Read KO E TOH TAPU KATOA TONGA Kolinitō 2 6 Bible Online

Kolinitō 2 6 - KO E TOH TAPU KATOA TONGA bible

Kolinitō 2 6

¹Kae‘uma‘ā ‘i he‘emau kaungā ngāue mo ia ‘oku mau enginaki foki ke ‘oua na‘a iku ho‘omou tali ‘a e kelesi ‘a e ‘Otua ko e laufanō.

²He ‘oku ne folofola, Ko e taimi tali hū ne u ongo‘i ai ko ē, Ko e ‘aho fai fakamo‘ui ne u tokoni ai koe. Vakai mai, ko eni pē e taimi mātu‘aki tali hū; Vakai mai, ko eni pe ‘aho fai fakamo‘ui.

³Kae‘uma‘ā ‘oku mau tokanga ke ‘oua na‘a ai ha tūkia‘anga ‘e tupu ‘i ha‘amau me‘a, na‘a lau‘i ‘a e lakanga.

⁴Kaekehe ‘oku mau fai ‘a e me‘a ‘oku taau mo e kau sevāniti ‘a e ‘Otua ke fai, ‘oku mau ‘ai ke mau ongolelei ‘i he me‘a kotoa pē — ‘i he fa‘a kātaki, ‘i he fa‘a fetekeekina, ‘i he fa‘a faingata‘a‘ia, ‘i he fa‘a ‘efitu‘ua;

⁵‘i he fa‘a haha, ‘i he fa‘a nofo pilīsone, ‘i he fa‘a ‘ohofia; ‘i he fa‘a ngāue fakaongosia, ‘i he fa‘a ‘ā, ‘i he fa‘a ‘aukai;

⁶he‘emau anga ma‘a, he‘emau poto ‘i he folofola, he‘emau anga mokomoko, he‘emau anga ‘ofa;

⁷he‘emau Laumālie Mā‘oni‘oni‘ia, he‘emau ‘ofa ta‘eloi, he‘emau tala ‘a e mo‘oni, he‘emau ma‘u ivi mei he ‘Otua;

⁸ko ‘emau fai‘aki ‘a e mahafu ‘a e tonuhia ‘i to‘omata‘u mo to‘ohema, ko ‘emau ‘asi atu ‘i he toke‘ia mo e ta‘etoke‘ia, he lau‘ikovia mo e lau‘ileleia;

⁹tokua ko e kau fai kākā mo e kau fai mo‘oni, tokua ko e kau ta‘e‘iloa mo e kau ‘iloa; tokua ‘oku mau tau‘aki, kae uē! ‘oku mau mo‘ui; tokua ko homau tautea ‘oku fai, ka ko eni,

¹⁰‘oku ‘ikai te mau mate; tokua ko e kau toloto ‘i he mamahi, ka ‘oku mau fiefia ma‘u ai pē; tokua ko e kau masiva, ka ‘oku mau fakakoloa ha tokolahi; tokua ko e kau ta‘e-ma‘u-ha-me‘a; ‘osi, ‘oku mau mātu‘aki ma‘u ‘a e me‘a kotoa pē.

¹¹Si‘i kau Kolinitō, kuo fu‘u pu‘aki atu ‘e homau ngutu, kuo fano homau loto.

¹²Ko ho‘omou ‘efi‘efi na ‘oku ‘ikai ‘iate kimautolu, ka ‘oku ‘i he manava ‘omoutolu pē.

¹³‘Ē, ka u lea hangē ki ha fānau, mou tali ‘eku fai‘aki ha fai pehē, ‘o mou fano mo kimoutolu.

¹⁴‘Oua te mou hanga ‘o hoa-‘a-kehe, he nonofo mo e kau ta‘elotu: he ‘e me‘a taha fēfē ‘a e faitotonu mo e malakilao? pe feohi fēfē ‘a e maama mo e po‘uli?

¹⁵‘io, ‘o loto taha fēfē ‘a Kalaisi mo Peliali? Pe ‘inasi fakataha fēfē ‘a e lotu mo e ta‘elotu?

¹⁶‘io, pea fa‘ahi fēfē ‘a e temipale ‘o e ‘Otua mo e ngaahi ‘aitoli? He ko kitautolu ko e temipale ‘o e ‘Otua Mo‘ui; ‘o hangē ko ‘ene folofola ‘a e ‘Otua, ‘o pehē, Te u fale ‘aki kinautolu, te u ‘eve‘eva ‘iate kinautolu, pea te u nofo ko honau ‘Otua, pea te nau nofo ko hoku kakai.

¹⁷Ko ia, mou hiki mei honau lotolotonga, pea mavahe kimoutolu, pea ‘oua te mou ala ki he me‘a ta‘ema‘a; ko e folofola ē ‘a e ‘Eiki —

¹⁸Pea te u ma‘u kimoutolu ‘e au, pea te u nofo atu ma‘amou tamai, pea te mou nofo mai mōku ngaahi foha mōku ngaahi ‘ōfefine — ko e folofola ē ‘a e ‘Eiki Fakaleveleva.

¹⁹Ko ia, si‘oku ‘ofa‘anga, he‘etau ma‘u ha ngaahi palōmesi pehē fau, tau fakama‘a kitautolu mei he ‘uli kotoa pē ‘o e kakano mo e loto, ‘o tau fakakakato ‘etau mā‘oni‘oni ‘i he ‘apasia ki he ‘Otua.