Read KO E TOH TAPU KATOA TONGA Kolinitō 1 5 Bible Online

Kolinitō 1 5 - KO E TOH TAPU KATOA TONGA bible

Kolinitō 1 5

¹TĀ ‘oku kātaki pē ‘a e fe‘auaki ‘iate kimoutolu, kae‘uma‘ā ko e fe‘auaki ‘oku taha ‘ana, na‘a mo e hīteni ‘e ‘ikai te nau kātaki ha me‘a pehē, ‘a ia ko e mali ‘e ha tangata mo ha fefine ‘oku nonofo mo ‘ene tamai.

²Ka mou fai ai pē ho‘omou ‘afungi na; ka na‘a mou mei fakamamahi mu‘a, kae iku ki he kapusi meiate kimoutolu ‘a e tangata kuo ne fai ha ngāue pehē.

³Ka ko e me‘a kiate au, seuke, neongo ‘oku mama‘o hoku sino, ka ‘oku ‘ikai mama‘o hoku loto: pea kuo u fakamaau ‘a e me‘a, ‘o hangē kuo u ‘i hena. Pea ko ‘eku tu‘utu‘uni ‘eni ki he siana kuo ne fai ha fu‘u me‘a pango pehē —

⁴‘I HE HUAFA ‘O HOTAU ‘EIKI KO SĪSŪ. Ke mou fai ho‘omou fakataha, pea ‘e ‘iate kimoutolu hoku loto, kuo ma‘u ‘a e ivi ‘o hotau ‘Eiki ko Sīsū Kalaisi;

⁵pea ‘e tukuange ‘a e toko taha pehē kia Sētane; koe‘uhi ke faka‘auha hono anga kakano, hei‘ilo ‘e haofaki hono anga Laumālie ‘i he ‘aho ‘o e ‘Eiki.

⁶‘Oku ‘ikai sia‘a ‘a e me‘a ‘oku mou pōlepole ai. ‘Ikai ‘oku mou ‘ilo, ka lave ha me‘i lēvani ki he takaonga mā, tā ‘oku lēvani hono kotoa?

⁷‘Ē, mou tafi kitu‘a ‘a e lēvani mu‘a, ka mou hoko ko e takaonga ngaohi fo‘ou; ‘o taau mo homou tu‘unga, ko e ngaahi fo‘i mā ta‘elēvani; pea ‘āsili he kuo feia foki hotau Pāsova, ko Kalaisi:

⁸ko ia ke tau fai ‘a e kātoanga; kae‘oua na‘a tau fai‘aki ‘a e lēvani mu‘a, ‘uma‘ā ‘a e lēvani ko e loto kovi mo e ngāue pango; ka tau fai‘aki ‘a e me‘a ta‘elēvani, ko e ma‘a mo e mo‘oni.

⁹Ne u tohi atu ‘i he‘eku ‘ipiseli, ke ‘oua te mou fe‘iloaki mo e kakai ‘oku fe‘auaki.

¹⁰Ka na‘e ‘ikai ko e ta‘ofi ‘aupito mei he fe‘iloaki mo e kakai fakamaama ‘oku fe‘auaki, pe ‘oku mānumanu mo fai fakamālohi, pe ‘oku lotu ki he ‘aitoli: he ka ne ko ‘eku tu‘utu‘uni ia, tā ko e hiki mei māmani ‘e fai.

¹¹Ka ko eni pē ‘a e me‘a na‘a ku tohi atu: ka ai ha toko taha ‘i he kau lotu ‘oku fe‘auaki, pe mānumanu, pe lotu ki he ‘aitoli, pe kapekape, pe fa‘a konā, pe fai fakamālohi, ke ‘oua te mou fe‘iloaki mo ha toko taha pehē, ‘io, pea ‘oua na‘a keinanga mo ia.

¹²He ko ‘eku me‘a ke fakamaau ‘a e kakai ‘o tua‘ā? ‘ikai ko e kakai ‘o loto‘ā pē ‘oku ‘amoutolu hono fakamāu‘i? ka ko e kakai ‘o tua‘ā ‘oku ‘i he ‘Otua ia.

¹³Kehe pē ke mou kapusi ‘a e tangata fai kovi meiate kimoutolu.