Read KO E TOH TAPU KATOA TONGA Kalētiá 4 Bible Online

Kalētiá 4 - KO E TOH TAPU KATOA TONGA bible

Kalētiá 4

¹PEA ko eni, ‘oku te pehē, Lolotonga ‘oku tamasi‘i ‘a e ‘ea, ‘oku ‘ikai si‘i te ne fai kehekehe mo ha pōpula, neongo ko e ‘eiki ia ‘oku ‘a‘ana ‘a e me‘a kotoa pē:

²kaekehe ‘oku ne mo‘ulaloa ki ha ni‘ihi ‘oku tauhi ia, mo ha ni‘ihi ‘oku tauhi ‘ene koloa; kae‘oua ke hokosia ‘a e taimi ne kotofa ‘e he‘ene ‘eiki.

³Pehē mo kitaua; lolotonga na‘a ta tamaiki, na‘a ta mo‘ulaloa ki he ngaahi ‘elemēniti ‘o e lotu, ‘a ia ‘oku fakamaama, ‘o ta pōpula pē.

⁴Ka ‘i he hokosia leva ‘a e fakakakato ‘o e taimi, na‘e fekau atu ‘e he ‘Otua hono ‘Alo ‘o‘ona, ‘a ia ne tupu mei ha fefine, mo tupu ko e mo‘ulaloa ki he Lao;

⁵koe‘uhi ā ke ne huhu‘i ‘a kinautolu ‘oku mo‘ulaloa ki he Lao, ka tau ma‘u ‘a e ohi.

⁶Pea koe‘uhi ā ko e ngaahi foha ‘a kimoutolu, ko ia na‘e fekau atu ‘e he ‘Otua ki hotau loto ‘a e Laumālie ‘o hono ‘Alo, ‘oku ne kalanga, ‘Apā, Tamai.

⁷Ko ia ‘oku ‘ikai te ke kei ko ha pōpula, ka ko ha foha: pea kapau ko ha foha, pea tā ko ha ‘ea, ko e me‘a ‘i he ‘Otua.

⁸Ka ko eni, ko e taimi mu‘a, na‘a mou ngāue ki ha ni‘ihi na‘e ‘ikai ko e ngaahi ‘otua mo‘oni, ko e ‘ikai te mou ‘ilo ki he ‘Otua.

⁹Ka ‘i onopooni, kuo hili ho‘omou ‘ilo ‘a e ‘Otua, kae‘uma‘ā homou ‘iloa ‘e he ‘Otua, pea ‘oku fakafēfē ho‘omou toe tafoki ki he ngaahi ‘elemēniti vaivai mo masiva ko ia, ‘a ia ‘oku mou tangi ni ke ngāue ki ai, ‘o toe fai mei he kamata‘anga?

¹⁰‘Oku mou tauhi ha ngaahi ‘aho mo ha ngaahi māhina, mo ha ngaahi fa‘ahita‘u mo ha ngaahi ta‘u.

¹¹‘Ā, ‘oku ou manavahē kiate kimoutolu, na‘a kuo ta‘e‘aonga ‘eku fakaongosia ne fai ma‘amoutolu.

¹²Kāinga, ‘oku ou kole atu ke mou hoko ‘o hangē ko au, he na‘a ku hoko foki ‘o hangē ko kimoutolu.

¹³Tala‘ehai na‘a mou momo‘i fai ha kovi kiate au: ka ‘oku mou ‘ilo na‘a ku fuofua malanga‘aki ‘a e Kōsipeli kiate kimoutolu koe‘uhi ko ha vaivai na‘e hoko ki hoku kakano.

¹⁴Pea ko e me‘a na‘e tu‘u ‘i hoku kakano, ‘a ia na‘e ngali ko ha tūkia‘anga kiate kimoutolu, na‘e ‘ikai te mou fakata‘eta‘etokanga ai, ‘uma‘ā ha‘amou palakū‘ia ai; kaekehe na‘a mou tali au ‘o hangē ko ha ‘āngelo ‘a e ‘Otua, pe ko Sīsū Kalaisi.

¹⁵Pea ko e fē ‘eni ho‘omou lau monū na‘e fai? He ‘oku ou fakamo‘oni atu, ka ne lava, pehē ne mou kape‘i homou mata ‘o ‘omi mo‘oku.

¹⁶Pea tā kuo u hoko ko homou fili ‘apē, he‘eku lea ‘asi?

¹⁷‘Ā, ko ‘enau mamahi‘i kimoutolu ‘oku ‘ikai lelei: kaekehe ko honau loto ke vahe‘i kimoutolu, ka mou toki mamahi‘i kinautolu.

¹⁸Ka ko e me‘a lelei ke mamahi‘i ai pē kimoutolu ‘e ha ni‘ihi, ‘i ha me‘a ‘oku lelei, ‘o ‘ikai ngata pē ‘i he‘eta feangai mo au.

¹⁹Si‘eku fānau valevale, ‘a kimoutolu ‘oku ou toe langā ‘eni ‘i homou fā‘ele‘i, kae‘oua ke kakato ‘a Kalaisi ‘iate kimoutolu,

²⁰‘ā, ‘oku te ‘amusia ange ‘e kita ‘oku ta feangai ‘eni, ka u liliu ‘a e anga ‘o ‘eku lea: he ‘oku ou puputu‘u koe‘uhi ko kimoutolu.

²¹Tala mai, ‘a kimoutolu kuo mou loto ke mo‘ulaloa ki he Lao, ‘oku ‘ikai te mou tokanga‘i koā ‘a e Lao?

²²He kuo tohi ai, Tokua na‘e ma‘u ‘e ‘Epalahame ha ongo foha ‘e toko ua; ko e taha ko e tama ‘a e kaunanga, ko e taha ko e tama ‘a e fefine tau‘atāina.

²³Ka ko e tama ‘a e kaunanga na‘e tupu fakaekakano, ka ko e tama ‘a e fefine tau‘atāina na‘e fou fakapalōmesi mai.

²⁴Ko e fa‘ahinga me‘a pehē ‘oku fai fakatātā: he ko e ongo fefine ko ia, ko e ongo Fuakava; ko e taha ‘oku mei he mo‘unga ko Sainai, pea ‘oku fanau kakai ke pōpula: ko Heka‘ā ia.

²⁵Ka ko e Heka‘ā ko ia ko e mo‘unga ko Sainai ‘i ‘Ālepea:[6] pea ‘oku hoa ia mo e Selusalema ‘o onopooni, he ‘oku nofo pōpula ia mo ‘ene fānau.

²⁶Ka ko e Selusalema mei ‘olunga ‘oku tau‘atāina ia: pea ko ia ia ‘a e fa‘ē ‘atautolu.

²⁷He kuo tohi, Fiefia, si‘i pa‘a ‘oku ‘ikai ke fanau, Hiki tuē mo kalanga, si‘i ta‘elangā! He ‘e tokolahi pē ha fānau ‘a si‘i li‘ekina, ‘O hulu atu ‘i he fefine ‘oku ‘i ai ‘a e tangata.

²⁸Pea ko eni, ko kimoutolu, kāinga, ko e fānau ‘a Palōmesi, ‘o hangē ko ‘Aisake.

²⁹Kae hangē tofu pē ko ia ‘i mu‘a, ‘a e fakatanga‘i ‘e ia na‘e tupu fakaekakano ‘a ia na‘e tupu fakalaumālie, ‘oku pehē pē foki mo ia ‘i onopooni.

³⁰Ka ko e hā ‘a e lau ‘a e Tohi? ‘A ‘eni, Kapusi ‘a e kaunanga mo ‘ene tama; he ‘e ‘ikai ‘aupito kaungā ‘ea ‘a e tama ‘a kaunanga mo e tama ‘a tau‘atāina.

³¹Ko ia, kāinga, ‘oku ‘ikai ko e fānau ‘a kaunanga ‘a kitaua, ka ko e fānau ‘a tau‘atāina.