Read KO E TOH TAPU KATOA TONGA Kolinitō 1 12 Bible Online

Kolinitō 1 12 - KO E TOH TAPU KATOA TONGA bible

Kolinitō 1 12

¹PEA ko e me‘a ki he ngaahi mafai fakalaumālie, ‘oku ‘ikai te u loto ke mou mūnoa, kāinga.

²‘Oku mou ‘ilo, lolotonga ho‘omou hīteni, na‘e taki hē kimoutolu ki he ngaahi ‘aitoli ta‘elea, ha me‘a pē ‘e taki kimoutolu ki ai —

³Ko ia ‘oku ou fakahā atu; ‘oku ‘ikai ha taha ‘oku fakalea ‘e he Laumālie ‘o e ‘Otua te ne pehē, Ko e mala‘ia ‘a Sīsū: pea ‘oku ‘ikai ha taha te ne fa‘a hua‘aki ‘o pehē, Ko Sīsū ko e ‘Eiki, ka ‘i he‘ene Laumālie Mā‘oni‘oni‘ia.

⁴Pea ko eni, ‘oku tufa kehekehe ‘a e ngaahi kelesi, ka ‘oku taha ai pē ‘a e Laumālie:

⁵pea ‘oku tufa kehekehe ‘a e ngaahi lakanga, ka ‘oku taha ai pē ‘a e ‘Eiki:

⁶pea ‘oku tufa kehekehe ‘a e ngaahi ngāue, ka ‘oku taha ai pē ‘a e ‘Otua ‘a ia ‘oku ne fai ‘a e ngāue kotoa pē ‘i he kakai kotoa pē.

⁷Ka ‘oku tuku ‘a e fakahā‘anga ‘o e Laumālie ki he tangata takitaha, pea ke ‘aonga.

⁸He ‘oku tuku ki ha taha ‘a e mafai ke lea‘aki ‘a e poto, ‘o fou mai ‘i he Laumālie; pea ki ha taha ‘a e mafai ke lea‘aki ‘a e ‘ilo loloto, ka ‘i he Laumālie pē ko ia;

⁹‘oku tuku ki ha taha kehe ‘a e tui, ka ko e ‘iate ia ‘a e Laumālie pē ko ia; pea ki ha taha ‘a e ngaahi mafai faito‘o, kae taha ai pē ‘a e Laumālie ‘oku fai‘aki;

¹⁰pea ‘oku tuku ki ha taha ‘a e ngaahi ngāue mana; ki ha taha ‘a e malanga palofisai; ki ha taha ‘a e vavanga‘i ‘o e ngaahi laumālie; ki ha taha kehe ‘a e fai‘aki ‘a e ngaahi fa‘ahinga lea: pea ki ha taha ‘a e hiki ‘o e ngaahi lea.

¹¹Ka ko e me‘a kotoa pē ko ia, ko e ngāue ‘a e Laumālie pē taha ko ia, he‘ene tufa kehekehe ki he kakai takitaha, ‘o fakatatau ki hono finangalo.

¹²He hangē tofu pē ‘oku taha ‘a e sino, kae lahi hono ngaahi kupu; pea ko e ngaahi kupu kehekehe ‘o e sino, neongo ‘oku lahi, ka ko e sino pē taha; ‘oku pehē foki ‘a Kalaisi.

¹³Kae‘uma‘ā, ‘i he fai‘aki ha Laumālie pē taha, na‘e papitaiso kitautolu kotoa pē ki ha sino pē taha — pe ‘oku tau Siu pe Kalisi, pōpula pe tau‘atāina — pea na‘e fakainu‘aki ‘a kitautolu kotoa pē ha Laumālie pē taha.

¹⁴Kae‘uma‘ā ‘ē, tala‘ehai ko e kupu ‘e taha ‘a e sino, ka ‘oku lahi.

¹⁵Ka ne pehē ‘e he va‘e, Sā, ‘oku ‘ikai te te kau kita ki he sino, koe‘uhi ‘oku ‘ikai ko ha nima kita; pea ‘oku ‘ikai ai koā kau ia ki he sino, ‘ō?

¹⁶Pea ka ne pehē ‘e he telinga, Sā, ‘oku ‘ikai te te kau kita ki he sino, koe‘uhi ‘oku ‘ikai ko e mata kita; pea ‘oku ‘ikai ai koā kau ia ki he sino, ‘ō?

¹⁷Ka ne mata ‘a e sino kotoa, pea fēfē ai ‘a e fanongo? Ka ne fanongo hono kotoa, pea fēfē ai ‘a e nanamu?

¹⁸Ka ‘i hono anga ko eni, kuo fa‘u ‘e he ‘Otua ‘a e ngaahi kupu ‘i he sino, ‘o takitaha ma‘ana; ‘o fakatatau ki he me‘a na‘e hā ki hono finangalo.

¹⁹Ka ‘oka ne ala taha ‘a e ngaahi kupu kotoa pē, pea sino fēfē?

²⁰Ka ‘i hono anga ko eni, ‘oku lahi ‘a e ngaahi kupu, kae taha pē ‘a e sino.

²¹Tala‘ehai ‘oku lava ‘e he mata ke lea ki he nima, ‘o pehē, ‘Oku ‘ikai te ke ‘aonga kiate au: pehē foki ‘e he ‘ulu ki he va‘e, ‘Oku ‘ikai te mo ‘aonga kiate au.

²²Kaekehe, ko e ngaahi kupu ‘o e sino ‘oku matamata vaivai, ‘oku lahi hake noa pē honau ‘aonga:

²³pea ko e ngaahi kupu ‘o e sino ‘oku tau lau ‘oku feifei‘avale, ‘oku lahi hake ‘a e teunga ‘oku tau ‘ai ki ai: pea ko hotau ngaahi feitu‘u ‘oku palakū, ‘oku ‘i ai hano matamatalelei‘anga ‘oku hulu atu;

²⁴ka ‘oku ‘ikai ‘aonga ha me‘a pehē ki hotau ngaahi feitu‘u ‘oku matamatalelei. Ka ko eni, na‘e ngaohi ‘e he ‘Otua ‘a e sino ke hōhoamālie, he‘ene ‘ai ke hulu atu ‘a e teunga ‘o ha feitu‘u ‘oku masivesiva:

²⁵koe‘uhi ke ‘oua na‘a ai ha mavahevahe ‘i he sino; ka ke tatau ‘a e fetokanga‘aki ‘a e ngaahi kupu.

²⁶Pea ko ia, ka mamahi ha kupu ‘e taha, pea ‘oku kaungā mamahi mo ia ‘a e kupu kotoa pē; pea ka fakasanisani ha kupu ‘e taha, pea ‘oku kaungā fiefia mo ia ‘a e ngaahi kupu kotoa.

²⁷Pea ko kimoutolu ko e sino ‘o Kalaisi, pea ko e ngaahi kupu ‘oku takitaha hono feitu‘u.

²⁸Pea kuo fokotu‘u ‘e he ‘Otua ha ni‘ihi ‘i he siasi ke ‘aposetolo — ko e ‘uluaki ia — ko hono ua ‘a e kau malanga palofisai, ko hono tolu ko e kau faiako: hoko ai ‘a e ngaahi mafai mana, hoko ai ‘a e ngaahi mafai faito‘o, ‘a e ngaahi tokoni tu‘utāmaki, ‘a e ngaahi tu‘unga pule, ‘a e mafai ‘o e ngaahi fa‘ahinga lea.

²⁹‘Oku ‘aposetolo kotoa pē koā, ‘ō? ‘Oku malanga palofisai kotoa pē? ‘Oku faiako kotoa pē? ‘oku mafai mana kotoa pē?

³⁰‘oku ma‘u kotoa pē ‘a e ngaahi mafai faito‘o? ‘oku lea‘aki kotoa pē ‘a e ngaahi lea kehekehe? ‘oku hiki lea kotoa pē, ‘ō?

³¹Ka mou kakapa ki he ngaahi kelesi ‘oku mā‘olunga.