Read KO E TOH TAPU KATOA TONGA ‘Efesō 4 Bible Online

‘Efesō 4 - KO E TOH TAPU KATOA TONGA bible

‘Efesō 4

¹KO IA ‘oku ou tokoni atu, ‘a kita ‘oku te nofo pilīsone ko ‘ete ‘i he ‘Eiki, ke mou laka ‘o taau mo e lakanga na‘e ui kimoutolu ki ai,

²pea ō mo e fa‘a faka‘aki‘akimui mo e anga malū, pea ō mo e anga mokomoko ‘o mou fekātaki‘aki pē ‘i he ‘ofa,

³mo feinga ke tauhi ‘aki ‘a e no‘o ko e melino, ‘a e taha kuo fakatupu ‘e he Laumālie.

⁴‘Oku taha pē ‘a e Sino, pea taha ‘a e Laumālie, hangē foki ‘oku taha ‘a e ‘amanaki ‘oku tupu mei he ui na‘e ui‘aki kimoutolu.

⁵‘Oku taha pē ‘a e ‘Eiki, taha ‘a e Tui, taha ‘a e Papitaiso;

⁶taha ‘a e ‘Otua mo Tamai ‘a e kakai kotoa pē, ‘a ia ‘oku pule ki he kakai kotoa pē, pea ‘oku fou atu ‘i he kakai kotoa pē pea ‘oku nofo‘ia ‘a e kakai kotoa pē.

⁷Ka na‘e foaki kelesi kiate kitautolu tāutaha, ‘o fakafuofua ki he lahi ‘o e me‘a‘ofa ‘a Kalaisi.

⁸Ko ia ‘oku ne folofola ai, “Ne ne hā‘ele ki ‘olunga Ne ne taki pōpula ha koto pōpula, Pea ne foaki me‘a‘ofa ki he tangata.”

⁹Pea ko e lau ki he‘ene hā‘ele ki ‘olunga, ko e hā hano ‘uhinga ka ko eni pē, tā na‘a ne hā‘ele hifo foki ki Lolofonua.[8]

¹⁰Ko ia na‘a ne hā‘ele hifo, ko ia pē foki na‘a ne hā‘ele hake, ‘o ‘osi hifo ‘a e ngaahi langi; koe‘uhiā ke ne aoniu ‘i he me‘a kotoa pē.

¹¹Pea foaki pē ‘e ia ha ni‘ihi ‘oku ‘aposetolo, ha ni‘ihi ‘oku palōfita, ha ni‘ihi ‘oku ‘evangeliō, ha ni‘ihi ‘oku tauhi mo faiako:

¹²koe‘uhi ke ‘osi sāuni ‘a e kakai lotu ma‘a e ngāue tokoni, mo‘o langa hake ‘a e sino ‘o Kalaisi:

¹³kae‘oua ke tau a‘usia kotoa pē ‘a e tui taha mo e ‘ilo taha ki he ‘Alo ‘o e ‘Otua, ke a‘usia ‘a e tangata haohaoa, ke a‘usia ‘a e fua, ko e lahi ‘o e kakato ‘a Kalaisi.

¹⁴Koe‘uhi ke ‘oua na‘a tau kei tamaiki, ‘o felīlī‘aki mo fe‘ave‘aki fano ‘e he matangi fakaakonaki kotoa pē ‘oku tupu ‘i he fiemu‘a ‘a e kakai, ‘i he kākā ‘oku ngāue ke maau ‘a e me‘a fakahē:

¹⁵ka tau fai‘aki ‘a e totonu ‘i he ‘ofa, ‘o tau tupu hake ‘i he‘etau me‘a kotoa pē ke hokosi ‘a e toko taha ko ia, ‘a ia ko e ‘Ulu, ‘a Kalaisi:

¹⁶‘a ia ‘oku hokohoko lelei mei ai, mo fema‘uma‘utaki mei ai, ‘a e sino kotoa, pea fai ai pē ‘ene tupu mei he ngaahi fakahoko‘anga kotoa pē ‘o e tokoni, ‘i he ngāue ‘a e fo‘i me‘a takitaha ‘o taau mo ‘ene mafai, mo‘o langa hake ‘o e sino ‘i he ‘ofa.

¹⁷Ko ia, ko e me‘a ‘oku ou tala mo fakapapau atu ‘i he ‘Eiki, ‘a ‘eni, ke ‘oua te mou kei laka ‘o hangē ko e fai ‘a Senitaile; ‘a ia ‘oku nau fou ‘i he muna ‘a honau loto,

¹⁸kuo fakapo‘uli honau ‘atamai, kuo nau motu mei he mo‘ui ‘a e ‘Otua, ko e me‘a ‘i he vale ‘oku nofo‘ia kinautolu, ko e me‘a ‘i he fakafefeka honau loto:

¹⁹‘a ia ko e fa‘ahinga ‘oku ongonoa, pea nau li‘oa kinautolu ki he pau‘u, ke fai ‘a e anga‘uli kotoa pē ‘i he havala.

²⁰Ka tala‘ehai na‘e pehē ho‘omou ako Kalaisi:

²¹he ‘oku te pehē ko ia ia na‘a mou fanongo ki ai, pea ‘i ho‘omou ‘iate ia na‘a mou ako ‘i he ‘alunga ‘o e mo‘oni ‘oku hā ‘ia Sīsū —

²²‘o pehē, ke mou liliu ho‘omou tō‘onga mu‘a, ‘o hu‘ihu‘i ‘a e motu‘a tangata, ‘a ia ‘oku ‘au‘auha ko e me‘a ‘i he ngaahi holi ‘a kākā:

²³pea ke mou tuku ke fai ai pē homou fakafo‘ou ‘e he Laumālie ‘o homou ‘atamai;

²⁴pea ke mou kofu ‘aki ‘a e tangata fo‘ou, ‘a ia na‘e ngaohi ke hoko ki he ‘Otua ‘i he angatonu mo e mā‘oni‘oni ‘a Mo‘oni.

²⁵Pea ko eni, kuo tuku ‘a e loi, ko ia mou takitaha lea mo‘oni ‘i he feangai mo hono kaungā‘api; he ko e ngaahi kupu kitautolu ‘oku fekau‘aki.

²⁶‘Ita pē, kae‘oua ‘e angahala ai: ‘oua ‘e tuku ke tō ‘a e la‘ā ‘oku mou kei mamahi;

²⁷kae‘uma‘ā, ‘oua na‘a tuku ha ava ki he Tēvolo.

²⁸Ke ‘oua na‘a kei kaiha‘a ‘e he kaiha‘a: ka ne fakafitefita‘a mu‘a, ‘o ngāue‘aki ‘a e ongo nima ko ia ki he me‘a ‘oku lelei, koe‘uhi ke ai ha‘ane me‘a ke foaki ki he masiva.

²⁹‘Ilonga ha lea ‘e ‘ikai sia‘a, pea tapu ‘ene hū atu mei homou ngutu: ka ‘oka ai ha me‘a ‘oku ngali ‘aonga ‘i he faingata‘a ‘oku fai, ke ‘alu atu ia, hei‘ilo ‘e ma‘u tokoni mei ai ‘e he kakai ‘oku fanongo.

³⁰Pea ‘oua ‘e ‘ai ke mamahi ‘a e Laumālie Mā‘oni‘oni ko ia ‘o e ‘Otua, ‘a ia na‘e sila ‘aki kimoutolu ki he ‘aho huhu‘i.

³¹Ko e fakamahū kotoa pē mo e lili mo e ‘ita mo e fe‘ioho‘aki mo e lau‘ikovi, tuku ke hiki ia meiate kimoutolu, ‘io, mo e lotokovi kotoa.

³²Ka mou anga‘ofa mu‘a ‘i ho‘omou feangai, mo manava‘ofa, pea mou fefakamolemole‘aki, ‘o hangē foki ko e ‘Otua ne ne fakamolemole kimoutolu ‘ia Kalaisi. Ko ia, mou hoko mu‘a ko e kau fa‘ifa‘itaki ki he ‘Otua, ‘o taau mo e fānau kuo ‘ofeina:

³³pea fou ‘i he ‘ofa, ‘o hangē foki ko Kalaisi ne ne ‘ofa‘i kimoutolu, ‘o ne li‘oa ia koe‘uhi ko kimoutolu, ko e hifo mo e feilaulau ki he ‘Otua mo‘o ngangatu fakahōifua.