Read KO E TOH TAPU KATOA TONGA Kolinitō 2 8 Bible Online

Kolinitō 2 8 - KO E TOH TAPU KATOA TONGA bible

Kolinitō 2 8

¹PEA ko eni, ‘oku mau ongoongo atu, kāinga, ‘a e kelesi kuo tuku mei he ‘Otua ki he ngaahi siasi ‘i Masitōnia;

²‘o pehē, neongo na‘e ‘ahi‘ahi‘i kinautolu ‘aki ha fu‘u mamahi, ka na‘e opeope ‘enau fiefia: pea neongo e ‘ango‘ango ‘enau masiva, ka ka mahake mei ai ha fu‘u koloa foaki.

³‘Io, ‘oku ou fakamo‘oni, kuo nau fai ki he ngātanga ‘o ‘enau mafai, ‘io, ‘o mahili atu;

⁴pea ko e langa‘i ‘e kinautolu, he‘enau kole fakamātoato ke mau ofa ‘o tuku ke nau kau ‘i he tokoni‘i ‘o e fa‘ahinga tapu.

⁵Kae‘uma‘ā e me‘a tēpū, ‘a ia na‘e ‘ikai te mau ‘amanekina, na‘a nau li‘aki kinautolu ki he ‘Eiki, pea kiate kimautolu foki, ‘i he hā ko e finangalo ia ‘o e ‘Otua.

⁶Ko ia, na‘a mau kole kia Taitusi, ko e me‘a ‘i he ‘a‘ana ‘a e langa‘i ‘o e kelesi ni ‘iate kimoutolu, ko ia ke ne ‘alu atu foki ‘o fakahaohaoa ia.

⁷Kehe pē, he hangē ‘oku mou hulu atu ‘i he me‘a kotoa pē — ‘i he tui, mo e akonaki, mo e ‘ilo loloto, mo e feinga kehekehe, kae‘uma‘ā ‘i he ‘ofa kiate kimautolu[5] — ke pehē foki ho‘omou hulu atu ‘i he kelesi ko eni.

⁸‘Oku ‘ikai te u lea pehē ko e fekau; ka ko ‘eku fakahaa‘ia ‘a e feinga ‘a e kakai kehe, ke u sivi ai ‘a e mo‘oni ‘o e ‘ofa ‘amoutolu foki.

⁹(Seuke, ‘oku mou ‘ilo ‘a e ‘ofa ‘a hotau ‘Eiki ko Sīsū Kalaisi he‘ene koloa‘ia, ka ne hoko ko e masiva koe‘uhi ko kimoutolu, koe‘uhi ko e me‘a ‘i he‘ene masiva ke mou hoko ko e koloa‘ia.)

¹⁰‘Io, ‘i he me‘a ni ko ‘eku fakakaukau pē ‘oku ‘atu: he ko ia pē ‘oku taau mo ha ni‘ihi pehē; he na‘a mou kamata ‘i he ta‘u kuo hili, ‘o mu‘omu‘a ‘i he ngaahi siasi ko ē; ‘o ‘ikai ‘i hono kamata fai pē ‘o e me‘a, ka ‘i hono o‘i foki.

¹¹‘Ē, ke mou faka‘osi ‘eni hono fai foki: he ‘oku mo‘oni na‘a mou loto lelei leva ke o‘i, ka koe‘uhi ke ai hano faka‘osi ‘e hoa mo ia, pea taau mo ho‘omou mafai.

¹²He kapau ko loto fiefai ‘oku ta‘utu mai, ko ‘ene hōifua ai ‘a e ‘Eiki ‘oku fakafuofua ‘aki ‘a e me‘a ‘oku ne ma‘u, ‘o ‘ikai ‘aki ‘a e me‘a ‘oku ‘ikai te ne ma‘u.

¹³Pea tala‘ehai ko e fai ‘eni ke ma‘u fiemālie ai ha ni‘ihi, kae mafasia kimoutolu;

¹⁴‘ikai, ka ko e fai‘aki ‘a e lao ‘o e fakafe‘unga: ‘o pehē, ‘i he taimi ko eni, ke lave atu ho‘omou me‘a hulu ki he‘enau me‘a ta‘ea‘u; kae toki lave mai foki ‘enau me‘a hulu ki ho‘omou me‘a ta‘ea‘u, koe‘uhi ke ai ha fakafe‘unga:

¹⁵‘o hangē ko e folofola, Ko ia na‘a ne tufi ‘o lahi na‘e ‘ikai tomo atu, pea ko ia na‘e tufi ‘o si‘i, na‘e ‘ikai ta‘ekakato.

¹⁶Pea fakafeta‘i ki he ‘Otua, he‘ene fakatupu ‘i he loto ‘o Taitusi ha tokanga kiate kimoutolu ‘oku hangē ko ha‘aku.

¹⁷He ko ‘ene ‘alu atu na, ‘oku mo‘oni ko ‘ene tali ‘eku kole, ka na‘e kimui ia, ka kuo loa ‘ene tokanga ‘e ia ke fai.

¹⁸Pea ko eni kuo mau fekau ke ō mo ia ‘a si‘i kāinga ko ia, ‘a ia ‘oku ne ongoongolelei ‘i he Ngāue ‘i he ngaahi siasi kotoa pē;

¹⁹pea ‘ikai‘ia ko ia, ka na‘e fili ia foki ‘e he ngaahi siasi ‘i he hiki nima, ke kau mo kimautolu ‘i he ‘ave ‘o e ‘ofa ni, ‘a ia kuo tuku kiate kimautolu hono tauhi; telia ‘a e ongoongolelei ‘o e ‘Eiki, pea koe‘uhi ke mau fie tali ‘a e ngāue ko ia —

²⁰ko ‘emau faka‘ehi‘ehi pehē, na‘a lau‘i kimautolu ‘e ha taha ‘i he fu‘u koloa ni kuo tuku kiate kimautolu hono tauhi.

²¹He ko ‘emau anga ke tomu‘a fakakaukau‘i ‘emau ngaahi me‘a ke hā lelei, ‘o ‘ikai ki he ‘Otua pē, ka ki he tangata foki.

²²Pea kuo mau fekau ke ō mo kinaua ‘a si‘omau kāinga ‘e taha; ko e toko taha kuo tu‘o lahi ‘emau sivi, pea ‘i he ngaahi me‘a lahi, ‘o mau ‘ilo ko e taha ‘oku feinga mo‘oni: pea ‘i he taimi ni ‘oku ‘āsili lahi ‘ene feinga ko ‘ene falala ‘aupito kiate kimoutolu.

²³Ko ia, kapau ko e ‘eke kia Taitusi, ko e kaume‘a ia ‘o‘oku, kae‘uma‘ā ko e kaungā ngaue ‘o‘oku ‘i he fai kiate kimoutolu. Pea kapau ko e ‘eke ki si‘i ongo kāinga ni, ko e ongo fakafofonga kinaua ‘o e ngaahi siasi, pea ko e lāngilangi ‘o Kalaisi.

²⁴Ko ia, ko ho‘omou tuku ke hā kiate kinautolu ‘a e mo‘oni ‘o ho‘omou ‘ofa, mo e mo‘oni ‘o ‘emau pōlepole ‘iate kimoutolu, ko ho‘omou mātu‘aki fai ia ki he ngaahi siasi.