Read KO E TOH TAPU KATOA TONGA Kolinitō 1 2 Bible Online

Kolinitō 1 2 - KO E TOH TAPU KATOA TONGA bible

Kolinitō 1 2

¹PEHĒ, kāinga, ‘i he‘eku ‘alu atu ‘a‘aku ke malanga‘aki ‘a e ngāue ‘a e ‘Otua,[2] na‘e ‘ikai tu‘unga ‘eku ‘alu ko e pehē ‘oku ‘i ai ha‘aku tokāteline, pe poto, ‘oku fisifisimu‘a.

²He na‘e ‘ikai te u tu‘utu‘uni mo ha me‘a ke u ‘ilo ki ai ‘i homou lotolotonga, ko Sīsū Kalaisi pē, pea na‘a mo ia ko hono kalusefai pē.

³Pehē foki ‘i he‘eku feangai ‘a‘aku mo kimoutolu, na‘a ku vaivai mo manavasi‘i, pea lahi ‘eku tailiili.

⁴Pea ko ‘eku akonaki, kae‘uma‘ā ‘eku malanga, na‘e ‘ikai fai‘aki ‘a e ngaahi lea fakaoleole ‘o e poto; ka na‘e fai‘aki ‘a e fakamo‘oni ‘e he Laumālie mo e Māfimafi;

⁵koe‘uhi ke ‘oua na‘a tu‘u ho‘omou lotu ‘i he poto ‘o e tangata, ka ‘i he māfimafi ‘o e ‘Otua.

⁶Ka ‘oku ‘i ai ha poto ‘oku mau lea ki ai ‘i he fai kiate kinautolu ‘oku matu‘otu‘a. Ka ko ha poto ia ‘oku ‘ikai fakaemaama ko eni, ‘uma‘ā ha‘ane fakaehou‘eiki ‘o e maama ko eni, ‘a kinautolu ‘oku fakatau ke noa.

⁷Ka ko e me‘a ‘oku mau lea fakamisiteli ki ai, ko e poto ‘o e ‘Otua, ‘a ia ne fakafufū, ‘a ia foki na‘e sinaki teuteu ‘e he ‘Otua ‘i he te‘eki ha kuonga mo‘otau fakalāngilangi‘i:

⁸ka ko e me‘a kuo te‘eki ke lave‘i ‘e ha taha ‘o e hou‘eiki fakaemaama ko eni: he ka ne nau lave‘i ia, tala‘ehai ne nau kalusefai ‘a e ‘Eiki ‘oku ‘a‘ana ‘a e lāngilangi.

⁹Ka na‘e mo‘oni pē ‘a e lau ‘a e Tohi, Ko e ngaahi me‘a kuo ‘ikai mātā ‘e ha mata, pe fanongoa ‘e ha telinga, pe ake ki he loto ‘o ha tangata; ‘io, ‘a e ngaahi fu‘u me‘a kuo teuteu ‘e he ‘Otua ma‘a e kakai ‘oku ‘ofa kiate ia —

¹⁰ka[3] ko e ngaahi me‘a ko ia, kuo faka‘ilo ‘e he ‘Otua kiate kimautolu ‘i hono Laumālie: he ko e Laumālie ‘oku ne hakule ‘a e me‘a kotoa pē, ‘io, ‘a e ngaahi loloto ‘o e ‘Otua.

¹¹He ko e fe‘ia ha tangata ‘oku ne ‘ilo ‘a e ngaahi me‘a ‘a ha tangata? ngata pē ‘i he laumālie ‘o e tangata, ‘a e laumālie ‘oku ‘i he toko taha ko ia. Pehē foki, kuo ‘ikai lave‘i ‘e ha taha ‘a e ngaahi me‘a ‘a e ‘Otua, ngata pē ‘i he Laumālie ‘o e ‘Otua.

¹²Pea tala‘ehai ko e laumālie ‘oku ‘o māmani kuo mau ma‘u, ka ko e Laumālie ‘oku ha‘u mei he ‘Otua; koe‘uhi ke mau ‘ilo ‘a e ngaahi me‘a kuo me‘a‘ofa ‘aki mai ‘e he ‘Otua.

¹³‘A ia ‘oku mau fakamatala foki ki ai; kae ‘ikai ‘i he ngaahi lea ‘oku ako mai ‘e he poto ‘o e tangata, ka ko ia ‘oku ako mai ‘e he Laumālie; ‘o mau faka‘uhinga ‘a e me‘a fakalaumālie ki he kau fakalaumālie.[4]

¹⁴Ka ko e tangata ‘oku anga fakakakano ‘oku ‘ikai te ne tali ‘a e ngaahi me‘a ‘o e Laumālie ‘o e ‘Otua: seuke, ko e koto vale ia kiate ia; pea ‘oku ‘ikai te ne ala tali, koe‘uhi ‘oku fakalaumālie hono ‘ilo‘i.

¹⁵Ka ko ia ‘oku anga fakalaumālie ‘oku alaisia alaikolonga ‘ene fakaanga; ka tala‘ehai ‘oku fakaanga ki he toko taha ko ia ‘e ha taha kehe.

¹⁶He hono ai ha taha kuo ne a‘usia ‘a e finangalo ‘o e ‘Eiki, koe‘uhi ke ne fale‘i ia?: pea ‘oku ‘iate kimautolu ‘a e finangalo ‘o Kalaisi.