Read KO E TOH TAPU KATOA TONGA ‘Efesō 6 Bible Online

‘Efesō 6 - KO E TOH TAPU KATOA TONGA bible

‘Efesō 6

¹‘A e fānau, mou talangofua ‘i he ‘Eiki[11] ki ho‘omou mātu‘a: he ko hono totonu ia.

²“Faka‘apa‘apa ki ho‘o tamai mo ho‘o fa‘ē,” (ko e ‘uluaki fekau ia ‘oku ‘i ai hano tala‘ofa),

³“ka ke monū‘ia, pea ke nofo fuoloa ‘i māmani.”

⁴Pea ko kimoutolu ‘a e ngaahi tamai, ‘oua te mou faka‘ita‘i ho‘omou fānau; kae akonekina ‘aki ‘a e tautea mo e valoki ‘a e ‘Eiki.

⁵‘a e kau tamaio‘eiki, mou talangofua ki ho‘omou ngaahi ‘eiki fakasino ‘i he ‘apasia mo e tailiili; ‘o mou lototō ‘o hangē ko e fai kia Kalaisi.

⁶‘O ‘oua ‘e fakamamata pē, ‘o hangē ko ha fa‘ahinga ‘oku ngāue ke mālie‘ia ‘a e tangata pē; ka mou fai ko e kau tamaio‘eiki ‘a Kalaisi ‘oku feia ‘a e finangalo ‘o e ‘Otua:

⁷‘o mou ngāue, fie ngāue, mo loto lelei, ko e fai ki he ‘Eiki ‘o ‘ikai ki he tangata:

⁸ko ho‘omou ‘ilo, ‘ilonga ha lelei ‘e fai ‘e hamou toko taha, te ne ma‘u ‘e ia hono totongi mei he ‘Eiki, ko ia ai pē pe ko e pōpula, pe ko e tau‘atāina.

⁹Pea ko kimoutolu ‘a e ngaahi ‘eiki, mou fai pehē foki kiate kinautolu, ‘o tuku ‘a e fa‘a fakamana; ko ho‘omou ‘ilo ‘oku ‘afio ‘i langi ‘a e ‘Eiki ‘onautolu mo kimoutolu fakatou‘osi: pea ko e filifilimānako ‘oku ‘ikai ‘i he Toko Taha ko ia.

¹⁰Ngata mei heni, mou tuku ke fakakaukaua kimoutolu ‘i he ‘Eiki, ‘io, ‘i he ivi ‘o hono māfimafi.

¹¹‘Ai kiate kimoutolu ‘a e mahafu kotoa ‘a e ‘Otua, koe‘uhi ke mou lava ke tu‘u ki he ngaahi tu‘utu‘uni kākā ‘a e tēvolo.

¹²He tala‘ehai ko ‘etau milimilisino ni ko e fai mo ha toto mo kakano; kaekehe, ko e fai mo e fa‘ahinga pule, mo fa‘ahinga ma‘u tu‘unga, mo e hou‘eiki fakaleveleva ‘o e fakapo‘uli ni, mo e ngaahi kongakau laumālie ‘a e kovi ‘i he ngaahi feitu‘u ‘o langi.

¹³Ko ia, mou to‘o ‘a e mahafu kotoa ‘a e ‘Otua, koe‘uhi ke mou lava ke talitu‘u ‘i he ‘aho ‘o e fai mai ‘a e kovi; pea kuo lava kotoa pē kae tu‘u pē.

¹⁴Ko ia, ke mou tu‘u, kuo nono‘o ‘aki homou kongaloto ‘a e fai mo‘oni, pea kuo ‘ai ‘a e kofu tau ko e mā‘oni‘oni,

¹⁵pea kuo mou topuva‘e ‘aki ‘a e ‘osi teuteu mei he Kōsipeli fakamelino;

¹⁶kae‘uma‘ā kuo mou to‘o ‘a e pā ko e tui, ‘a ia te mou lava ‘aki ke tāmate‘i ‘a e ngaahi ngahau vela kotoa pē ‘a e fili.

¹⁷Pea mou ma‘u ‘a e tatā tau ko e fakamo‘ui, mo e heletā ‘a e Laumālie, ‘a ia ko e Folofola ‘a e ‘Otua:

¹⁸pea ‘i he faingamālie kotoa pē mou fai ho‘omou lotu ‘i he Laumālie ‘aki ‘a e fa‘ahinga hū kehekehe mo e kole, ‘o mou lama ke ma‘u ‘a e me‘a ko ia ‘i he fu‘u faka‘utumauku ‘o e hūfia ‘o e kāinga lotu kotoa pē;

¹⁹kae‘uma‘ā ‘a au, koe‘uhi, ka u ka tangaki hoku ngutu, pea ‘omi ha‘aku lea ke u fakahā mālohi ‘a e misiteli ‘o e Kōsipeli;

²⁰(‘a ia ‘oku ou nofo ai ni ko e fakafofonga ha‘isia) ‘io, koe‘uhi ke u lea mālohi ‘i he me‘a ko ia, ‘a ia ‘oku taau mo kita ke fai.

²¹Ka koe‘uhi ke mou ‘ilo foki ‘e kimoutolu ‘a ‘ete ngaahi me‘a mo ‘eku nofo, ko ia ‘e fakahā atu kotoa pē ‘e Tikiko, ko si‘i kāinga ‘ofeina, mo e tokoni lototō ‘i he ngāue ‘a e ‘Eiki:

²²‘a ia kuo u fekau tonu atu ki he me‘a ko ia, ke mou ‘ilo ai ‘emau ngaahi me‘a, pea ke ne fakafiemālie homou loto.

²³‘Ofa ke ma‘u ‘e he kāinga lotu ‘a e melino pea mo e tui ō mo e ‘ofa, mei he ‘Otua ko e Tamai mo e ‘Eiki ko Sīsū Kalaisi.

²⁴Ke nofo ‘a e kelesi mo e kakai kotoa pē, ‘a ia ‘oku ‘ofa ta‘e‘auha ki hotau ‘Eiki ko Sīsū Kalaisi.