Read KO E TOH TAPU KATOA TONGA Kolinitō 2 13 Bible Online

Kolinitō 2 13 - KO E TOH TAPU KATOA TONGA bible

Kolinitō 2 13

¹KO ‘eku ‘alu atu ‘eni mōku tu‘o tolu “Ilonga ha me‘a, ‘e fakapapau ki ai ‘i ha fakamo‘oni ‘a ha toko ua, kae‘uma‘ā ha toko tolu.”

²Na‘a ku sinaki tala mu‘a, pea ‘oku ou sinaki tala ‘eni — hangē ko ‘eku lea ‘i he‘eku ‘a‘ahi atu ko hono tu‘o ua, pehē mo ‘eku lea ko eni ‘i he‘eku kei mama‘o — ‘oku ou tala kiate kimoutolu ‘oku taukave ho‘omou angahala mu‘a, pea ki homou toe kātoa.

³‘E ‘ikai te u fakama‘uma‘u ‘i he‘eku ‘alu atu ka fai ni: ko e me‘a ‘i ho‘omou tangi ki ha fakamo‘oni ‘o e lea ‘a Kalaisi ‘iate au. Tala‘ehai ko ha ngali vaivai ia ‘i he fai atu, kaekehe ‘oku ne ngāue mālohi ‘iate kimoutolu.

⁴Seuke, ‘oku mo‘oni na‘e kalusefai ia ko ‘ene vaivai, ka ‘oku ne mo‘ui ko ‘ene mālohi mei he ‘Otua; pea ‘oku mo‘oni ‘oku mau vaivai fakataha mo ia, ka te mau mo‘ui fakataha mo ia ‘i he fai kiate kimoutolu, ko ‘emau mālohi mei he ‘Otua.

⁵‘Ē, mou sivi mu‘a kimoutolu, pe ‘oku mou lotu mo‘oni; ‘eke fakamo‘oni meiate kimoutolu. ‘Io, na‘a ‘oku ‘ikai te mou ongona ‘a e ‘iate kimoutolu ‘a Sīsū Kalaisi; ka na‘a ko e kau ta‘e-ha-fakamo‘oni kimoutolu.

⁶Ka ‘oku te pehē te mou ‘ilo ‘oku ‘ikai ko e kau ta‘e-ha-fakamo‘oni ‘a kimautolu.

⁷Ka ‘oku mau hū ki he ‘Otua ke ‘oua ‘aupito te mou fai ha kovi; ‘o ‘ikai te mau lotu ke hā ‘emau mo‘oni, ka ke fai lelei ‘e kimoutolu, ka mau nofo ‘o hangē ‘oku ‘ikai ha‘amau fakamo‘oni.

⁸He ‘oku ‘ikai te mau mālohi ke fai ha me‘a ki he totonu, ka ke kauhaki‘i ‘a e totonu.

⁹Seuke, ko ‘emau toki fiefia ē, ‘i ha‘amau vaivai ka mou mālohi: pea ko e me‘a ko eni ‘oku mau lotua, ‘io, ‘a ho‘omou toe ma‘opo‘opo lelei.

¹⁰Ko hono ‘uhinga ia ‘oku ou tohi pehē ai kei mama‘o; telia na‘a ku fai māsila ‘i he‘eku ‘iate kimoutolu, ‘i he‘eku ngāue‘aki ‘eku pule, ‘a ia na‘e tuku ‘e he ‘Eiki kiate au ke fai‘aki ha langa hake, ‘o ‘ikai ha holoki hifo.

¹¹Ko ‘eku lea faka‘osi ‘eni, kāinga: mou fiefia pē, mou fakamā‘opo‘opo kimoutolu, tali ‘eku fakafiemālie, mou loto taha, mou nonofo melino; pea ko e ‘Otua ‘o e ‘ofa mo e melino te ne toki kau mo kimoutolu.

¹²Mou fefekita‘aki ‘aki ha ‘uma tapu. ‘Oku ‘ofa atu ‘a e kāinga lotu kotoa pē.

¹³Ko e kelesi ‘a e ‘Eiki ko Sīsū Kalaisi, mo e ‘ofa ‘a e ‘Otua, mo e feohi ‘o e Laumālie Mā‘oni‘oni, ‘ofa ke ‘iate kimoutolu kotoa pē ia.