Read KO E TOH TAPU KATOA TONGA Kolinitō 1 6 Bible Online

Kolinitō 1 6 - KO E TOH TAPU KATOA TONGA bible

Kolinitō 1 6

¹UOI! ‘oku ‘i ai koā hamou toko taha ‘oku pehē fau ‘ene fiematamu‘a, ke ‘ave ‘ene me‘a mo ha taha ‘o fakamonū ki he fa‘ahinga ta‘efaitotonu, ‘o ‘ikai fakamaau ki he kakai lotu?

²Tā ‘oku ‘ikai te mou ‘ilo ‘apē ‘e fakamaau ‘a māmani ‘e he kakai lotu? ‘Io, pea kapau ‘e fakamaau ‘a māmani ‘i homou ‘ao, ‘oku mou ta‘etaau koā ke fai ha fanga ki‘i fakamaau pehē?

³‘Ikai ‘oku mou ‘ilo ‘e ‘ataua ‘a e fakamaau ‘o ha kau ‘āngelo? Huanoa ha ngaahi me‘a fakamaama?

⁴Pea ka ‘oku pehē, pea kapau ‘oku ‘i ai ha‘amou me‘a fakamaama ke fakamaau, pea ko hai fua ha ni‘ihi ‘i he siasi ‘oku ta‘etoka‘i, ‘ē, fakanofo kinautolu ki ai.

⁵‘Oku ou lea pehē ko homou fakamaa‘i. He ‘oku pehē koā ho‘omou masiva kakai poto? ‘Oku ‘ikai koā ha taha te ne lava ke fakamaau ‘a e me‘a ‘a si‘ono tokoua lotu?

⁶Ka ko eni ‘oku tala hopo ‘a e tangata lotu ki hono tokoua lotu, kae‘uma‘ā ko e pehē ke fakamaau ki ha ni‘ihi ‘oku ‘ikai lotu.

⁷Seuke, ko e ‘i ai ha momo‘i lau fakamaau ‘iate kimoutolu, ko e mātu‘aki holomui ‘ata ‘atā ia. Ko e hā ‘oku ‘ikai ai te mou fie kātaki mu‘a ‘a e ngāue ta‘etotonu kuo fai mai? Ko e hā ‘oku ‘ikai te mou fie kātaki ai mu‘a homou fakamālohia?

⁸Ka ko eni ko kimoutolu ia ‘oku ngāue ta‘etotonu, mo fai fakamālohi, pea ko e fai ia foki ki homou ngaahi tokoua.

⁹Tā ‘oku ‘ikai te mou ‘ilo ‘apē, ka ‘ilonga ha ni‘ihi ‘oku ngāue ta‘etotonu, ‘e ‘ikai hanau tofi‘a ‘i he Pule‘anga ‘o e ‘Otua? ‘Oua na‘a tuku ke kākaa‘i kimoutolu: ‘oku ‘ikai ha fe‘auaki, pe ha lotu ki he ‘aitoli, pe ha tono ‘unoho, pe ha mo‘ui fakapelepele, pe ha fai faka-Sōtoma,

¹⁰pe ha kaiha‘a, pe ha mānumanu, pe ha fa‘a konā, pe ha kapekape, pe ha fai fakamālohi, te ne ma‘u tofi‘a ‘i he Pule‘anga ‘o e ‘Otua.

¹¹Pea na‘e pehē ‘a homou ni‘ihi: ka na‘a mou fufulu kimoutolu, ka na‘e fakaului kimoutolu ki he fa‘ahinga tapu, ka na‘e ngaohi kimoutolu ko e kau angatonu ‘i he huafa ‘o e ‘Eiki ko Sīsū Kalaisi, pea ‘aki ‘a e Laumālie ‘o hotau ‘Otua.

¹²Ko e me‘a kotoa pē ‘oku ngofua kia kita, ka ‘oku ‘ikai ‘aonga kotoa pē: pea ‘oku ‘a‘ata ke fa‘iteliha ki he me‘a kotoa pē, ka ‘e ‘ikai te te tuku ke fa‘iteliha ha me‘a ‘e taha kiate kita.

¹³Ko e ngaahi me‘akai ‘oku ma‘a e fatu, pea ko e fatu ‘oku ma‘a e ngaahi me‘akai; pea ‘e fakata‘e‘aonga ‘e he ‘Otua ‘a ē mo ē. Ka ko e sino ‘oku ‘ikai ma‘a e fe‘auaki, ka ‘oku ma‘a e ‘Eiki; pea ko e ‘Eiki ‘oku ma‘a e sino.

¹⁴Pea na‘e fakatoetu‘u ‘e he ‘Otua ‘a e ‘Eiki, pea te ne fakatoetu‘u foki ‘a kitaua ‘i he māfimafi ‘a‘ana.

¹⁵‘Ikai ‘oku mou ‘ilo, ko homou ngaahi sino, ko e ngaahi kupu ia ‘o Kalaisi? Pea ka ko ia, pea u hae koā ‘a e ngaahi kupu ‘o Kalaisi, ‘o u ‘ai ko ha ngaahi kupu ‘o ha fe‘auaki? Molekemama‘o!

¹⁶‘Io, ‘oku ‘ikai te mou ‘ilo koā, ko ia ‘oku pīkitai ki ha fe‘auaki ‘oku ne fo‘i sino pē mo ia? he ‘oku ne folofola mai, ‘E hoko ‘a e toko ua ko e kakano pē ‘e taha.

¹⁷Pea ko ia ‘oku ne pīkitai ki he ‘Eiki ‘oku ne fo‘i laumālie pē mo ia.

¹⁸‘Ē, hola pē mei he fai fe‘auaki. Ko e fa‘ahinga angahala kehekehe ‘oku fai ‘e ha tangata, ‘oku ‘i tu‘a sino ia; ka ko ia ‘oku ne fe‘auaki ‘oku ‘asi tonu ‘ene angahala ‘i hono sino ‘o‘ona.

¹⁹‘Io, ‘oku ‘ikai te mou ‘ilo koā ko homou sino takitaha ko e temipale ‘o e ‘afio ‘a e Laumālie Mā‘oni‘oni ‘iate kimoutolu, ‘a ia kuo hoko kiate kimoutolu mei he ‘Otua? pea ‘oku ‘ikai ‘amoutolu ‘a kimoutolu?

²⁰He na‘e fakatau kimoutolu ‘aki ha totongi. ‘Ē, mou fakaongoongolelei ‘a e ‘Otua ‘i ho‘omou me‘a fakasino.