Read KO E TOH TAPU KATOA TONGA Filipaí 3 Bible Online

Filipaí 3 - KO E TOH TAPU KATOA TONGA bible

Filipaí 3

¹KO ‘eku lea faka‘osi ‘eni, si‘oku kāinga; mou fiefia ‘i he ‘Eiki. Ko ‘eku tohi fakafanafana pehē atu tala‘ehai ko e me‘a fakafiu kiate au, pea ko e tu‘u homou lā mo e poupou.

²Vakavakai ‘a e fanga kulī na: vakavakai ‘a e kau ngāue ‘oku kovi: vakavakai ‘a e fa‘ahinga mutu.

³He ko kitaua pē ‘a e kamu mo‘oni, ‘a kitaua ‘oku ta fai ‘eta ngāue ki he ‘Eiki ‘i he Laumālie ‘o e ‘Otua, pea fai ‘eta pōlepole ‘ia Kalaisi Sīsū, pea ‘oku ‘ikai te ta falala ki he me‘a fakasino — neongo te te lava ‘e kita ke falala foki ki he me‘a fakasino.

⁴Ka ai ha taha ‘oku ne pehē te ne lava ke falala ki he me‘a fakasino, huanoa au:

⁵‘a au na‘a ku ‘aho valu leva pea kamu, na‘a ku tupu ko e ‘Isileli, ko ha ha‘a Penisimani, ko e Hepelū tupu mei he kau Hepelū; ka lau ki he Lao, ko e Fālesi au.

⁶Ka lau ki hono mamahi‘i, na‘a ku fakatanga‘i ‘a e siasi ko eni, ka lau ki he mā‘oni‘oni fakalao, ne u haohaoa.

⁷Ka ko e alā me‘a pehē, ‘a ia ko hoku fakakoloa ‘i mu‘a, kuo loa ‘eku lau ia ko e koto fakamasiva koe‘uhi ko Kalaisi.

⁸Seuke, ‘oku ou kei lau ni foki ‘a e ngaahi me‘a ko ia kotoa ko e koto fakamasiva, koe‘uhi ko ‘ene fungani ‘a e ‘ilo‘i ‘o Kalaisi Sīsū ko hoku ‘Eiki; ‘a ‘Ene ‘Afio na‘a ku tuku ai ke mole kotoa, ‘io, ‘o u lau ko e kinoha‘a pē, koe‘uhi ke fakakoloa ‘aki au ‘a Kalaisi;

⁹pea ke ‘ilo au ‘oku ou ‘iate ia, pea ‘oku ‘ikai te u ‘i ai mo au ‘eku mā‘oni‘oni ‘a‘aku, ‘a ia ‘oku mei he Lao, ka ko ia ‘oku founga ‘i he tui kia Kalaisi, ‘io, ko e mā‘oni‘oni ‘oku mei he ‘Otua, pea tefito ki he tui:

¹⁰ka u ‘ilo ni ‘a ‘Ene ‘Afio, mo e ‘aonga ‘o ‘ene toetu‘u, mo e kau ‘i he‘ene ngaahi mamahi, he fakatatau au ki he‘ene pekia;

¹¹hei‘ilo te u lava ke kau ‘i he toetu‘u ko ē mei he kau pekia.

¹²Tala‘ehai ko ‘eku pehē kuo u ma‘u ni, pe kuo ‘osi hoku fakahaohaoa; ka ‘oku ou tuli atu pē, hei‘ilo te u ala ki he me‘a ko ia na‘e ala ai ‘a Kalaisi kiate au.

¹³Kāinga, ‘oku ‘ikai[5] te u lau au kuo u ma‘u: ka ko e me‘a pē taha ‘oku ou fai; ‘oku ou fakangalongalo‘i ‘a e ngaahi me‘a kuo tuku ki mui, ka u kakapa atu ki he ngaahi me‘a mei mu‘a:

¹⁴‘o u tuli atu pē ki he ngata‘anga, ke ma‘u ‘a e pale ‘o hoto ui mei ‘olunga na‘e fai ‘e he ‘Otua ‘ia Kalaisi Sīsū.

¹⁵Ko ia, ‘ilonga kitaua ‘oku haohaoa ke pehē hota loto; pea ka ai ha me‘a ‘oku hā kehe ki homou loto, ‘e faifai pea faka‘ilo mo ia ‘e he ‘Otua kiate kimoutolu.

¹⁶Ka neongo pe ko e hā ha me‘a kuo ta a‘u ki ai, kehe ke fou atu ai pē ‘i he hala pē ko ia.

¹⁷Kāinga, mou kau ‘i he fa‘ifa‘itaki kiate au; pea mou vakai kiate kinautolu ‘oku tatau ‘enau laka mo e fa‘ifa‘itaki‘anga ‘oku mou ma‘u ‘iate kimaua.

¹⁸He ko e me‘a ki he laka ‘a e ni‘ihi, ‘a kinautolu na‘a ku fa‘a tala kiate kimoutolu, pea ‘oku ou toe tala ‘eni mo tangi, ko e ngaahi fili kinautolu ‘o e Kolosi ‘o Kalaisi:

¹⁹ko e fa‘ahinga ko honau iku‘anga ko e mala‘ia; ko e fa‘ahinga ‘oku ‘otua ki honau kete, pea ‘oku nau pōlepole ‘i he me‘a ‘oku fakamā; ‘a e fa‘ahinga ‘oku hu‘u ‘enau tokanga ki he ngaahi me‘a ‘o māmani.

²⁰He ko ho‘otautolu kolo ‘oku tu‘u ‘i langi, ‘a ia ko e potu ‘oku tau nofo‘aki tali ‘a e ha‘u mei ai ha Fakamo‘ui, ko e ‘Eiki ko Sīsū Kalaisi.

²¹‘A ia te ne liliu ‘a e sino ‘o ‘etau mo‘ulaloa ni ke alāanga mo e sino ‘o ‘ene lāngilangi‘ia; ko e ngāue ‘a hono ivi ko ia, ‘a ia ‘oku ne mafai ai foki ke fakamo‘ulaloa kiate ia ‘a e me‘a kotoa pē.