Read KO E TOH TAPU KATOA TONGA Filipaí 1 Bible Online

Filipaí 1 - KO E TOH TAPU KATOA TONGA bible

Filipaí 1

¹TŪ KO KIMAUA, ‘a Paula mo Tīmote, ko e ongo tamaio‘eiki ‘a Kalaisi Sīsū, ko ‘ema tohi ki he kāinga lotu kotoa pē ‘oku ‘ia Kalaisi Sīsū, ‘oku nofo ‘i Filipai, kae‘uma‘ā ‘a e kau faifekau pule mo e kau akonaki.

²‘Ofa ke mou ma‘u kelesi mo e fiemālie mei he ‘Otua ko ‘etau Tamai mo e ‘Eiki ko Sīsū Kalaisi.

³Ka u ka fakamanatu kiate kimoutolu ‘oku ake ‘eku fakafeta‘i ki hoku ‘Otua,

⁴pea fai fiefia ma‘u ai pē ‘i he‘eku hū kotoa pē ‘a e hūfia ‘omoutolu fuli pē;

⁵koe‘uhi ā ko ho‘omou kautaha ke kauhaki‘i ‘a e Kōsipeli, talu mei he ‘uluaki ‘aho ‘o fai mai:

⁶he ko e me‘a ni ‘oku ou mātu‘aki tui ki ai, ko ia na‘a ne kamata ‘i homou loto ha ngāue lelei, te ne fai ai pē hono fakahaohaoa, ‘o a‘u ki he ‘aho ‘o Sīsū Kalaisi.

⁷Pea hala koā ‘eku ‘amanaki pehē ‘iate kimoutolu, he ‘oku ou tauhi ma‘u kimoutolu ‘i hoku loto; kae‘uma‘ā ‘i he‘eku nofo ha‘isia, pea ‘i he‘eku taukapo‘i mo poupou ‘a e Kōsipeli, ‘oku mou kau kotoa pē mo au ‘i he kelesi ‘oku ‘omi.

⁸Seuke, ko e ‘Otua ē ko ‘eku fakamo‘oni ki he lahi ‘o ‘eku feinga‘i kimoutolu ‘i he manava ‘o Kalaisi Sīsū.

⁹Pea ko ‘eku lotu ‘eni; ke toe tupulekina ‘o lahi hake ‘aupito ho‘omou ‘ofa, he‘ene ma‘u ‘a e ‘ilo kānokano mo e ongo‘i ‘o e totonu ‘i he me‘a kotoa pē;

¹⁰koe‘uhi ke mou sivi ‘o ‘ilo ‘a e ngaahi me‘a ‘oku lelei lahi, ka mou nofo hangataha mo ta‘emele, ‘o a‘u ki he ‘Aho ‘o Kalaisi;

¹¹kuo mou fonu ngutungutu ‘i he fua ‘o e mā‘oni‘oni, ‘a ia ‘oku fou mai ‘ia Sīsū Kalaisi ke lāngilangi‘ia mo fakamālō‘ia ai ‘a e ‘Otua.

¹²Pea ko eni, ke mou ‘ilo, kāinga, ko e ngaahi me‘a kuo hoko kiate au, tā kuo nau iku ki he fakangaholo ‘o e Kōsipeli.

¹³Ko ia, kuo ‘iloa ai hoku ngaahi ha‘i ‘i he ‘apitanga tau kotoa, pea ki he kakai kotoa pē, ‘o hā ko e tupu ‘i he‘eku kau kia Kalaisi.

¹⁴Kae‘uma‘ā ko e tokolahi ‘o e kāinga lotu, kuo langa hake ‘enau falala ki he ‘Eiki ‘e hoku ngaahi ha‘i, pea kuo fakautuutu ai ‘enau to‘a ‘i he lea‘aki ‘a e Folofola ‘a e ‘Otua[1] ‘o ta‘emanavahē.

¹⁵‘Oku mo‘oni ‘oku ‘i ai ha ni‘ihi ‘oku malanga‘aki ‘a Kalaisi ko e meheka foki, mo e fakafekāke‘i; ka ‘oku fai foki ‘e he ni‘ihi ko ‘enau lotolelei mai.

¹⁶Ko e ha‘a ‘ofa, ‘oku nau fai ko ‘enau ‘ilo ko hoku nafa ko e taukapo‘i ‘o e Kōsipeli:

¹⁷ka ko e ha‘a fakakikihi ‘oku nau ongoongoa ‘a Kalaisi, ka tala‘ehai ko ‘enau fai mo‘oni, ka ko ‘enau fakakaukau ke langa ai ha fakatanga ke kanoni hoku ngaahi ha‘i.

¹⁸Pea neongo e me‘a ke fēfē? Ko ia ai pē hono anga: pe ko e kofu ‘o ha me‘a, pe ko ha fai mo‘oni, kehe pē ‘oku ongoongoa ai ‘a Kalaisi, pea ‘oku ou fiefia ai;

¹⁹‘io, pea te u fiefia ai foki, he ‘oku ou ‘ilo ‘e iku ‘a e me‘a ko ia mōku fakamo‘ui, ko e me‘a ‘i ho‘omou hūfia mo e tokonaki ‘a e Laumālie ‘o Sīsū Kalaisi:

²⁰‘a ia ‘oku hoa mo ‘eku ‘amanaki tu‘u mo falala, ‘e ‘ikai fakamaa‘i au ‘e ha me‘a; kaekehe, hangē ko ia ‘i mu‘a, ‘e pehē foki ‘i onopooni, te u mālohi noa pē ‘i he fakahīkihiki‘i ‘o Kalaisi ‘aki hoku sino, pe ‘i he‘ene mo‘ui, pe ‘i he‘ene mate.

²¹He ko e me‘a kia kita, ko ‘ete mo‘ui ko Kalaisi ‘atā, pea ko ‘ete pekia ko e ‘āsili hoto fakakoloa.

²²Ka ‘o kapau ko ‘eku mo‘ui atu ‘i he kakano, kapau ko e me‘a ia ‘oku tu‘u ai ‘eku ma‘u fua he ngāue, pea tā ‘oku ‘ikai te u ‘ilo pe ko e hā te u fili ki ai.

²³Ka ‘oku fetohoaki au ‘e he me‘a ko ia ‘e ua; ‘oku hu‘u hoku loto ke tuku folau atu, ‘o nonofo mo Kalaisi; he ‘oku lelei lahi hake noa pē ia:

²⁴ka ko e nofo pē ‘i he sino ‘oku mamafa ange kiate au koe‘uhi ko kimoutolu.

²⁵Pea ‘i he‘eku ongo‘i pehē, ‘oku ou ‘ilo te u nofo pē ‘o mo‘ui atu ma‘amoutolu kotoa pē; ke fakalaka ki mu‘a ho‘omou lotu,

²⁶pea fai mo e fiefia: kae tupulekina ‘ia Kalaisi Sīsū homou vīkiviki‘anga na, ‘o tu‘unga ‘iate au, ko e me‘a ‘i he‘eku toe feangai mo kimoutolu.

²⁷Sino pē e me‘a, ho‘omou feangai fakaekimoutolu ‘o e Kolo, ke taau ia mo e Kōsipeli ‘o Kalaisi: koe‘uhi, pe te u ‘alu atu ‘o mamata, pe te u mama‘o pē ‘o fanongo ki ho‘omou ngaahi me‘a, kehe ke hā ‘oku mou tu‘u ma‘u, ‘o laumālie taha, ‘o mou loto uouangataha pē he fakafitefita‘a ma‘a e lotu fakakōsipeli;

²⁸pea ‘oku ‘ikai te mou ilifia ‘i ha me‘a ‘e taha ‘oku fai ‘e homou ngaahi fili: he ko e tō‘onga ko ia ko e faka‘ilonga mala‘ia kiate kinautolu, ka ko e faka‘ilonga ia ‘o homou fakamo‘ui: pea ko e faka‘ilonga foki mei he ‘Otua;

²⁹he ko e me‘a‘ofa kuo ne ‘atu kiate kimoutolu — ‘a e ngāue ke fai ma‘a Kalaisi — ‘oku ‘ikai ko e tui pē kiate ia pea ngata ai, ka ko e kātaki mamahi foki koe‘uhi ko ia:

³⁰he ‘oku mou fefa‘uhi mo e faingata‘a ai pē ko ia, ‘a ia na‘a mou sio mu‘a ai ‘iate au, pea ‘oku mou fanongo ni ‘oku ‘iate au.