‘ulu: he ‘oku ne tatau tofu pē mo ha toko taha kuo fakatekefua.

⁶‘Io, kapau ‘oku ‘ikai ‘ai tatā ha fefine, pea tuku ke ne kosi foki: pea kapau ko e me‘a fakamā ki ha fefine ke kosi, pe fakatekefua, pea tuku ke ne tatā.

⁷Ka ‘oku ‘ikai totonu ke ‘ufi‘ufi ‘e he tangata hono ‘ulu, he ko e ‘īmisi ia mo e lāngilangi ‘o e ‘Otua; ka ko e fefine ko e lāngilangi ia ‘o e tangata.

⁸He tala‘ehai ko e tupu‘anga ‘o e tangata ko e fefine; kaekehe, ko e tupu‘anga ‘o e fefine ko e tangata.

⁹Kae‘uma‘ā foki, na‘e ‘ikai ngaohi ‘a e tangata koe‘uhi ko e fefine, ka ko e fefine koe‘uhi ko e tangata.

¹⁰Ko hono ‘uhinga ia ‘oku totonu ke ‘ai ai ‘e he fefine ki hono ‘ulu ‘a e faka‘ilonga pule‘ia, telia ‘a e kau ‘āngelo.

¹¹Ka neongo ia, ka tala‘ehai ‘oku fakapalataha ‘a e fefine ‘i he lotu, ta‘ekau ai ‘a e tangata, pe fakapalataha ‘a e tangata, ta‘ekau ai ‘a e fefine.

¹²He hangē ā ko e tangata ko e tupu‘anga ‘o e fefine, pehē foki ‘oku fou ‘i he fefine ‘a e tangata: ka ko e tupu‘anga ‘o e me‘a kotoa pē ko e ‘Otua.

¹³Mou ‘utangi ia ‘i he me‘a ‘oku hā ‘iate kimoutolu: ‘oku taau koā ke fai ‘e he fefine ha hū ki he ‘Otua ta‘etatā?

¹⁴‘Ikai ‘oku hīnoi‘i kimoutolu ‘e Natula, ka ‘ulu loloa ha tangata ko e me‘a ta‘engali kiate ia?

¹⁵Ka ‘oka ‘ulu loloa ha fefine, ko hono lāngilangi ia: he ko e lou‘ulu kuo tuku mōno pulonga.

¹⁶Ka ‘oka ai ha toko taha ‘oku matamata fie fakakikihi ‘i he me‘a; ‘ē, ‘oku ‘ikai te tau fai ha anga pehē, ‘e kitautolu pē ko e ngaahi siasi ‘a e ‘Otua.

¹⁷Ka ko ‘eku tu‘utu‘uni ko ia, ‘oku ‘ikai ke ‘alu atu mo e fakamālō; koe‘uhi ko ho‘omou fa‘a fakataha ‘oku ‘ikai iku ki ha laka ki mu‘a, ka ki he holomui.

¹⁸He ko e me‘a ‘e taha, ‘oku mofisi mai tokua, ka fai ha‘amou fakataha ‘oku hoko ‘iate kimoutolu ‘a e ngaahi mavahevahe: pea ‘oku ou tui ki ha me‘a ni‘ihi.

¹⁹Seuke, kuo pau ke ‘iate kimoutolu mo ha fakafa‘afa‘ahinga; koe‘uhi ke e‘a ai ‘iate kimoutolu ‘a kinautolu ‘oku lelei mo‘oni.

²⁰Pea ko eni, ko ho‘omou fakataha ki he potu ko ē, tala‘ehai ko e kai ia ‘o e ‘Ohomohe ‘o e ‘Eiki.

²¹He ‘i he fai ‘o e kai, ‘oku takitaha ala leva ki he me‘a na‘e ha‘u mo ia; pea ko Me‘a ē ‘oku fiekaia, ka ko Me‘a ē ‘oku konā.

²²‘Uoi, tā ‘oku ‘ikai ‘apē hamou ngaahi fale ke fai ai ho‘omou kai mo e inu, ‘ō? pe na‘a ko ho‘omou ta‘etoka‘i ‘a e Fakataha ‘a e ‘Otua, mo ho‘omou fie fakamaa‘i ‘a masiva? Ko e hā ‘eku lea atu ‘e fai? te u fakamālō atu? ‘Oku ‘ikai te u fakamāloo‘i kimoutolu ‘i he me‘a ni.

²³He na‘a ku ma‘u ‘e au mei he ‘Eiki ‘a ia ā ne u tuku atu, ‘o pehē, Ko e ‘Eiki ko Sīsū, ‘i he pō ko ia na‘e fai ai hono lavaki‘i, na‘a ne to‘o ha mā:

²⁴pea hili ‘ene fakafeta‘ia, na‘a ne pakipaki, ‘o ne me‘a, Ko ho‘oku ‘eni sino, ‘a ia ‘oku ma‘amoutolu: mou fai pehē mōku fakamanatu.

²⁵Pehē foki ‘ene to‘o ‘a e ipu, hili ‘a e ‘ohomohe, ‘o ne me‘a, Ko e ipu ni, ko e fuakava fo‘ou ia ‘oku fai‘aki hoku toto: ‘ilonga ha‘amou inu ia, fai pehē mōku fakamanatu.

²⁶Seuke, ‘ilonga ha‘amou kai ‘a e mā ni mo inu ‘i he ipu, ‘oku mou fakahā ‘a e pekia ‘a e ‘Eiki kae‘oua ke ne hoko mai.

²⁷Ko ia, ‘ilonga ‘a ia te ne fai ta‘engali ‘ene kai ‘a e mā, pe ko ‘ene inu ‘i he ipu ‘a e ‘Eiki, kuo ne angahala ki he sino mo e ta‘ata‘a ‘o e ‘Eiki.

²⁸Ka ke sivi mu‘a ‘a e tangata ‘e ia, pea ke ne toki kai ‘i he mā mo inu ‘i he ipu.

²⁹He ko ia ‘oku ne kai mo inu ai, ‘oku ne kai mo inu hano fakamo‘ua, ‘o kapau ‘oku ‘ikai te ne fifili ‘o ‘ilo ‘a e sino.

³⁰Ko hono ō ia ‘oku ‘i ai hamou tokolahi ‘oku vaivai mo mahamahaki, ‘io, pea kuo mohe ‘a e ni‘ihi.

³¹He ka ne tau fifili ‘o ‘ilo ‘a kitautolu, pehē ‘e ‘ikai fakamo‘ua ‘a kitautolu.

³²Ka ‘i hotau fakamo‘ua, ko e ‘Eiki ia ‘oku ne fai hotau kinisi, koe‘uhi ke ‘oua na‘a fai hotau fakamala‘ia fakataha mo māmani.

³³Ko ia, si‘oku kāinga, ka mou ka fakataha ke kai, mou fakafenē‘aki mu‘a.

³⁴Kapau ‘oku fiekaia ha taha, tuku ke ne kai ‘i ‘api; ke ‘oua te mou fakataha ke kai mo‘ua. Ko hono toe ‘o e ngaahi me‘a te u toki tu‘utu‘uni ‘oka u ka ‘alu atu.