Read KO E TOH TAPU KATOA TONGA Kolinitō 2 5 Bible Online

Kolinitō 2 5 - KO E TOH TAPU KATOA TONGA bible

Kolinitō 2 5

¹‘IO, neongo ‘e veteki homau nofo‘anga fakaemāmani, ‘a ia ko e tēniti pē, ka ‘oku mau ‘ilo kuo ‘i ai ‘i he langi hamau fale langa ‘e he ‘Otua, ko e nofo‘anga na‘e ‘ikai ngaohi nima, ko e me‘a ta‘engata.

²Seuke, lolotonga ‘emau ‘i he tēniti ni ‘oku mau māpuhoi, he‘emau holi ke ‘ai mei tu‘a homau fale tonu mei he langi:

³he ka ‘iloa kitaua, kuo pau tokua kuo ta ‘ai ia, ‘o ‘ikai te ta telefua.

⁴‘Io, ko kimautolu ‘oku ‘i he tēniti ni, ‘oku mau māpuhoi ‘i he‘emau mafasia; ko e me‘a ‘i he ‘ikai te mau loto ke to‘o ia, ka ke ‘omi ‘a e taha ‘o ‘ai mei tu‘a, koe‘uhi ke fōngia hifo ‘a e me‘a mate ni ‘i he mo‘ui.

⁵Pea ko eni, ko ia na‘a ne fai homau teu ki he me‘a ko ia ko e ‘Otua, mo ne tuku mai hono me‘a faka‘amanaki ko e Laumālie.

⁶Ko ia, ‘i he mālohi ai pē ‘emau ‘amanaki, kae‘uma‘ā ‘i he‘emau ‘ilo, ko e lolotonga ‘emau nofo ‘i homau ‘api ki tu‘a ni, ‘a e sino, ‘oku mau mama‘o mo homau ‘api ki ‘ao ki he ‘Eiki;

⁷he ko ‘emau fononga ‘oku fai ‘aki ‘a e tui, ‘o ‘ikai ‘aki ‘a e mamata — ka ‘oku mālohi pē ‘emau ‘amanaki;

⁸‘io, ‘oku lelei mu‘a kiate kimautolu ke mama‘o mo homau ‘api ki tu‘a ni, ‘a e sino, ka mau ‘i homau ‘api ki ‘ao, ‘o feangai mo e ‘Eiki.

⁹Ko ia ai, foki ‘oku mau kakapa ki he me‘a ko eni, pe te mau ‘i he ‘api ko eni, pe te mau mama‘o, kehe pē ke ne hōifua ‘iate kimautolu.

¹⁰He kuo pau ke tau mātu‘aki e‘a kotoa pē ‘i he ‘ao ‘o e fakamāu‘anga ‘o Kalaisi; koe‘uhi ke takitaha ma‘u hono totongi ‘o e ngaahi me‘a na‘a ne fai ‘i he sino, ‘o fakatatau ki he me‘a na‘a ne fai, ‘ene lelei pe kovi.

¹¹Ko ia, neongo ‘emau ongona ‘a e ‘apasia ki he ‘Eiki, ‘oku mau fakatui‘i ‘a e kakai kiate kimautolu; ka kuo loa ‘emau e‘a ki he ‘Otua; ‘io, ‘oku te falala kuo mau e‘a ki he konisēnisi ‘omoutolu foki.

¹²‘Oku ‘ikai ko ‘emau toe sani atu kimautolu ‘eni, ka ko ‘emau ‘atu ha tu‘unga ki ho‘omou vikia kimautolu, koe‘uhi ke mou tali ‘aki kiate kinautolu ‘oku pōlepole ‘i he me‘a ‘oku hā ‘i tu‘a, kae ‘ikai ‘i he me‘a ‘o e loto.

¹³He kapau ‘oku mau sesele, ka ko e fai ma‘a e ‘Otua: pea kapau ‘oku mau fakapotopoto, ka ko e fai ma‘amoutolu.

¹⁴‘Io, ‘oku loki kimautolu ‘e he ‘ofa ‘a Kalaisi; he na‘e pehē ‘emau fakakaukau: na‘e mate ha toko taha ko e fetongi ‘o e kakai kotoa pē: pea tā na‘e mate ai kotoa pē:

¹⁵pea ko ‘ene mate ‘o fetongi ‘a e kakai kotoa pē na‘e fai koe‘uhi ke ‘oua na‘a toe mo‘ui ma‘anautolu ‘a e kakai ‘oku mo‘ui, ka ma‘a e toko taha ko ia, ‘a ia na‘a ne pekia mo toetu‘u ko honau fetongi.

¹⁶Ko ia, talu e me‘a ko ia mo e ‘ikai te mau ‘ilo ha taha ‘o fakaetangata pē; ‘io, neongo kuo mau lave‘i ‘a Kalaisi ‘o fakaetangata, ka ‘oku ‘ikai te mau kei lave‘i pehē.

¹⁷Ko ia foki, kapau ‘oku ‘ia Kalaisi ha taha, ko e mātu‘aki fakatupu fo‘ou ia: kuo mole ‘a e ngaahi me‘a ‘o ono‘aho, uē kuo nau hoko ‘o fo‘ou.

¹⁸Pea ko e ngaahi me‘a kotoa ko ia ‘oku tupu mei he ‘Otua, ‘a ia na‘a ne fai ‘ia Kalaisi ‘a e fakalelei ‘o hono finangalo mo kitautolu, mo ne ‘omi kiate kimautolu ‘a e tala ‘o e fakalelei ko ia:

¹⁹‘o pehē tokua, na‘e fai ai pē ‘e he ‘Otua ‘ia Kalaisi ‘ene fakalelei[4] ‘a māmani mo hono finangalo, ‘o ‘oua te ne lau kiate kinautolu ‘enau ngaahi angahala; pea ne hilifaki kiate kimautolu ‘a e lea ‘o e fakalelei.

²⁰Ko ia, ko e kau fakafofonga kimautolu ‘o Kalaisi; tokua ko e ‘Otua ia ‘oku enginaki ‘iate kimautolu: ko ‘emau kole ‘eni ‘oku fai ko e fetongi ‘o Kalaisi: tuku ke fai homou fakalelei mo e ‘Otua.

²¹Na‘a ne ngaohi ko e koto angahala ‘a e Toko Taha ko ia na‘e ‘ikai te ne ongona ha angahala, koe‘uhi ā ko kitautolu; koe‘uhi ke tau hoko ai ‘iate ia ko e koto mā‘oni‘oni faka‘otua.