Read KO E TOH TAPU KATOA TONGA ‘Efesō 2 Bible Online

‘Efesō 2 - KO E TOH TAPU KATOA TONGA bible

‘Efesō 2

¹PEA ko kimoutolu, na‘a mou mate ‘i ho‘omou ngaahi talangata‘a mo e angahala;

²‘a ia na‘a mou fou ai ‘i mu‘a ‘i he ‘alunga ‘o e nofo faka-e-maama-ko eni, ‘i he ‘alunga ‘o e ‘eiki ‘o e pule‘anga ‘o e ‘atā, ko e ‘eiki ‘o e fa‘ahinga laumālie ‘oku lolotonga ngāue ni ‘i he hako ‘o talangata‘a;

³‘a ia na‘a ta kau ai ‘a kitaua foki ‘i mu‘a, pea na‘a ta mo‘ui‘aki kotoa pē ‘a e fai ki he ngaahi holi ‘o hotau kakano, he‘eta feia ‘a e ngaahi tu‘utu‘uni ‘a hota kakano mo ‘eta ngaahi fakakaukau, pea na‘a ta nofo ai pē ko e fānau ‘o e houhau ‘i he ‘ulungāanga, ‘o hangē foki ko e kakai kotoa pē.

⁴Ka ko e ‘Otua, ‘a ia ‘oku ne mohu ‘alo‘ofa, ko e me‘a ‘i he ‘ofa lahi ‘a ia na‘a ne ‘ofeina ‘aki ‘a kitautolu,

⁵neongo kuo tau mate ‘i he ngaahi talangata‘a, na‘a ne kaungā fakamo‘ui hake kitautolu mo Kalaisi, (ko e kelesi pē kuo mou mo‘ui mei ai),

⁶pea ne kaungā fokotu‘u kitautolu mo ia, mo ne kaungā fakanofo mo ia ‘i he ngaahi feitu‘u ‘o langi ‘ia Kalaisi Sīsū:

⁷koe‘uhi ke ne fakahā atu ‘i he ngaahi kuonga ka hoko mai hono lahi ‘i he lahi ange fau ‘o ‘ene kelesi ‘aki ‘ene anga‘ofa kiate kitautolu ‘ia Kalaisi Sīsū.

⁸He ko e kelesi pē kuo mou mo‘ui mei ai, ko e me‘a ‘i ho‘omou tui; ‘io, na‘e ‘ikai meiate kimoutolu ia, ka ko e foaki mei he ‘Otua:

⁹na‘e ‘ikai tupu mei ha ngaahi ngāue, koe‘uhi ke ‘oua na‘a ai ha taha ‘e fa‘a pōlepole.

¹⁰He ko ‘ene ngaohi ‘a kitautolu, kuo fakatupu ‘ia Kalaisi Sīsū ke fai ‘a e ngaahi ngāue lelei, ‘a ia na‘e toka teuteu ‘e he ‘Otua ke tau fou ai.

¹¹Ko ia, mou manatu ki he taimi mu‘a, ‘a kimoutolu ‘oku Senitaile homou kakano, mou lau ko e Ta‘ekamu ‘e he fa‘ahinga ‘oku lau ko e Kamu (‘a e kamu ‘i he kakano pea fai ‘e he nima) —

¹²‘io, manatu, ko e taimi ko ia na‘e ‘ikai hamou kaunga ‘ia Kalaisi, ka mou nofo ko e kau fakahee‘i mei he pule‘anga ‘o ‘Isileli, ko e muli ta‘ekau ‘i he ngaahi fuakava ki he Tala‘ofa, ko e kau ta‘e-ha-‘amanaki-lelei, mo e kau taka he ‘univeesi ta‘ema‘u ‘a e ‘Otua.

¹³Ka ‘i onopooni, ‘ia Kalaisi Sīsū, ko kimoutolu na‘e mama‘o mu‘a, ne fakaofi ‘aki ‘a e ta‘ata‘a ‘o Kalaisi.[6]

¹⁴He ko hotau melino‘anga ia, ‘a ia na‘a ne ngaohi ‘a e ua ke taha; ‘io, na‘a ne holoki ‘aki hono kakano ‘a e ‘āvahevahe,

¹⁵‘a ia ko e fe‘ite‘itani, mo ne fakaka‘anga ‘a e lao fekau ‘a ia ko e koto tu‘utu‘uni pē, koe‘uhi ke ne ngaohi ‘a e ua ko ia ko ha tangata fo‘ou pē taha ‘iate ia, pea fakalelei ai;

¹⁶pea ‘i he‘eta sino taha ke ne toe fakalelei mo e ‘Otua ‘a kitaua ‘osi pē, ko e me‘a ‘i he Kolosi, he‘ene tāmate‘i ‘a e fe‘ite‘itani ‘i he me‘a ko ia.

¹⁷Pea ne ha‘u ‘o tala melino kiate kimoutolu na‘e mama‘o, mo tala melino ki he kakai na‘e ofi:

¹⁸he vakai, ko e me‘a ‘iate ia ‘oku ta fakatou apaapangofua ke hoko atu ki he Tamai, he‘eta Laumālie taha.

¹⁹Pea ko ia, ‘oku ‘ikai te mou kei ko e kau muli mo e ‘āunofo, ka ‘oku mou kolo taha mo e fa‘ahinga tapu, pea ‘oku mou ‘i he Fāmili ‘o e ‘Otua.

²⁰He kuo langa kimoutolu ki he makatu‘unga ko e kau ‘aposetolo mo e kau palōfita,[7] ko Sīsū Kalaisi ia ko hono maka taufatungamotu‘a;

²¹‘a ia ‘oku fai ai pē ‘i He‘ene ‘Afio ‘a e hokohoko lelei ‘o e fale kotoa, pea ‘oku faka‘a‘au hake ai pē ia ke hoko ko ha temipale tapu, tu‘u ‘i he ‘Eiki;

²²‘a ‘Ene ‘Afio ‘oku fakahoko ai ‘a kimoutolu foki ki he fale, mo‘o ‘afio‘anga ‘o e ‘Otua ‘i he Laumālie.