Read KO E TOH TAPU KATOA TONGA Kalētiá 5 Bible Online

Kalētiá 5 - KO E TOH TAPU KATOA TONGA bible

Kalētiá 5

¹KO E tau‘atāina koā na‘e fakatau‘atāina kitaua ki ai ‘e Kalaisi? Pe‘i mou tu‘u ma‘u ai, pea ‘oua te mou toe mo‘ua ‘i he ‘ioke fakapōpula.

²Vakai mai: ko Paula au ‘oku ou tala atu, kapau te mou fai‘aki ‘a e kamu, ‘e ‘ikai momo‘i ‘aonga ‘a Kalaisi kiate kimoutolu.

³‘Io, ‘oku ou toe fakapapau atu ki he tangata takitaha ‘oku tuku ‘eni ke nau fai hono kamu, ‘oku ne mo‘ua leva ke fai hono kotoa ‘o e Lao.

⁴Kuo motuhi leva kimoutolu meia Kalaisi, ‘a e fa‘ahinga na ‘oku nofo ke tonuhia mei he Lao: ‘io, kuo fakahee‘i kimoutolu meia Kelesi.

⁵He ko kimautolu, ko e me‘a ‘i he Laumālie, pea koe‘uhi ko ‘emau tui, ‘oku mau talitali ‘aki ‘a e ‘amanaki ki he fakatonuhia.

⁶He ‘i he tu‘u ‘ia Kalaisi Sīsū, ‘oku ‘ikai mamafa ha‘ate kamu pe ta‘ekamu, ka ko ha tui pē ‘oku ngāue fou ‘i he ofa.

⁷‘Ā, ne mālō ho‘omou lele. Ko hai tū ne ta‘ofi kimoutolu mei he talangofua ki he totonu?

⁸Ko homou fakaloto‘i ko ia, ‘oku ‘ikai fou meiate ia ‘oku fai homou fakaului.

⁹Ka lave ha me‘i lēvani ki ha takaonga mā, tā kuo lēvani hono kotoa.

¹⁰‘Oku ‘i ai ‘eku falala ‘a‘aku kiate kimoutolu ‘i he ‘Eiki, ‘e ‘ikai momo‘i fou kehe homou loto: ka ko ia ‘oku ne fakatupu maveuveu ‘iate kimoutolu te ne fua hono tautea, neongo pe ko hai ia.

¹¹Ka ko e me‘a kiate au, kāinga; ka ne mo‘oni ‘oku ou kei malanga‘aki ‘a e kamu, pea ko e hā ai hoku fakatanga‘i ‘oku fai? he ka ne u fai pehē, pehē kuo ‘osi ‘a e fehi‘anekina ‘o e Kolosi.

¹²Ko hoku loto ki he kakai ‘oku fakaangatu‘u kimoutolu, Taumaiā ke nau fai atu ‘o tu‘usi ‘aupito!

¹³Seuke, na‘e ui kimoutolu, kāinga, ke mou tau‘atāina; kae‘oua pē ‘e iku ho‘omou tau‘atāina ko ha ava ki he kakano; ka ko e me‘a ‘i ho‘omou ‘ofa ke mou nofo fetamaio‘eiki‘aki.

¹⁴He ‘oku ‘osiki ‘a e Lao kotoa ‘i ha fo‘i lea; ‘a ‘eni, Te ke ‘ofa ki ho kaungā‘api ‘o hangē ko ho‘o ‘ofa kiate koe.

¹⁵Ka ‘o kapau te mou fe‘u‘usi mo fekainaki, vakai na‘a ‘iloange te mou fetāmate‘aki kimoutolu.

¹⁶Pea ko ‘eku lea ‘eni, Mou fou ‘i he Laumālie, pea ‘e ‘ikai ai te mou momo‘i fakaai ‘a e holi ‘a Kakano.

¹⁷He ‘oku holitu‘u ‘a Kakano ‘o fakafepaki ki he Laumālie; pea pehē mo e Laumālie kia Kakano: he ‘oku na feta‘ofi‘aki ‘a e ongo me‘a ko ia, koe‘uhi ka ai ha me‘a ‘oku mou loto ke fai, pea ‘oua te mou fai ia.

¹⁸Ka ‘o kapau ‘oku tākiekina kimoutolu ‘e he Laumālie, tā ‘oku ‘ikai te mou mo‘ulaloa ki he Lao.

¹⁹Pea ko eni, ‘oku mātu‘aki e‘a ‘a e ngaahi ngāue ‘a Kakano, ‘o pehē, Ko e fe‘auaki, ko e anga‘uli, ko e pau‘u,

²⁰ko e tauhi ‘aitoli, ko e fai tuki, ko e fetāufehi‘a‘aki, ko e fetu‘usi, ko e meheka, ko e fe‘ite‘itani, ko e fakafelaulauhi, ko e fakavahavaha‘a, ko e fakafa‘afa‘ahi,

²¹ko e femeheka‘aki, ko e fefakapōngaki, ko e fa‘a konā, ko e fa‘a kai, mo e ngaahi alā me‘a pehē: ‘a ia ‘oku ou sinaki tala atu, ‘o hangē ko ‘eku lea mu‘a, ko e kakai fai me‘a pehē, ‘e ‘ikai hanau tofi‘a ‘i he pule‘anga ‘o e ‘Otua.

²²Ka ko e fua ‘o e Laumālie, ko e ‘ofa, ko e fiefia, ko e melino, ko e anga mokomoko, ko e anga‘ofa, ko e anga tonu,

²³ko e anga falala, ko e anga kātaki, ko e anga fakama‘uma‘u: ‘oku ‘ikai ha lao ke ta‘ofi ‘a e ngaahi me‘a pehē

²⁴Pea ko kinautolu ‘oku ‘o Kalaisi Sīsū, na‘a nau tutuki ki he Kolosi ‘a e kakano mo hono ngaahi o‘i mo e holi.

²⁵Kapau ko e Laumālie ‘oku tau mo‘ui ai, tau laka foki ‘i he Laumālie.

²⁶‘Oua na‘a tau hiki ki he fie ongoongo, ‘o fepolepolei mo femeheka‘aki.