Read KO E TOH TAPU KATOA TONGA Kolinitō 1 3 Bible Online

Kolinitō 1 3 - KO E TOH TAPU KATOA TONGA bible

Kolinitō 1 3

¹PEHĒ foki, kāinga, na‘e ‘ikai te u lava ke lea kiate kimoutolu, ‘o hangē ki ha kau fakalaumālie; kae hangē pē ki ha kakai na‘e kakano ‘atā; ‘io, ‘o hangē ha kau valevale ‘ia Kalaisi Sīsū.

²Ko e hu‘akau ia na‘a ku fafanga ‘aki kimoutolu, na‘e ‘ikai ko e me‘akai mālohi: he kuo te‘eki ke mou makalohi. ‘Io, na‘a mo ‘eni kuo te‘eki ke mou maka lohi: he ‘oku mou kei fakakakano.

³Seuke, he kapau leva ‘oku ‘iate kimoutolu ‘a e meheka mo e fetu‘usi, ‘ikai ‘oku mou fakakakano, pea laka fakaetangata pē?

⁴He ka lau ‘e hamou taha, ‘Oku ‘o Paula au; kae pehē ‘e ha taha kehe, ‘Oku ‘o ‘Āpolosi au; ‘ikai ko ho‘omou fakaetangata pē?

⁵Pea ko e hā ai ‘a ‘Āpolosi? Pea ko e hā ai ‘a Paula? Ko e ongo sevāniti pē, ‘a ia na‘e fou ai ho‘omou lotu; pea na‘a mo ia, ko ‘ena ‘ange pē kiate kimoutolu takitaha, ‘o fakatatau ki he me‘a kuo ‘omi ‘e he ‘Eiki.

⁶Na‘e ‘a‘aku ‘a e tō, na‘e ‘a ‘Āpolosi ‘a e fakaviviku; kae ‘a e ‘Otua ai pē ‘a e fakatupu.

⁷Ko ia, tala‘ehai ko ha me‘a ia ‘a ia ‘oku fai ‘a e tō, pe ko ia ‘oku fai ‘a e fakaviviku; ka ko ia pē ‘oku fakatupu, ‘a ia ko e ‘Otua.

⁸Pea ko eni, ko e tō mo e fakaviviku ‘oku na fa‘ahinga, ka ‘e ma‘u takitaha ‘ene totongi ‘a‘ana, ‘o fakatatau ki he‘ene kikivi ‘a‘ana.

⁹He ko e ongo kaungā ngaue kimaua mo e ‘Otua: ko kimoutolu ko e ngoue‘anga ‘a e ‘Otua, ko e fale ‘o e ‘Otua ‘oku langa.

¹⁰Ko au, ‘i he‘eku fai‘aki ‘a e kelesi ‘a e ‘Otua na‘a ne ‘omi, ne u ‘ai ‘a e makatu‘unga, ‘o taau mo ha tufunga poto, ka ko e langa hake ‘oku fai ‘e ha taha kehe. Ka ke takitaha tokanga ki he anga ‘o ‘ene langa.

¹¹He ko e me‘a ki he maka tu‘unga, tala‘ehai ‘e lava ‘e ha taha ke ‘ai mo ha tu‘unga kehe, ka ko ia pē ne toka ‘ai, ‘a ia ko Sīsū Kalaisi.

¹²Pea ka fai ‘e ha taha ‘ene langa ‘i he tu‘unga ko ia, ‘o ne langa koula, siliva, maka mahu‘inga, ‘akau, musie, pe veve;

¹³‘e faifai pea e‘a ‘a e ngāue ‘a e tangata takitaha: he ‘e sivi ia ‘e he ‘Aho Lahi, koe‘uhi ko ‘ene hoko mai mo e afi; pea ‘e sivi ‘e he afi ko ia ‘a e ngāue ‘a e tangata takitaha, pe kuo fēfē.

¹⁴Kapau ‘e tu‘u ‘a e ngafa ‘a ha taha ‘i he langa fale, te ne ma‘u totongi.

¹⁵Kapau ‘e vela ‘o ‘auha ‘ene ngafa me‘a, ‘e mole ‘ene totongi, ka te ne hao ‘e ia; kae hangē ha hao mei he loto afi.

¹⁶‘Oku ‘ikai te mou ‘ilo koā ko e temipale ‘o e ‘Otua ‘a kimoutolu, pea ‘oku fale ‘iate kimoutolu ‘e he Laumālie ‘o e ‘Otua?

¹⁷Ka maumau ‘e ha taha ‘a e temipale ‘o e ‘Otua, ‘e maumau ‘e he ‘Otua ‘a e toko taha ko ia; he ko e temipale ‘o e ‘Otua ‘oku toputapu; pehē foki mo kimoutolu.

¹⁸Ke ‘oua na‘a kākaa‘i ha taha ‘e ia. Ka ai ha taha ‘oku ne ‘afungi ko e poto ia ‘iate kimoutolu faka-e-maama ko eni, ke ne hoko mu‘a ko e vale, ka ne toki poto.

¹⁹He ko e poto ‘o e maama ko eni, ko e koto vale ia ‘i he vakai ‘a e ‘Otua. He kuo tohi, ‘Oku ne pō ‘a e kau poto ‘i he fai olopoto ‘anautolu.

²⁰Pea ko e potu tohi ‘e taha ‘oku pehē, Ko e me‘a ‘a e ‘Eiki ki he ngaahi fifili ‘a e kau poto, Ko e koto launoa ia.

²¹Ko ia, ke ‘oua na‘a vīkiviki ‘e ha taha ‘i ha tangata, he ko ho‘omou me‘a ‘a e me‘a kotoa pē —

²²‘a Paula, ‘a ‘Āpolosi, ‘a Kīfasi; ‘a e māmani, ‘a e mo‘ui, ‘a e mate; ‘a e ngaahi me‘a ‘oku lolotonga ni, ‘a e ngaahi me‘a ka hoko mai; ‘io, ko e me‘a kotoa pē ‘oku ‘amoutolu:

²³ka ko kimoutolu ko e me‘a ‘a Kalaisi, pea ko Kalaisi ko e me‘a ‘a e ‘OTUA.