Read KO E TOH TAPU KATOA TONGA Kolinitō 1 7 Bible Online

Kolinitō 1 7 - KO E TOH TAPU KATOA TONGA bible

Kolinitō 1 7

¹KA koe‘uhi ko e ngaahi me‘a na‘a mou tohi ki ai — ‘Oku lelei ki ha tangata ke ‘oua ‘e ala ki ha fefine.[5]

²Ka ko e me‘a ‘i he lahi ‘o e fe‘auaki, ke takitaha ma‘u hano uaifi ‘o‘ona, pea ma‘u takitaha foki ‘e he fefine hono husepāniti totonu.

³Ke fai ange ‘e he husepāniti ki hono uaifi ‘a e tō‘onga totonu; pea pehē foki ‘a e uaifi ki hono husepāniti.

⁴‘Oku ‘ikai ‘a e uaifi ke fa‘iteliha ki hono sino ‘o‘ona, ka ko hono husepāniti pē: pehē foki, ‘oku ‘ikai ‘a e husepāniti ke fa‘iteliha ki hono sino ‘o‘ona, ka ko hono uaifi.

⁵‘Oua te mo māvae; ngata pē nai ‘i ha‘amo loto taha ke fai, ‘o fuoloa si‘i pē, koe‘uhi ke mou ‘ata‘atā ke fai ha lotu: pea mo toe fakataha, telia na‘a ‘ahi‘ahi kimoutolu ‘e Sētane ‘i ho‘omou ta‘efa‘a kātaki.

⁶Ka ko ‘eku lea pehē ko ‘eku fakangofua pē, ‘oku ‘ikai ko ‘eku fekau ke fai.

⁷‘Oku te ‘amusia ange pē ke tatau ‘a e kakai kotoa pē pea mo au: ka ‘oku takitaha ma‘ana ‘ene kelesi kuo ne ma‘u mei he ‘Eiki; ko e toko taha ‘a ē, ko e toko taha ko ē.

⁸Pea ko ‘eku lea ē ki he kau ta‘emali mo e kau fefine uitou: ‘Oku lelei kiate kinautolu ke nau nofo pē ‘o hangē ko au.

⁹Ka ‘o kapau ‘oku ‘ikai te nau makātaki, tuku ke nau mali, he ‘oku lelei hake ‘a e mali ‘i he‘ene ‘i ai ‘a e afi.

¹⁰Ka ki he kakai kuo mali ‘oku ou tu‘utu‘uni — ka tala‘ehai ko au pē, ka ko e tu‘utu‘uni ‘a e ‘Eiki — ke ‘oua na‘a māvae ‘a e fefine mo hono husepāniti:

¹¹(ka ‘o kapau kuo fai ‘a e māvae, ke ne nofo ta‘emali, pe ke ne fakalelei mo hono husepāniti) pea ke ‘oua na‘a tukuange ‘e he husepāniti hono uaifi.

¹²Ka ko e me‘a ki hono toe ‘o e kakai, ‘oku ‘ikai ha folofola ‘a e ‘Eiki ki ai: ka ‘oku ou pehē ‘e au, ka ai ha tangata lotu ne mali mo ha fefine ta‘elotu, pea ‘oku loto lelei pē ‘a e fefine ke fai hona ‘api, ‘e ‘ikai te ne tuku ange ‘a e fefine.

¹³Pea ko e fefine ne mali mo ha tangata ta‘elotu, pea ‘oku loto lelei pē ‘a e tangata ke fai hona ‘api, ‘e ‘ikai te ne tukuange hono husepāniti.

¹⁴He kuo fakakau ki he fa‘ahinga tapu ‘a e tangata ta‘elotu koe‘uhi ko hono uaifi; pea kuo fakakau ki he fa‘ahinga tapu ‘a e uaifi ta‘elotu koe‘uhi ko e lotu hono husepāniti: he ka ne ta‘e‘oua ia, pehē ‘e ta‘etapu ho‘omou fānau; ka ko eni ‘oku nau ‘i he fa‘ahinga tapu.

¹⁵Ka ‘o kapau ‘oku lau māvae ‘e ia ‘oku ta‘elotu, tuku ke māvae. ‘Oka pehē ha me‘a, ‘oku ‘ikai ke ha‘isia ha tangata lotu, pe ha fefine lotu: ka kuo ui kitaua ‘e he ‘Eiki ki he nofo vālelei.

¹⁶(He ‘oku ke ‘ilo fēfē, ‘e fefine, te ke lava ‘a e fakamo‘ui ‘o ho husepāniti?[6] pea ‘oku ke ‘ilo fēfē, ‘e tangata, te ke lava ‘a e fakamo‘ui ‘o ho uaifí?)[7]

¹⁷Ka neongo ia, ka ‘ilonga pē ‘a e tufakanga ‘o e tangata takitaha mei he ‘Eiki, ‘ilonga pē ‘a e ‘alunga na‘a ne ‘i ai ‘i hono fakaului ‘e he ‘Otua, ke ne fai‘aki pē ia. Pea ko ‘eku tu‘utu‘uni ia ‘i he siasi kotoa pē.

¹⁸Ka kuo fakaului ha taha kuo kamu, ke ‘oua na‘a ne ‘ufi‘ufi; ka kuo fakaului ha taha kuo ta‘ekamu, ke ‘oua te ne kamu.

¹⁹Tala‘ehai ko ha me‘a ‘a e kamu, pea tala‘ehai ko ha me‘a ‘a e ta‘ekamu, ka ko e tauhi pē ‘o e ngaahi tu‘utu‘uni ‘a e ‘Otua.

²⁰‘Ilonga ‘a e ‘alunga ‘o e tangata takitaha na‘e fakaului mei ai, ke ne nofo pē ‘i he ‘alunga ko ia.

²¹Kapau na‘e fakaului koe ‘oku ke pōpula, ‘oua na‘a ke hoha‘a ai: kehe, neongo te ke lava ke ke tau‘atāina, ‘ē, ngāue‘aki pē mu‘a ho‘o pōpula na.[8]

²²He ko ia kuo ului ki he ‘Eiki, neongo ko e pōpula, ka ko e tau‘atāina ia ‘a e ‘Eiki: pehē foki, ko e tau‘atāina kuo ului ko e pōpula ia ‘a Kalaisi.

²³Na‘e ai ha totongi na‘e fakatau ‘aki kimoutolu; ‘oua te mou hoko ko e pōpula ‘a e kakai.

²⁴Kāinga lotu, ‘ilonga ‘a e ‘alunga na‘e ului mei ai ha taha, ke ne fai ai pē ‘ene fakafeangai ki he ‘Otua ‘i he ‘alunga pē ko ia.

²⁵Pea ki he kau finemui, ‘oku ‘ikai te u ma‘u ha tu‘utu‘uni ‘a e ‘Eiki, ka ‘oku ou ‘atu ‘eku fakakaukau, he ko e taha au tokua kuo ‘ofa ‘a e ‘Eiki ‘o tuku ko e toko taha ke falala‘anga.

²⁶Ko ia, ‘oku ou pehē ‘e au, ko hono lelei, ko e me‘a ‘i he faingata‘a ‘oku lolotonga ni — ko hono lelei ke nofo ai pē ha taha ‘i he me‘a ‘oku ne ‘i ai.

²⁷Ka ‘oku ke alafianga ki ha fefine, ‘oua te ke kumi ha vete. Ka ‘oku ke ‘ata‘atā mei ha fefine, ‘oua te ke kumi ha uaifi.

²⁸Ka neongo ia, ka ‘o kapau te ke mali, tala‘ehai ko ho‘o angahala: pea kapau ‘e mali ha finemui, tala‘ehai kuo ne angahala ai. Ka ko e fa‘ahinga ko ia ‘e ai ha fakamamahi ‘e tō ki he‘enau mo‘ui; pea ko si‘eku ma‘ema‘ekina kimoutolu.

²⁹Ka ko ‘eku tala atu ‘eni, kāinga, Kuo fakanounou ‘a e kuonga, koe‘uhi ‘i he taimi ‘oku toe, ke ‘ilonga ‘a e ma‘u uaifi, ke nau hangē ‘oku ‘ikai te nau ma‘u;

³⁰pea ko kinautolu ‘oku tangi, ke nau hangē ‘oku ‘ikai te nau tangi; pea ko kinautolu ‘oku fiefia, ke nau hangē ‘oku ‘ikai te nau fiefia; pea ko kinautolu ‘oku fakatau mai ha me‘a, ke nau hangē ‘oku ‘ikai ko ‘enau me‘a;

³¹pea ko kinautolu ‘oku ngāue‘aki ‘a māmani, ke hangē ‘oku ‘ikai ko ‘enau me‘a ke ‘osiki: he kuo kamata liliu ‘a e anga ‘o e maama ko eni.

³²Pea ko si‘eku feinga ke ‘oua te mou loto mo‘ua. ‘Oku mo‘ua ‘a e loto ‘o e tangata ta‘ema‘u uaifi ‘i he ngaahi me‘a ‘a e ‘Eiki, he‘ene feinga ke hōhō‘ia ‘a e finangalo ‘o e ‘Eiki:

³³ka ko e tangata fakauaifi ‘oku mo‘ua hono loto ‘i he me‘a ‘o māmani, he‘ene feinga ke hōhō‘ia hono uaifi; pea fetohoaki ai hono loto.

³⁴Pea ko e fefine ta‘emali, pe ko e finemui, ‘oku mo‘ua hono loto ‘i he ngaahi me‘a ‘a e ‘Eiki, koe‘uhi ke mā‘oni‘oni hono sino mo hono laumālie fakatou‘osi: ka ko e fefine kuo mali ‘oku mo‘ua hono loto ‘i he me‘a ‘o māmani, he‘ene feinga ke hōhō‘ia hono husepāniti.

³⁵Ka ‘oku ou lea pehē ko e tala mo‘ou; ‘oku ‘ikai ko ha‘aku lafo ha tauhele kiate kimoutolu, ka koe‘uhi ke lava ‘a e me‘a ‘oku taau mo e fakafe‘ao lelei ki he ‘Eiki ta‘eha fehākaaki.

³⁶Ka ‘oka hā ki ha motu‘a ‘oku ta‘engali ‘ene tu‘utu‘uni ki he‘ene ki‘i fefine, koe‘uhi nai kuo tauhili mo ‘ene finemui, pea ka ko ha me‘a ‘oku fepauaki; pea ke fai ‘e he motu‘a ‘a e me‘a ‘oku ne tokanga ki ai, ‘o ne tuku ke mali ‘a e ongo me‘a: tala‘ehai ko ‘ene angahala.[9]

³⁷Ka ko e motu‘a ‘oku ‘ikai ke tālakitu‘a hono loto, pea ‘oku ‘ikai ha faingata‘a, ka ‘oku ne ‘ata‘atā ke fai ‘a e me‘a ‘oku ne tokanga ki ai; pea ka kuo ne tu‘utu‘uni ‘i hono loto ‘o‘ona, ‘o pehē, te ne ta‘ofi ‘ene ki‘i fefine: ‘e lelei ‘ene fai pehē.[10]

³⁸Ko ia, ‘ilonga ‘a ia ‘oku ne fakamali ‘ene ki‘i fefine, ‘oku ne fai lelei; pea ko ia ‘oku ne ta‘ofi mei he mali, ‘e lelei foki ‘ene ngāue, ‘io, ko e lelei lahi ia.[11]

³⁹‘Oku ha‘isia ‘a e finemotu‘a lolotonga ‘oku mo‘ui hono husepāniti: ka ‘o kapau kuo mohe ‘a e husepāniti, ‘oku ne ‘ata‘atā ke mali mo ha toko taha ‘oku ne loto ki ai; kaekehe ko e toko taha kuo lotu.

⁴⁰Ka ko hono monū‘ia lahi ē, ‘o kapau te ne nofo ai pē. Ko ha‘aku ia fakakaukau: pea ‘oku te pehē ‘oku ‘iate kita foki ‘a e Laumālie ‘o e ‘Otua.