Read KO E TOH TAPU KATOA TONGA Kalētiá 1 Bible Online

Kalētiá 1 - KO E TOH TAPU KATOA TONGA bible

Kalētiá 1

¹TŪ KO KIMAUTOLU — ‘a Paula ko ha ‘aposetolo, (ka na‘e ‘ikai tupu ‘eku lakanga mei ha tu‘unga tangata, ‘uma‘ā hano ‘omi ‘e ha tangata, ka na‘e ‘omi ‘e Sīsū Kalaisi, pea mo e ‘Otua ko e Tamai, ‘a ia na‘a ne fokotu‘u ia mei he pekia);

²pea mo e kāinga lotu kotoa pē ‘oku fononga mo au — ko ‘emau tohi ki he ngaahi siasi ‘o Kalētia.

³‘Ofa ke mou ma‘u kelesi mo e fiemālie mei he ‘Otua ko e Tamai, mo hotau ‘Eiki ko Sīsū Kalaisi,

⁴‘a ‘Ene ‘Afio na‘a ne foaki ia ‘e ia koe‘uhi ko ‘etau ngaahi angahala, ke ne fakahaofi kitautolu mei he nofo kovi ‘oku lolotonga ni: ‘o fakatatau ki he finangalo ‘o e ‘Otua ko ‘etau Tamai.

⁵Ke ‘o ‘Ene ‘Afio ‘a e kolōlia ‘o lauikuonga pea ta‘engata! ‘Ēmeni.

⁶‘Oku te ofo ‘i he vave pehē fau ho‘omou kamata tafoki meiate ia na‘a ne fakaului kimoutolu ‘aki ‘a e kelesi ‘a Kalaisi,[1] ‘o mou hiki ki ha kōsipeli kehe.

⁷‘A ia ‘oku ‘ikai ko ha kōsipeli; kehe ‘oku ai ha ni‘ihi ‘oku ue‘i kimoutolu, mo nau feinga ke liliu ‘a e Kōsipeli ‘o Kalaisi.

⁸Ka neongo ko kimautolu, pe ko ha ‘āngelo mei Langi, ka ‘o kapau te ne malanga‘aki ha kōsipeli ‘oku makehe atu mo ia na‘a mau malanga‘aki atu, ke ne hoko ko e mala‘ia.

⁹Hangē ko ‘emau lea mu‘a, ko ia ‘oku ou toe tala ni, kapau ‘e malanga‘aki atu ‘e ha taha ha kōsipeli ‘oku makehe atu mo ia na‘a mou ma‘u, ke ne hoko ko e mala‘ia.

¹⁰He ko e fē ‘eni ‘oku ou fai ke loto mai? ‘a e kakai, pe ko e ‘Otua? Pe ko ‘eku feinga ‘eni ke mālie‘ia ‘a e kakai? Ka ne u kei fai ke mālie‘ia ‘a e kakai ‘iate au, pehē ‘oku ‘ikai te u nofo ni ko ha pōpula ‘a Kalaisi.

¹¹Pea ko eni, kāinga, ‘oku ou fakamahino atu, ko e kōsipeli ne malanga‘aki ‘e au, ‘oku ‘ikai ko ha me‘a fakaetangata ia.

¹²He ko ‘ete ma‘u ia foki ‘e kita, tala‘ehai ko e ma‘u mei ha tangata, pe ‘i he‘ete ako, ka ko e fakahā mei he ta‘ehāmai ‘e Sīsū Kalaisi.

¹³He na‘a mou fanongo ki he‘eku tō‘onga mu‘a ‘i he lotu faka-Siu; ‘a e makehe atu ‘o ‘eku fakatanga‘i ‘a e siasi ‘a e ‘Otua, mo ‘eku laiki ia:

¹⁴mo ‘eku ‘amo atu ‘i he tokolahi ‘o hoku kakai na‘e to‘ume‘a mo au ‘i he lotu faka-Siu, ‘o u hulu atu ‘i he mamahi‘i ‘o e ngaahi tu‘utu‘uni na‘e tukufakaholo mei he‘eku ngaahi kui.

¹⁵Ka ko e ‘Otua, ‘a ia na‘a ne polo‘i au mei he manava ‘o ‘eku fa‘ē, mo ne ui au ‘aki ‘ene kelesi.

¹⁶‘I he ‘iloange na‘a ne finangalo ke faka‘ilo mei he ta‘ehāmai ‘a hono ‘Alo ‘i hoku loto, koe‘uhi ke u ongoongoa ai pē ia ‘i he lotolotonga ‘o e Senitaile; ko e me‘a na‘a ku fai leva na‘e ‘ikai te u huhū ki ha kakano mo toto,

¹⁷‘uma‘ā ha‘aku ‘alu hake ki Selusalema kiate kinautolu na‘e tomu‘a ‘aposetolo ‘iate au, ka te ‘alu pē mei he potu ko ia ki ‘Ālepea, pea u toe foki mei ai ki Tāmasikusi.

¹⁸Pea na‘e toki hili ‘a e ta‘u ‘e tolu, pea u ‘alu hake ki Selusalema ke ‘a‘ahi kia Kīfasi; pea u nofo mo ia ‘o ‘aho hongofulu mā nima.

¹⁹Ka na‘e ‘ikai te ma fe‘iloaki mo ha taha kehe ‘o e kau ‘Aposetolo, ko Sēmisi pē ko e tokoua ‘o e ‘Eiki.[2]

²⁰Pea ko e ngaahi me‘a ‘oku ou tohi atu, ko e ‘Otua ē, ‘oku ‘ikai ko ‘eku loi.

²¹Hili ia na‘a ku ‘alu ki he ngaahi feitu‘u ‘o Sīlia mo Silisia:

²²pea u nofo ai pē, ‘o ‘ikai ‘iloa hoku mata ni ‘e he ngaahi siasi ‘o Siutea na‘e Kalisitiane:

²³ka na‘e ngata pē ‘i he‘enau fa‘a ma‘u talanoa, Tokua, ko ia na‘a ne fakatanga mu‘a kiate kitautolu, ‘oku ne malanga‘aki ‘eni ‘a e lotu na‘a ne motu‘a laiki.

²⁴Pea nau fakahīkihiki‘i ‘a e ‘Otua he‘ene hā ‘iate au.