Read KO E TOH TAPU KATOA TONGA Filipaí 2 Bible Online

Filipaí 2 - KO E TOH TAPU KATOA TONGA bible

Filipaí 2

¹KO IA, kapau ‘oku ‘i ai hamou akonaki ‘ia Kalaisi, kapau ‘oku ‘i ai ha‘amou fiemālie mei he ‘ofa, kapau ‘oku ‘i ai ha‘amou feohi ‘i he Laumālie,[2] kapau ‘oku ngaue homou fatu ‘i he ‘ofa, pea ai ha‘amou fai meesi,

²‘ē, mou fakakakato ‘eku fiefia, ‘i ho‘omou loto taha: ke taha ho‘omou ofa, pea mou uouangataha, pea hu‘ufataha ho‘omou feinga:

³‘o ‘oua ‘e feinga ki ha me‘a ko e fakafekāke‘i, pe ko e fie ongoongoa; ka ‘i ho‘omou loto ta‘ehiki mou takitaha lau ‘oku lelei hake ‘a hono kāinga ‘iate ia:

⁴pea ‘oua na‘a takitaha tokanga ki he‘ene me‘a ‘a‘ana pē, ka ki he me‘a ‘a e kakai kehe foki.

⁵‘Io, ke ‘iate kimoutolu ‘a e loto pehē, ‘a ia na‘e ‘ia Kalaisi Sīsū foki.

⁶‘A ia, neongo ‘ene ‘afio ‘i he anga ‘o e ‘Otua, ka na‘e ‘ikai te ne lau ‘ene tatau mo e ‘Otua ko e me‘a ke ha‘aki puke ki ai:[3]

⁷kaekehe na‘a ne fakamasivesiva‘i ‘e ia ia, he‘ene to‘o ‘a e anga ‘o e tamaio‘eiki, mo ‘ene hoko ‘i he tatau ‘o e tangata:

⁸pea ‘i he ‘iloange na‘e hā ‘iate ia ‘a e tō‘onga ‘a e tangata, na‘a ne fakamo‘ulaloa‘i ia, he‘ene hoko ko e fai talangofua ‘o a‘u ki he‘ene mate, ka ko e mate ‘i he kolosi.

⁹Ko hono ō pē ia foki na‘e mātu‘aki hākeaki‘i ai ia ‘e he ‘Otua, mo ne foaki kiate ia ha hingoa ‘oku mā‘olunga ‘i he hingoa kotoa pē:

¹⁰koe‘uhi ke ‘ilonga ha tui ‘i Langi mo Māmani mo Lolofonua[4] pea peluki ‘i he huafa ‘o Sīsū;

¹¹pea ‘ilonga hā ‘elelo, pea fakamo‘oni KO E ‘EIKI ‘A SĪSŪ KALAISI — mo‘o fakalāngilangi‘i ‘a e ‘Otua ko e TAMAI.

¹²Pea ko eni, si‘oku ‘ofa‘anga, kuo mou fai talangofua ai pē, ko ia ‘oua te mou ngāue ‘o hangē ko ha me‘a ia ke fai ‘i hoku ‘ao pē, ka ke fakautuutu ‘aupito ‘i he‘eku mama‘o ni ho‘omou ngāue ke lava‘i homou fakamo‘ui ‘omoutolu, ‘o fai ‘apasia pē mo tailiili:

¹³he ko e ‘Otua ia ‘oku ngāue ‘iate kimoutolu ke fakatupu ‘a e fie fai mo e mafai fakatou‘osi, koe‘uhi pē ko ‘ene tokanga ‘ofa mai.

¹⁴Mou fai ‘a e me‘a kotoa pē ‘o ta‘eha lāunga pe ha fakakikihi:

¹⁵koe‘uhi ke mou haohaoa mo ‘ata‘atā mei he kovi, ko e fānau ‘a e ‘Otua ‘oku ta‘emele ‘i he lotolotonga ‘o e to‘utangata anga pikopiko mo heke; ‘a ia ‘oku mou ulo ‘i honau ha‘oha‘onga ko e ngaahi māma‘anga ‘i māmani,

¹⁶ho‘omou takiloa atu ‘a e folofola ‘o e mo‘ui: koe‘uhi ke ai ha me‘a ke u pōlepole ai ‘i he ‘Aho ‘o Kalaisi, ko e ‘ikai iku noa ‘eku lele na‘e fai, pe iku noa ‘eku fakaongosia.

¹⁷‘Io, pea neongo ‘e lilingi hoku toto ko e kava ‘o e feilaulau ko ho‘omou lotu, mo hono hapai, fiefia pē au, ‘o u fakamālie kimoutolu kotoa pē:

¹⁸pea ke mou fiefia foki ‘i he me‘a ko ia, pea fakamālie kiate au.

¹⁹Ka ‘oku ou ‘amanaki pē ‘i he ‘Eiki ko Sīsū, ‘e toe si‘i pea u fekau atu ‘a Tīmote, koe‘uhi ke u fiemālie ‘e au foki ‘i ha‘aku ‘ilo ki ho‘omou ngaahi me‘a.

²⁰He ‘oku ‘ikai te u ma‘u mo ha taha ‘oku loto tatau mo au; ha taha te ne lotomo‘ua mo‘oni ki ho‘omou ngaahi me‘a:

²¹he ko kinautolu ni kotoa pē ‘oku nau kumi ‘enau me‘a ‘anautolu, ‘o ‘ikai ko e me‘a ‘a Sīsū Kalaisi.

²²Ka ‘oku mou ‘ilo ia ko e mo‘onia, he‘ene nofo kiate au, ‘o hangē ko e foha mo e tamai, ‘o ngāue mo au ki he Kōsipeli.

²³‘Io, ko e toko taha ko ia ‘oku ou ‘amanaki fekau atu, ‘oka u ka ‘ilo leva pe ‘e fēfē ‘a e ngaahi me‘a ‘oku kau kiate au.

²⁴Ka ‘oku te falala ki he ‘Eiki, ‘e toe si‘i pea u ‘alu atu mo au foki.

²⁵Ka kuo u fakakaukau ‘e lelei mu‘a ke fekau atu ‘a ‘Epafalotaito, ko e kaungā lotu, mo kaungā ngaue, mo kaungā tau ‘o‘oku, ka ko ho‘omou talafekau mo homou nima ‘i he tokoni ki he‘eku masiva.

²⁶He na‘a ne nofo holi pē kiate kimoutolu, mo hoha‘a lahi, koe‘uhi kuo mou fanongo ‘oku ne mahaki.

²⁷Pea ‘oku mo‘oni na‘a ne mahaki‘ia, ‘o tei pekia; ka na‘e ‘alo‘ofa ‘a e ‘Otua kiate ia; ‘io, ‘o ‘ikai kiate ia pē, ka kiate au foki, na‘a kanoni mamahi ‘eku mamahi.

²⁸Ko ia na‘e ‘āsili to‘oto‘o ai ‘eku tuku atu ia, koe‘uhi ke mou mamata kiate ia ‘o toe fiefia, pea si‘isi‘i ai mo ‘eku hoha‘a.

²⁹Ko ia, mou tali lelei ia ‘i he ‘Eiki mo e fu‘u fiefia, pea mou mahu‘inga‘ia ‘i he kakai pehē:

³⁰he ko e me‘a ‘i he ngāue ‘a e ‘Eiki na‘a ne ofi ki he mate; he na‘a ne va‘inga‘aki ‘ene mo‘ui koe‘uhi ke ne fai ‘a e me‘a na‘e toe, pea haohaoa ho‘omou tokoni kiate au.