Read KO E TOH TAPU KATOA TONGA Kalētiá 6 Bible Online

Kalētiá 6 - KO E TOH TAPU KATOA TONGA bible

Kalētiá 6

¹KĀINGA, neongo pē ‘e puke nima ha taha lolotonga ‘ene fai ha kovi; ka ko kimoutolu, ‘a e kau fakalaumālie, mou faito‘o ki ha taha pehē ‘o anga fakaalaala; pea ke vakai kiate koe na‘a ‘iloange ‘e ‘ahi‘ahi‘i mo koe foki.

²Mou fetoutou fefua‘aki homou ngaahi mafasia‘anga: pea ‘i ho‘omou fai pehē, kuo mou[7] ‘osiki ‘aupito ‘a e lao ‘a Kalaisi.

³Seuke, kapau ‘oku ‘afungi ‘e ha taha ko ha me‘a ia; ‘osi, ‘oku ‘ikai ko ha momo‘i me‘a ia, ‘oku fakahala‘i ia ‘e hono loto.

⁴Ka ke takitaha sivi ‘ene ngāue ‘a‘ana; pea te ne toki fakafuofua ‘aki ia pē hono pōlepole‘anga, ‘o ‘ikai ‘aki ha taha kehe:

⁵koe‘uhi kuo pau ke takitaha fua ‘ene kavenga ‘a‘ana.

⁶Pea ko eni, ko ia ‘oku akonekina ‘i he Folofola, ke ne tuku kiate ia ‘oku faiako ke ‘inasi ‘i he‘ene koloa kotoa.

⁷‘Oua na‘a tuku ke fakahala‘i kimoutolu: tala‘ehai ‘oku ala pā‘usi‘i ‘a e ‘Otua; he ‘ilonga pē e me‘a ‘oku tō ‘e ha tangata, ko ia ia te ne utu foki.

⁸He ko ia ‘oku ne tō ‘i hono kakano, te ne utu mei he kakano ‘a e ‘auha: ka ko ia ‘oku ne tō ‘i he laumālie, te ne utu mei he laumālie ‘a e mo‘ui ta‘engata.

⁹Ka ‘oua na‘a ta fiu ‘i he failelei, he te ta utu ‘i hono fa‘ahita‘u, ‘o kapau ‘e ‘ikai te ta vaivai.

¹⁰Pea kapau ko ia, pea lolotonga ‘oku ta faingamālie, ta ngāue ‘aonga ki he kakai kotoa pē: kae lahi pē kiate kinautolu ‘oku ‘i he fāmili ‘o e lotu.

¹¹Vakai ‘ete tohi mata lalahi ma‘amoutolu ‘aki hoku nima ‘o‘oku.

¹²‘Ilonga ‘a kinautolu ‘oku tangi ke hā matamatalelei ‘i tu‘a sino, ko kinautolu ia ‘oku kouna kimoutolu ke mou kamu: ka ko hono ‘uhinga pē, ke ‘oua na‘a fakatanga‘i kinautolu, koe‘uhi ko e Kolosi ‘o Kalaisi.

¹³He na‘a mo e fa‘ahinga kamu na, tala‘ehai ‘oku nau tauhi ‘a e Lao ‘e kinautolu: ka ‘oku nau tangi ke mou kamu, koe‘uhi ke nau tu‘unga ‘i homou kakano ha‘anau pōlepole.

¹⁴Ka ko au, molekemama‘o ha‘aku pōlepole, ka ‘i he Kolosi ‘o hotau ‘Eiki ko Sīsū Kalaisi, ‘a ia kuo kalusefai ai ‘a māmani kiate au, mo au ki māmani.

¹⁵He tala‘ehai ko ha me‘a ‘a e kamu, pe ko ha me‘a ‘a e ta‘ekamu, ka ko e fakatupufo‘ou pē.

¹⁶Pea ‘ilonga kinautolu te nau fai ‘enau laka ki he fua ko eni, ‘ofa ke hifo kiate kinautolu ‘a e fiemālie mo e meesi, pea pehē foki ki he ha‘a ‘Isileli faka-‘Otua!

¹⁷Hili ‘eni, ke ‘oua na‘a fakangangau‘i au ‘e ha taha: he ko au ‘oku te ‘alu mo kita ‘a e ngaahi faka‘ilonga ‘o Sīsū, kuo tā ‘i hoku sino.

¹⁸Ko e kelesi ‘a hotau ‘Eiki ko Sīsū Kalaisi, ‘ofa, kāinga, ke ‘i homou laumālie ia! ‘Ēmeni.