Read KO E TOH TAPU KATOA TONGA Kalētiá 3 Bible Online

Kalētiá 3 - KO E TOH TAPU KATOA TONGA bible

Kalētiá 3

¹‘A e kau Kalētia ta‘eloto, ko hai kuo ne fakamatavalea‘i kimoutolu? ‘A kimoutolu na‘e fehangahangai tonu mo homou mata ‘a Sīsū Kalaisi, hono faka‘ali‘ali ‘o hono kalusefai.

²Ko e me‘a pē ‘eni ‘oku ou fie ‘ilo meiate kimoutolu, pe na‘a mou ma‘u ‘a e Laumālie mei he ngaahi ngāue faka-Lao, pe mei he malanga‘aki ‘o e tui?

³‘Oku pehē fau ho‘omou ta‘eloto? hili ho‘omou kamata ‘i he Laumālie, ‘oku mou nofo ‘eni koā ke fakakakato mei he kakano?

⁴Ne mou kātaki koā ‘a e ngaahi fu‘u mamahi ko ia ko e me‘a ke ta‘e‘aonga? ‘O kapau mo‘oni kuo ta‘e‘aonga.

⁵Pea ko eni, ko ia ‘oku ne tuku kiate kimoutolu ‘a e Laumālie, mo ne fakatupu ‘iate kimoutolu ‘a e mafai mana, ‘oku tefito ‘ene fai ki he ngaahi ngāue faka-Lao, pe ki he malanga‘aki ‘o e tui?

⁶‘Ā, ‘oku hangē pē ko e folofola, Na‘e tui ‘a ‘Epalahame ki he ‘Otua, pea na‘e lau ia ma‘ane mā‘oni‘oni.

⁷Ko ia, ‘oku mou vakai mei ai, ‘Ilonga ‘a kinautolu ‘oku ‘i he tui, ko kinautolu ia ‘a e hako ‘o ‘Epalahame.

⁸Pea ko e Tohitapu, ‘i he‘ene vakai mama‘o ‘i mu‘a ‘a e fakatonuhia ‘e he ‘Otua ‘a e Senitaile mei he tui pē, ko ia na‘a ne malanga‘aki ‘a e Kōsipeli ‘i mu‘a kia ‘Epalahame, ‘o pehē, ‘E monū‘ia ‘iate koe ‘a e fa‘ahinga kotoa pē.

⁹Ko ia, ko kinautolu ‘oku ‘i he tui, te nau monū‘ia fakataha mo si‘i tui ko ‘Epalahame.

¹⁰Seuke, ‘ilonga kinautolu ‘oku tefito ki he ngaahi ngāue faka-Lao, te nau mo‘ulaloa ki ha mala: he kuo tohi, ‘oku mala‘ia ‘a e tangata kotoa pē ‘oku ‘ikai ke nofo‘aki fai ‘a e ngaahi me‘a kotoa pē kuo tohi ‘i he Tohi Lao.

¹¹Pea ko eni, ko e pehē ‘oku ‘ikai fakatonuhia ha toko taha ‘i he ‘ao ‘o e ‘Otua he‘ene tu‘unga ki he Lao, ‘oku mahino ia mei he folofola ni, Ko e mā‘oni‘oni te ne mo‘ui mei he tui.[4]

¹²Ka ko e Lao ‘oku ‘ikai tefito ki he tui: ka ‘oku pehē ‘e he Folofola, Ko ia kuo ne fai ‘a e ngaahi me‘a ko ia te ne mo‘ui ai.

¹³Ne huhu‘i kitautolu ‘e Kalaisi mei he mala‘ia faka-Lao, he‘ene hoko ko e koto mala‘ia koe‘uhi ko kitautolu; (he kuo tohi, ‘Ilonga ‘a ia ‘oku tautau ‘i ha ‘akau ko e mala‘ia ia):

¹⁴koe‘uhi ke hoko ki he Senitaile ‘ia Sīsū Kalaisi ‘a e tāpuaki ‘a ‘Epalahame; ka tau ma‘u ‘i he‘etau tui ‘a e tala‘ofa, ko e Laumālie.

¹⁵Kāinga, ka u lea fakaetangata: neongo ko e fuakava ‘a ha tangata, ka ‘o kapau kuo fakapapau ia, tala‘ehai ‘oku tāmate‘i ia ‘e ha taha, pe fakalahi.

¹⁶Pea ko eni, na‘e fai ‘a e ngaahi tala‘ofa ma‘a ‘Epalahame mo hono hako. ‘Oku ‘ikai te ne pehē, Pea mo ho ngaahi hako, ‘o hangē ko ha‘ane lau ki ha tokolahi; ka hangē ko ‘ene lau ki ha toko taha pē, ‘o pehē, Pea mo ho hako: ‘a ia ko Kalaisi.

¹⁷Pea ko ‘eni ia ‘a e me‘a ‘oku ou lau ki ai, ko e Fuakava ‘a ia kuo loa hono fakapapau ‘e he ‘Otua, ‘e ‘ikai lava ‘e he Lao ke vete ia, ‘o fakaka‘anga ‘a e Tala‘ofa: he na‘e ki mui ‘ene hoko ‘a‘ana, kuo hili ‘a e ta‘u ‘e fāngeau mā tolungofulu.

¹⁸He kapau na‘e tefito ki he Lao ‘a e ma‘u ‘o e tofi‘a, tā ‘oku ‘ikai tefito ki he Tala‘ofa: ka na‘e tō ia kia ‘Epalahame ko e me‘a‘ofa ‘a e ‘Otua, koe‘uhi ko e Tala‘ofa.

¹⁹Pea kapau ko ia, pea ko e hā ai ‘a e Lao? ‘Ā, na‘e kanoni ‘aki ia koe‘uhi ko e ngaahi fai hala, kae‘oua ke hoko mai ‘a e hako ne fai ki ai ‘a e tala‘ofa; pea na‘e talafono ‘aki ‘e ha kau ‘āngelo, ‘o fakafai ‘i ha fakalaloa.

²⁰Pea ko eni, ko ha fakalaloa ‘oku ‘ikai ko ha me‘a ‘o ha fa‘ahi taha: ka ko e ‘Otua ‘oku taha tofu pē.[5]

²¹Pea kapau ko ia, pea ‘oku fepaki koā ‘a e Lao mo e ngaahi tala‘ofa ‘a e ‘Otua, ‘ō? Molekemama‘o! seuke ka ne ‘omi ha lao ‘a ia te ne lava ke fakamo‘ui ‘a e mate, pehē ‘e tefito mo‘oni ‘a e fakatonuhia ki he Lao.

²²Kaekehe na‘e loki ‘e he folofola ‘a e me‘a kotoa pē ke mo‘ulaloa ki he angahala, koe‘uhi ke foaki ‘a e tala‘ofa ki he kakai tui, koe‘uhi pē ko e tui kia Sīsū Kalaisi.

²³Ka ‘i he te‘eki ke hoko mai ‘a e tui, na‘e tauhi pilīsone kitaua ‘i he pule ‘a Lao, ‘o loki ki he tui na‘e ene ke faka‘ilo mei he Ta‘ehāmai.

²⁴Pea tā ko e Lao ko hota fakale‘o ma‘a Kalaisi, kae fakatonuhia kitaua mei he tui.

²⁵Ka ‘i he hoko mai ko eni ‘a e tui, pea ‘oku ‘ikai te ta kei fāiekina ki ha fakale‘o.

²⁶Seuke, ko e ngaahi Foha ‘o e ‘Otua ‘a kimoutolu kotoa pē, ko e me‘a ‘i he tui ‘oku fai kia Kalaisi Sīsū.

²⁷‘Io, ‘ilonga kimoutolu na‘e papitaiso kia Kalaisi, na‘a mou kofu ‘aki ai ‘a Kalaisi.

²⁸‘Oku ‘ikai ai ha Siu pe ha Kalisi, ‘oku ‘ikai ai ha pōpula pe ha tau‘atāina, ‘oku ‘ikai ai ke tangata mo fefine: he ko kimoutolu kātokatoa ko e toko taha tofu pē ‘ia Kalaisi Sīsū.

²⁹Pea kapau ko e konga ‘o Kalaisi ‘a kimoutolu, pea tā ko e hako ‘o ‘Epalahame ‘a kimoutolu, ko e ngaahi ‘ea ‘o fakatatau ki he Tala‘ofa.