Read KO E TOH TAPU KATOA TONGA Kalētiá 2 Bible Online

Kalētiá 2 - KO E TOH TAPU KATOA TONGA bible

Kalētiá 2

¹PEA ‘i he‘ene ‘osi ai pē ‘a e ta‘u ‘e hongofulu mā fā, pea u toe ‘alu hake ki Selusalema fakataha mo Pānepasa: pea u ‘alu mo au ‘a Taitusi foki.

²Pea ko ‘eku ‘alu ko ia na‘e ‘i he funga ‘o ha fekau mei he Ta‘ehāmai. Pea na‘a ku fakapā kiate kinautolu ‘i he kōsipeli ‘oku ou malanga‘aki ni ki he Senitaile, kae fakaekimautolu pē mo e kau tu‘ukimu‘a, na‘a ‘iloange ‘e iku noa ‘a e lele ‘oku ou fai, pe ko ia kuo u fai.

³Ka na‘a mo Taitusi, ‘a ia na‘e ‘alu mo au, neongo ko e Kalisi, ka na‘e ‘ikai kouna ke ne kamu:

⁴ka koe‘uhi pē ko e kau lotu loi kuo moulu mai, ‘a e fa‘ahinga na‘a nau totolo mai ke mataki‘i ‘a e tau‘atāina ‘oku tau ma‘u ‘ia Kalaisi Sīsū, ka nau fai ke fakapōpula‘i ‘aupito kitautolu:

⁵‘a ia na‘e ‘ikai te mau momo‘i ‘unua ki ai ‘i ha houa ‘e taha, ke fai ‘a e fakavaivai na‘a nau tangi ki ai; koe‘uhi ke nofo ma‘u kiate kimoutolu ‘a e totonu ‘o e Kōsipeli.

⁶Ka ko e me‘a kiate kinautolu ‘oku lau ko ha me‘a, (ko ia ai pē pe na‘a nau fēfē ‘i mu‘a, ko e hā ia kiate au? Tala‘ehai ‘oku filifilimānako ‘e he ‘Otua ki he tangata) seuke, na‘e ‘ikai ‘omi ha me‘a kiate au ‘e he kau tu‘ukimu‘a na.

⁷Kaekehe, ‘i he‘enau vakai kuo tu‘anaki au, ‘o tuku mai ‘a e Kōsipeli ma‘a e ta‘ekamu, ‘o hangē ā kia Pita ma‘a e kamu;

⁸(he ko ia na‘a ne tokoni ma‘a Pita ke ne lava ‘ene ngāue faka‘aposetolo ki he ha‘a Kamu, na‘a ne tokoni foki ma‘aku ke u lava ‘eku ngāue ki he Senitaile):

⁹‘io, ko Sēmisi mo Kīfasi mo Sione, ‘a ia ‘oku lau ko e ngaahi pou, ‘i he‘enau vakai ‘a e kelesi kuo tuku mai kiate au, na‘a nau tuku mai kiate au mo Pānepasa ‘a e nima to‘omata‘u ‘o e kautaha, koe‘uhi ke ‘amaua ‘a e ngāue ki he Senitaile, kae ‘anautolu ‘a e fai ki he ha‘a Kamu.

¹⁰Ngata pē, na‘a nau kole ke ma manatua ‘a e kau masiva; ‘a ia foki ko e me‘a pē na‘a ku mātu‘aki loto ke fai.[3]

¹¹Pea ‘i he hoko mai ‘a Kīfasi ki ‘Aniteoke, na‘a ku tu‘u ke ta‘ofi tonu kiate ia; he na‘e mahino ‘ene hala.

¹²Koe‘uhi ‘i he te‘eki ke hoko hifo ha ni‘ihi meia Sēmisi, na‘a ne keinanga fakataha mo e Senitaile: ka ‘i he‘enau hoko hifo leva, na‘a ne kamata faka‘ehi‘ehi ‘o nofo kehe, he‘ene manavahē telia ‘a ha‘a kamu.

¹³Pea fai mālualoi mo ia ‘a hono toe ‘o e kau Siu: ko ia na‘a mo Pānepasa na‘e ‘auhia ‘i he mālualoi ‘anautolu.

¹⁴Ka ‘i he‘eku vakai ‘oku ‘ikai ke hu‘ufa tonu ‘enau laka ki he mo‘oni ‘o e Kōsipeli, ko ia na‘a ku lea kia Kīfasi ‘i he ‘ao ‘onautolu kotoa, ‘o pehē, Kapau ‘oku ke mo‘ui faka-Senitaile, ‘o ‘ikai faka-Siu, ‘a koe ko e Siu, pea fakafēfē ai ho‘o tohoaki ‘a e Senitaile ke fai faka-Siu.

¹⁵Neongo ko e tupu Siu kitaua, ‘o ‘ikai ko e ongo angahala mei he Senitaile,

¹⁶ka ‘i he‘eta ‘ilo ‘oku ‘ikai fakatonuhia ha tangata mei he ngaahi ngāue faka-Lao, kae ngata pē ‘i he tui kia Sīsū Kalaisi, ko ia, ko kitaua foki na‘a ta tui kia Kalaisi Sīsū, koe‘uhi ke ta ma‘u fakatonuhia mei he tui kia Kalaisi, ‘o ‘ikai mei he ngaahi ngāue faka-Lao: koe‘uhi ko e me‘a ki he ngaahi ngāue faka-Lao, ‘e tu‘u mola ai ‘a e kakano kotoa pē, ‘o ‘ikai hanau fakatonuhia mei ai.

¹⁷Pea kapau, lolotonga ‘eta nofo ke ma‘u tonuhia he tu‘u ‘ia Kalaisi, fakafokifā kuo hā ko e ongo angahala foki kitaua, pea tā kuo hoko ‘a Kalaisi ko e tokoni ‘o angahala, ‘ikai ko ia? Molekemama‘o ha me‘a pehē!

¹⁸Seuke, kapau kuo te holoki ha ngaahi me‘a, ka te hanga ‘o toe langa hake ‘a e ngaahi me‘a pē ko ia, tā ‘oku ou fakamo‘oni ‘e au ko e fai hala au.

¹⁹He ko kita, ko e me‘a ‘i he Lao na‘a te mate ki he Lao; koe‘uhi ke u mo‘ui ki he ‘Otua.

²⁰Kuo tutuki au ki he Kolosi mo Kalaisi: pea ko ‘eku mo‘ui ‘oku fai, ‘oku ‘ikai kei ko au, ka ko e mo‘ui ‘oku fai ‘e Kalaisi ‘iate au: ‘io, ko e mo‘ui ‘oku ou fai ‘eni ‘i he kakano ko e mo‘ui ‘i he tui, ko e tui ki he ‘Alo ‘o e ‘Otua, ‘a ia na‘a ne ‘ofeina au, mo ne foaki ia ‘e ia ke pekia koe‘uhi ko au.

²¹‘Oku ‘ikai te te fakata‘e‘aonga ‘e kita ‘a e kelesi ‘a e ‘Otua; he kapau ‘oku fou mei he Lao ‘a e mā‘oni‘oni, pea tā na‘e pekia ‘a Kalaisi ta‘ehano ‘uhinga.