Read KO E TOH TAPU KATOA TONGA Kolinitō 2 2 Bible Online

Kolinitō 2 2 - KO E TOH TAPU KATOA TONGA bible

Kolinitō 2 2

¹KA ko ‘eku lea ‘eni — ko e ‘Otua ē ke hopo mo hoku loto! — ko hono ‘uhinga ‘o e ‘ikai te u ‘alu atu ki Kolinito, ko ‘eku mamae pē kiate kimoutolu.

²(Ka ‘oku ‘ikai ko ‘eku pehē ‘oku ‘amautolu ke pule ki ho‘omou tui: kaekehe ko e kau tokoni pē kimautolu ki he langa‘i ‘o ho‘omou fiefia. Seuke, ko e me‘a ki he tui ‘oku mou tu‘u.)

³Pea koe‘uhi foki ko au na‘a ku tu‘utu‘uni ai ‘o pehē, ‘E ‘ikai te u toe ‘alu atu ke mamahi. He kapau ‘oku ou fakamamahi‘i kimoutolu, pea ko hai tū ha taha ke fakafiefia‘i au? ‘Ikai ko ia pē kuo mamahi meiate au?

⁴Pea u tohi ‘a e me‘a ko ia, koe‘uhi ke ‘oua na‘a ku ‘alu atu ‘o kai mamahi meiate kinautolu, ‘a kinautolu na‘a ku mei fiefia ai: ko ‘eku falala ko e anga ‘eni ‘amoutolu fuli pē, ka ai ha‘aku fiefia, ko e fiefia ia ‘amoutolu kotoa.

⁵He na‘e fai ‘eku tohi kiate kimoutolu mei hoku loto ne fu‘u mafasia mo feinga, pea fu‘u pani lo‘imata ‘eku ngaahi lea; pea na‘e ‘ikai fai ko homou fakamamahi‘i, ka koe‘uhi ke mou ‘ilo ‘eku ‘ofa, ‘ene hulu atu kiate kimoutolu.

⁶Pea kapau kuo fai fakamamahi ‘e ha taha, ‘oku ‘ikai ko au kuo ne fakamamahi‘i ka ko kimoutolu kotoa — kehe ‘oku mou ongo‘i; he ‘oku ‘ikai te u fie ha‘aki ‘ai ke ne mafasia.

⁷He kuo lahi pē ki ha toko taha pehē ‘a e tautea na‘e fai ‘e homou tokolahi. Ko ia na‘a mou mei angai mu‘a, ‘o fai hono fakamolemole mo hono fakafiemālie, na‘a ‘iloange ‘e fōngia ‘aupito ha toko taha pehē, ‘oka hulu atu ‘ene mamahi.

⁸Ko ia, ‘oku ou enginaki atu ke mou fakapapau ho‘omou ‘ofa kiate ia.

⁹He ko hono ‘uhinga ia foki na‘a ku fai ai ‘eku tohi, ke u ‘ilo ‘a e mo‘onia ‘omoutolu, pe te mou talangofua ‘i he me‘a kotoa pē.

¹⁰Ka ko ia ‘oku mou fakamolemole ni ha me‘a ki ai, ‘oku ou fakamolemole mo au: kae‘uma‘ā ko e fakamolemole ‘a‘aku, ‘o kapau kuo u fakamolemole ha me‘a, kuo u fai ko e fakafofonga ‘o Kalaisi, pea koe‘uhi ko kimoutolu:

¹¹telia na‘a kākaa‘i kitautolu ‘e Sētane, he tala‘ehai ‘oku ‘ufikaua ‘iate kitautolu ‘a e ngaahi fāliunga ‘a e toko taha ko ia.

¹²Pea ko eni, ‘i he‘eku hoko atu ki Taloasi ke malanga‘aki ‘a e Kōsipeli ‘o Kalaisi, pea neongo na‘e fakaava kiate au ha matapā ‘i he ngāue ‘a e ‘Eiki;

¹³ka na‘e ‘ikai manofo ‘a hoku laumālie, ko e ‘ikai te u ‘ilo ai ‘a si‘oku tokoua ko Taitusi: ka na‘a ku fai ‘eku tatau kiate kinautolu, ‘o u ‘alu atu mei ai ki Masitōnia.

¹⁴Pea ko eni, fakafeta‘i ki he ‘Otua, he‘ene sipikaki kimautolu ma‘u ai pē, ko e me‘a ‘ia Kalaisi, mo ne fakataufa atu ‘iate kimautolu ‘i he potu kotoa pē ‘a e nanamu ko e ‘ilo kiate ia.

¹⁵He ko e ngangatu kimautolu ‘o Kalaisi ki he ‘Otua ‘iate kinautolu ‘oku fakatau ki he mo‘ui, mo kinautolu ‘oku fakatau ki mala:

¹⁶ki he fa‘ahinga ko ē ko e nanamu ‘o ha mate, pea iku ki ha mate; ka ki he fa‘ahinga ko ē, ko e nanamu ‘o ha mo‘ui pea iku ki ha mo‘ui. Pea ko hai tū ‘oku fe‘unga mo ha fu‘u me‘a pehē?

¹⁷He tala‘ehai ko ‘emau anga ke hangē ko e tokolahi ke hu‘i ‘a e folofola ‘a e ‘Otua: kaekehe, ko e anga ‘o ‘emau lea ‘ia Kalaisi, ko e lea ‘a ha taha ‘oku loto hanga taha, ko e lea ‘a ha taha ‘oku ha‘u tonu mei he ‘Otua, ko e mātu‘aki lea ‘i he ‘ao ‘o e ‘Otua.