Read KO E TOH TAPU KATOA TONGA Kolinitō 1 15 Bible Online

Kolinitō 1 15 - KO E TOH TAPU KATOA TONGA bible

Kolinitō 1 15

¹PEA ko eni, kāinga, ‘oku ou fakapapau atu ‘a e Kōsipeli na‘a ku malanga‘aki kiate kimoutolu, ‘a ia na‘a mou tali foki, ‘io, pea ‘oku mou tu‘u ai foki;

²kae‘uma‘ā ‘oku mou fakatau ai ki he mo‘ui, ‘o kapau te mou puke ma‘u ‘a e Kōsipeli ‘i hono anga na‘a ku fakahā atu ai — ko hono me‘a pē na‘a ko e kula noa pē ho‘omou tui.

³He ko e taha ‘o e ngaahi me‘a na‘a ku fuofua tuku atu, ‘a ia foki na‘a ku ma‘u ‘e au, ‘a ‘eni, Na‘e pekia ‘a Kalaisi koe‘uhi ko ‘etau ngaahi angahala, ‘o fakatatau ki he Tohitapu;

⁴pea na‘e telio ia; pea na‘e fokotu‘u ia ‘i hono ‘aho tolu, ‘o fakatatau ki he Tohitapu;

⁵pea na‘a ne hā kia Kīfasi, pea hili ia ki he kau Hongofulumāua,

⁶hili ia na‘a ne hā ki he kāinga lotu ‘e toko nimangeau tupu, fakataha, ‘a ia ‘oku kei tolonga ni honau tokolahi, ka kuo mohe ha ni‘ihi:

⁷hili ia na‘a ne hā kia Sēmisi; hili ia ki he kau ‘Aposetolo kotoa pē.

⁸Pea kimui ‘aupito, ‘o hangē tofu pē ko e fanau‘i ta‘ehoko[14] kita, na‘a ne hā kiate au foki.

⁹He ko au ia ‘a e si‘i taha ‘i he kau ‘Aposetolo; he ‘oku ‘ikai te u taau ke ui ko e ‘aposetolo, koe‘uhiā na‘a ku fakatanga‘i ‘a e siasi ‘o e ‘Otua.

¹⁰Ka ko e kelesi ‘a e ‘Otua kuo u hoko ai ki he me‘a kuo u hoko ki ai ni: pea ko ‘ene kelesi ko ia na‘e ngāue mai, na‘e ‘ikai ta‘e‘aonga ia; kaekehe, na‘e hulu atu ‘eku fakafitefita‘a ‘iate kinautolu na kotoa: ka tala‘ehai ko au na‘e fai, ka ko e kelesi ‘a e ‘Otua ‘a ia na‘a ma kau.

¹¹Pea ‘oku tatau ai pē, pe ko au, pe ko kinautolu, ka ‘oku pehē ‘a e anga ‘o ‘emau malanga, pea na‘e pehē ‘a e anga ‘o ho‘omou tui.

¹²Pea ko eni, kapau ‘oku malanga‘aki ‘a Kalaisi, ‘o pehē, Kuo fokotu‘u ia mei he pekia, pea fēfē ai ‘a e lau ‘a homou ni‘ihi, tokua ‘oku ‘ikai ke toetu‘u ‘a e pekia?

¹³He kapau ‘oku ‘ikai ha toetu‘u ‘o e pekia, pea tā kuo ‘ikai fokotu‘u ‘a Kalaisi:

¹⁴pea kapau kuo ‘ikai fokotu‘u ‘a Kalaisi, pea tā ko e laufanō ‘emau malanga, ko e laufanō foki ho‘omou tui.

¹⁵Kae‘uma‘ā ‘oku mau hā ko e kau lohiaki‘i ‘o e ‘Otua; koe‘uhi ko ‘emau fakahaa‘i ‘a e ‘Otua, tokua kuo ne fokotu‘u ‘a Kalaisi; ‘a ia na‘e ‘ikai te ne fokotu‘u, ‘o kapau ā ‘oku ‘ikai fokotu‘u ‘a e pekia.

¹⁶He kapau ‘oku ‘ikai ke fokotu‘u ‘a e pekia, pea tā kuo ‘ikai fokotu‘u ‘a Kalaisi.

¹⁷Pea kapau kuo ‘ikai fokotu‘u ‘a Kalaisi, tā koe kula noa pē ho‘omou tui, pea ‘oku mou kei ‘i ho‘omou angahala.

¹⁸Pea tā ko kinautolu na‘e mohe ‘ia Kalaisi na‘a nau ‘auha.

¹⁹Kapau kuo tau ‘osi ‘a e mo‘ui ko eni mo ‘etau fakatu‘a kia Kalaisi, pea ko hono ngata ia, tā ko e tu‘utāmaki taha kitautolu ‘i he kakai kotoa pē.[15]

²⁰Ka ko eni, KUO fokotu‘u ‘a Kalaisi mei he pekia, ko e polopolo ‘o e fa‘ahinga kuo mohe.

²¹He ko e me‘a ‘i he fou mai ‘i ha tangata ‘a e mate, pea fou mai ‘i ha tangata foki ‘a e toetu‘u ‘o e pekia.

²²‘Io, hangē tofu pē ‘oku mate kotoa pē ‘ia ‘Ātama, pehē foki ‘e fakamo‘ui hake kotoa pē ‘ia Kalaisi.

²³[Ka ‘e takitaha ‘i hono vāhenga; ko e polopolo ko Kalaisi; hoko ai ‘a kinautolu ‘oku ‘o Kalaisi, ‘oka fai ‘ene hā‘ele mai.

²⁴Toki hoko ‘a e ngata‘anga, ‘oka tukuange ‘e ia ‘a e pule‘anga ki he ‘Otua, ‘io, ki he Tamai: ‘oka kuo ne fakaka‘anga ‘a e pule kotoa pē mo e tu‘unga kotoa pē mo e mālohi.

²⁵He kuo pau pē ke ne Hau, kae‘oua ke ne tuku ‘a e fili kotoa pē ki hono lalo va‘e.

²⁶Tā kuo fakaka‘anga mo e fili fakamui, ‘a Mate:

²⁷he ‘oku lau, Na‘a ne tuku ke ‘i he lalo va‘e ‘o‘ona ‘a e me‘a kotoa pē. Ka ‘oka ne ka folofola mai, ‘o pehē, Kuo tuku ki lalo ‘a e me‘a kotoa pē; ‘oku mahino ‘oku ‘ikai ke kau ai ‘a ia na‘a ne fai ‘a e tuku ki lalo ‘o e me‘a kotoa pē kiate ia.

²⁸Ka ‘oka lava ‘a e tuku ki lalo ‘o e me‘a kotoa pē kiate ia, pea ‘e toki tuku ki lalo ‘a e ‘Alo ‘e ia kiate ia na‘a ne fai ‘a e tuku ki lalo ‘o e me‘a kotoa pē kiate ia; koe‘uhiā ke tāfataha ‘a e ‘Otua ‘i he me‘a kotoa pē.]

²⁹He ka ‘ikai, pea ko e hā ‘anautolu ai ‘e fai, ‘a e fa‘ahinga ‘oku papitaiso ma‘a e pekia? Kapau ‘oku ‘ikai ‘aupito ha fokotu‘u ‘o e pekia, pea koe‘uma‘ā honau papitaiso ma‘anautolu?

³⁰Pea koe‘uma‘ā ‘emau nofo ‘i lelenga ‘oku fai ‘i he houa kotoa pē?

³¹Ko kita ‘oku te mate hokohoko ‘aho pē; ‘ā, ko ‘eku mo‘oni pē! hangē ‘oku mo‘oni ‘eku pōlepole ‘iate kimoutolu, kāinga, ‘a ia ‘oku ou lava ‘ia Kalaisi Sīsū ko hotau ‘Eiki.

³²Kapau na‘e fakaetangata pē ‘eku tau mo e manu fekai ‘i ‘Efesō, ko e hā hono ‘aonga kiate au? kapau ‘oku ‘ikai fokotu‘u ‘a e pekia, “‘Ē, tau kai mo inu ē, He ‘oku ‘apongipongi ‘etau mate.”

³³‘Oua na‘a tuku ke kākaa‘i kimoutolu. “Oku maumau‘i ‘a e ngaahi ‘ulungāanga lelei ‘e he fa‘a talanoa kovi.”

³⁴Tuku ho‘omou konā, ka mou ‘ā hake ki he anga totonu; pea ‘oua te mou fai angahala. He ‘oku ‘i ai ‘a e ni‘ihi ‘oku ‘ikai ha‘anau momo‘i ‘ilo ki he ‘Otua. ‘Oku ou lea pehē ko homou fakamaa‘i.

³⁵Ka ‘e ai nai ha taha te ne pehē, Ko e hā ‘a e anga ‘o e fokotu‘u ‘o e pekia? Ko e hā ‘a e anga ‘o e sino te nau ha‘u mo kinautolu?

³⁶‘a e siana ta‘eloto! na‘a mo e me‘a ‘oku ke tō ‘e koe ‘oku ‘ikai fakamo‘ui hake ia ‘o kapau ‘oku ‘ikai mate.

³⁷Pea ko e me‘a ‘oku ke tō, tala‘ehai ‘oku ke tō ‘a e sino‘i me‘a te ne hoko ki ai; ka ko ha momo‘i tenga pē, ha uite nai, pe ha ‘akau kehe:

³⁸ka ‘oku ‘atu ki ai ‘e he ‘Otua ha sino, ‘o fakatatau ki he‘ene tu‘utu‘uni; pea ki he fa‘ahinga tenga takitaha hono sino ‘o‘ona.

³⁹Tala‘ehai ‘oku anga taha ‘a e kakano kotoa pē; kaekehe, ‘oku taha ‘a e kakano ‘o e tangata, kae taha kehe ‘a e kakano ‘o e manu, pea taha kehe ‘a e kakano ‘o e manupuna, pea taha kehe ‘a e kakano ‘o e ika.

⁴⁰‘Oku ‘i ai foki ‘a e fa‘ahinga sino fakalangi, mo e fa‘ahinga sino fakaemāmani: ka ‘oku taha ‘a e teunga ‘o e fa‘ahinga fakalangi, pea taha kehe ‘a e teunga ‘o e fa‘ahinga fakaemāmani.

⁴¹‘Oku taha ‘a e teunga ‘o e la‘ā, pea taha ‘a e teunga ‘o e māhina, pea taha kehe ‘a e teunga ‘o e ngaahi fetu‘u; ‘io, ‘oku fai kehekehe ‘a e teunga ‘o e fetu‘u ko ē mo e fetu‘u ko ē.

⁴²‘Oku pehē mo e Toetu‘u ‘o e Pekia, ‘Oku tō ko e koto ‘auha, ‘e fokotu‘u ko e koto ta‘efa‘a‘auha:

⁴³‘oku tō ko e koto palakū, ‘e fokotu‘u ko e koto teunga‘ia: ‘oku tō ko e koto vaivai, ‘e fokotu‘u ko e koto mālohi;

⁴⁴‘oku tō ko e sino fakakakano, ‘e fokotu‘u ko e sino fakalaumālie, kapau ‘oku ai ha sino fakakakano, tā ‘oku ‘i ai mo ha sino fakalaumālie.

⁴⁵‘O hangē foki ko e me‘a kuo tohi, Na‘e hoko ‘a e ‘uluaki tangata, ‘a ‘Ātama, ko e kakano mo‘ui; na‘e hoko ‘a e ‘Ātama kimui, ko e laumālie fakamo‘ui.

⁴⁶Ka tala‘ehai ‘oku fuofua hoko ‘a e fakalaumālie; kaekehe, ko e fakakakano, pea toki hoko ‘a e fakalaumālie.

⁴⁷Ko e ‘uluaki Tangata ko e tupu fakaemāmani, ko ha me‘a-efu pē: ko hono ua ‘o e Tangata ko e tupu fakalangi.

⁴⁸‘Ilonga pe e anga ‘o e Me‘a-efu na, pea ma‘u ia ‘e he fa‘ahinga Me‘a-efu: pea ‘ilonga pē e anga ‘o e Tupu fakalangi na, pea ma‘u ia ‘e he fa‘ahinga Tupufakalangi.

⁴⁹Pea hangē kuo tau ma‘u ‘a e ‘īmisi ‘o e Me‘a-efu, pehē foki te tau[16] ma‘u ‘a e ‘īmisi ‘o e Tupufakalangi.

⁵⁰Pea ko eni pē e me‘a ‘oku ou tala atu, kāinga; ‘oku ‘ikai lava ‘e he kakano mo e toto ke hokosi noa pē ‘a e Pule‘anga ‘o e ‘Otua: ‘uma‘ā ha hokosi ‘e ‘Auha ‘a Ta‘efa‘a‘auha.

⁵¹‘Ē! kau tala atu ha misiteli; ‘e ‘ikai te tau mohe kotoa pē, ka te tau liliu kotoa pē, ‘i ha fo‘i mōmeniti,

⁵²‘i ha fo‘i kemo pē, ‘i he ifi fakamui ‘o e talupite: ‘io, ‘e ifi ‘a e talupite, pea ‘e fokotu‘u ‘a e pekia, ‘o ta‘efa‘a‘auha, pea ko kitautolu ‘e liliu.

⁵³He kuo pau ke ‘ai ‘e he me‘a ‘auha ni ‘a e ta‘efa‘a‘auha, pea ke ‘ai ‘e he me‘a mate ni ‘a e ta‘efa‘amate.

⁵⁴Pea ka ‘ai leva ‘e he me‘a ‘auha ni ‘a e ta‘efa‘a‘auha, mo ‘ai ‘e he me‘a mate ni ‘a e ta‘efa‘amate, pea ‘e toki hokosia ‘a e folofola ko ia na‘e tohi, Kuo fōngia ‘a Mate ‘o liliu ko e ikuna.

⁵⁵‘E Mate, kofa‘ā ho‘o ikuna na? ‘E Mate, kofa‘ā ho‘o huhu na?

⁵⁶Ko e huhu ‘a e mate ko e angahala, pea ko e mālohinga ‘o e angahala ko e lao.

⁵⁷Kae fakafeta‘i ki he ‘Otua, he‘ene tuku mai ke tau ikuna ‘i hotau ‘Eiki ko Sīsū Kalaisi!

⁵⁸Ko ia, si‘oku kāinga ‘ofa‘anga, ke mou tu‘u ma‘u, ta‘engaue, ‘o mou tupulekina ma‘u ai pē ‘i he ngāue ‘a e ‘Eiki: ‘i ho‘omou ‘ilo ni, ko e me‘a ki he ‘Eiki, ko ho‘omou fakaongosia ‘oku ‘ikai ko e laufanō ia.