Read KO E TOH TAPU KATOA TONGA Kolinitō 2 7 Bible Online

Kolinitō 2 7 - KO E TOH TAPU KATOA TONGA bible

Kolinitō 2 7

¹Ē, tuku hamau feitu‘u ‘i homou loto: tala‘ehai na‘a mau ngāue ta‘etotonu ki ha taha, tala‘ehai na‘a mau maumau‘i ha taha, tala‘ehai na‘a mau fakahekeheke‘i ha taha.

²‘Oku ‘ikai te u lea pehē ko e valoki: seuke, kuo ‘osi ‘eku fakahā ‘oku mou ‘i homau loto ke mate mo mo‘ui fakataha mo kimoutolu.

³‘Oku lahi ‘ete falala kiate kimoutolu, ‘oku lahi ‘ete pōlepole ‘iate kimoutolu.

⁴Kuo u fonu ngutungutu ‘i he fiemālie na‘e ‘omi; ‘oku hake fu‘u ‘a e fiefia, pea ngalo ai ‘emau ngaahi mamahi kehekehe.

⁵He na‘a mo ‘emau ōmai ki Masitōnia ni, ka na‘e ‘ikai momo‘i manofo homau kakano, ka na‘e tautu‘u mai homau fakamamahi mei he potu kotoa pē: mei tu‘a ko e koto fepaki, mei loto ko e koto hoha‘a.

⁶Ka ko e ‘Otua, ‘a ia ‘oku ne tokoni ai pē kiate kinautolu ‘oku mo‘ulaloa, na‘a ne tokoni‘i kimautolu ‘aki ‘a e lava mai ‘a Taitusi:

⁷‘o ‘ikai ‘aki ‘ene lava mai pē, kae ‘aki ‘a e tokoni foki, ‘a ia ne tokoni ‘aki ia ‘e kimoutolu: he na‘e pehē ‘ene fakamatala kiate kimautolu ho‘omou holi mai, ho‘omou fakamamahi, ho‘omou mamahi‘i au; ko ia na‘e ‘āsili ai ‘eku fiefia.

⁸He neongo na‘a ku fakamamahi‘i kimoutolu ‘aki ‘eku tohi, ‘oku ‘ikai te u tālakitu‘a ‘i he‘eku fai ia, ka ‘oku mo‘oni na‘a ku tālakitu‘a ai.

⁹Neongo na‘e fuonounou, ka ‘oku ou vakai na‘e ‘i ai mo‘oni ho‘omou mamahi ‘i he tohi ko ia; ka ‘oku ou fiefia ‘eni, ‘o ‘ikai pē koe‘uhi ko ho‘omou mamahi, ka koe‘uhi na‘e iku ho‘omou mamahi ki ho‘omou fakatomala: he ko homou fakamamahi na‘e fai ‘i he funga ‘o e finangalo ‘o e ‘Otua, ke ‘oua na‘a ai hamou maumau‘i ‘e hoko ‘i he‘emau ngāue.

¹⁰He ko e mamahi ‘oku faka‘otua hono fai, ‘oku ne langa‘i ha fakatomala ‘oku iku ki ha fakamo‘ui, ‘a ia ‘e ‘ikai tālakitu‘a ai ha taha: ka ko e mamahi ‘oku fakaemāmani ‘oku ne fakatupu mate.

¹¹He vakai ‘a e me‘a na, ‘a ho‘omou mamahi faka‘otua na‘e fai, hono nifi ‘a e feinga na‘e tupu ai ‘iate kimoutolu! kae‘uma‘ā ‘a e faka‘ata‘atā kimoutolu, ‘uma‘ā ‘a e faka‘ise‘isa‘ia, ‘uma‘ā ‘a e manavahē mai, ‘uma‘ā ‘a e holi mai, ‘uma‘ā ‘a e manavakāvakava, ‘uma‘ā ‘a e fai tautea! Kuo mou fai homou tūkuingata ke fakahā ‘oku mou ‘ata‘atā ‘i he me‘a.

¹²‘Āua; he neongo na‘a ku tohi pehē atu, tala‘ehai na‘a ku fai koe‘uhi ko e siana na‘e fai ‘a e kovi, ‘uma‘ā ‘a e tangata na‘e fai ki ai ‘a e kovi; ka koe‘uhi ke e‘a kiate kimoutolu, pea ‘i he ‘ao ‘o e ‘Otua, ‘a e toka homou loto kiate kimautolu.

¹³Ko hono ‘uhinga ia ‘e taha ‘o ‘emau fiemālie na‘e fai: ka na‘e fakalahi ki ai, ‘io, ko e me‘a na‘e fu‘u hulu atu ai ‘emau fiefia, ko e fiefia ‘a Taitusi, koe‘uhi kuo ma‘u nonga hono loto meiate kimoutolu kotoa pē.

¹⁴He ka ai ha‘aku pōlepole ‘iate kimoutolu ne fai kiate ia, ne ‘ikai fakamaa‘i ai au; kaekehe hangē na‘e mo‘oni ‘emau ngaahi lea kehekehe na‘e fai kiate kimoutolu, pehē foki na‘e hā ‘oku mo‘oni mo ‘emau pōlepole na‘e fai ‘i he ‘ao ‘o Taitusi.

¹⁵‘Io, ‘oku ‘āsili ngaue hono fatu kiate kimoutolu ‘i he‘ene fa‘a manatu hake ki he talangofua ‘amoutolu kotoa pē, ‘a ho‘omou tali ia ‘i he ‘apasia mo e tailiili.

¹⁶‘Ā, ‘oku te fiefia; he ko e me‘a ‘i ho‘omou ngāue, ‘oku te to‘a ‘i he me‘a kotoa pē.