Read KO E TOH TAPU KATOA TONGA Filipaí 4 Bible Online

Filipaí 4 - KO E TOH TAPU KATOA TONGA bible

Filipaí 4

¹KO IA, si‘oku kāinga, ‘a ia ‘oku ou ‘ofa mo holi ki ai, ko si‘oku fiefia‘anga mo kalauni; ke pehē ho‘omou tu‘u ma‘u ‘i he ‘Eiki, si‘oku ‘ofa‘anga.

²‘Oku ou enginaki ‘a ‘Iuotia, pea ‘oku ou enginaki ‘a Siniteke, ke na loto taha ‘i he ‘Eiki.

³‘Io, ‘oku ou kole kiate koe foki, ko si‘i kaungā toho palau mo‘oni ‘o‘oku, ke ke tokoni ki he ongo fafine ko ia: he na‘a na kaungā fitefita‘a mo au ‘i he Kōsipeli, ‘o hangē foki ko Kelemeni, mo hono toe ‘o hoku kaungā ngāue, ‘a ia ‘oku tu‘u honau ngaahi hingoa ‘i he Tohi ‘o e Mo‘ui.

⁴Mou fiefia ‘i he ‘Eiki ma‘u ai pē: ‘io, ka u toe ‘ai atu, Mou fiefia.

⁵Ko ho‘omou anga na, ‘a e ta‘e te mou ha‘aki ‘eke ho‘omou ngaahi me‘a, tuku ke hā ia ki he kakai fuli pē. ‘Oku tu‘unuku mai ‘a e ‘Eiki.

⁶Neongo pe ko e hā ‘a e me‘a, ‘oua te mou lotomo‘ua ai; ka ‘i he me‘a kotoa pē tuku ke hā ki he ‘Otua ho‘omou ngaahi kole, ‘i he lotu mo e hūfia, pea fai mo e fakafeta‘i.

⁷Pea ko e nonga ‘a e ‘Otua, ‘a ia ‘oku mama‘o ‘i he tatae ‘o e ‘atamai kotoa pē, te ne malu‘i homou loto mo ho‘omou ngaahi fakakaukau ‘ia Kalaisi Sīsū.

⁸Ko ‘eku lea faka‘osi, kāinga. ‘Ilonga ‘a e ngaahi me‘a ‘oku mo‘oni, ‘ilonga ‘a e ngaahi me‘a ‘oku taau, ‘ilonga ‘a e ngaahi me‘a ‘oku totonu, ‘ilonga ‘a e ngaahi me‘a ‘oku ma‘a, ‘ilonga ‘a e ngaahi me‘a ‘oku faka‘ofo‘ofa, ‘ilonga ‘a e ngaahi me‘a ‘oku ongoongolelei, ‘io, ka ai ha ‘ulungāanga lelei, pea ka ai ha me‘a ‘oku fakamālō‘ia, ko e ngaahi me‘a ia ke mou tokanga ki ai.

⁹‘Io, ko e ngaahi me‘a na‘a mou ako, mo ma‘u, mo fanongoa, mo mamata, ‘iate au, ko e ngaahi me‘a ko ia ke mou fai; pea ‘e toki ‘iate kimoutolu ‘a e ‘Otua ‘oku ‘a‘ana ‘a e nonga.

¹⁰Pea ko eni, na‘a ku fiefia ‘aupito ‘i he ‘Eiki, koe‘uhi ko e faifai pea toe muka ho‘omou tokanga ki hoku fakatu‘umālie; ‘a ia foki na‘a mou tokanga ai pē ki ai, ka na‘e ‘ikai hamou faingamālie.

¹¹‘Oku ‘ikai te u lea pehē koe‘uhi pē ko ‘eku masiva; he ko e me‘a kia kita kuo u ako ke u fiemālie ai pē ‘i he me‘a ‘oku ou ‘i ai.

¹²‘Io, ‘oku ou lava ‘a e nofo mo‘ulaloa, pea ‘oku ou lava foki ‘a e mohu me‘a. Ne ako‘i au, ‘i he‘eku me‘a taau taha mo hono kotoa, ka u pōtopoto‘i ‘i he nofo mākona mo e nofo fiekaia, mo e nofo mohu me‘a mo e nofo masiva.

¹³‘Oku ou mafeia ‘a e me‘a kotoa pē ‘iate ia ‘oku ne fakakaukaua au.

¹⁴Ka neongo ia, ka na‘e mālō pē ho‘omou fai, ho‘omou kau mo au ‘i he‘eku mamahi ni.

¹⁵Kae‘uma‘ā ‘oku mou ‘ilo foki, kau Filipai, ‘i he fua ake ‘a e Kōsipeli, he taimi na‘a ku ‘alu ai mei Masitōnia, na‘e ‘ikai mo ha siasi ‘e ‘omi ha me‘a kiate au, ke ‘ai ki he tohi ‘o e ‘omi mo e ‘atu, ngata pē ‘iate kimoutolu.

¹⁶He na‘a mo ‘eku ‘i Tesalonaika, na‘e tu‘o taha, ‘io, ‘o tu‘o ua, ho‘omou ‘omi tokoni ki he‘eku masiva.

¹⁷Tala‘ehai ko ‘eku mamafa ki he me‘a‘ofa, ka ko e me‘a ‘oku ou mamafa ki ai, ke ai ha fua ‘e hulu atu ke tohi ma‘amoutolu.

¹⁸Ka ‘oku fe‘unga ‘eni mo ‘eku me‘a kotoa pē, pea hulu atu; ‘io, ‘oku ou fonu ngutungutu he‘eku ma‘u meia ‘Epafalotaito ‘a e me‘a na‘a mou tuku mai, ko e ngangatu fakahōifua ia ko e feilaulau ‘e tali ‘e he ‘Otua, pea tokotokangamālie ai hono finangalo.

¹⁹Pea ko hoku ‘Otua te ne fakaai ho‘omou masiva kotoa pē, ‘o fakatatau ki he koloa ‘oku ne ma‘u ‘i langi ‘ia Kalaisi Sīsū.

²⁰Pea ko e ‘Otua ko ‘etau Tamai, ke ‘o ‘Ene ‘Afio ‘a e kolōlia, ‘o lauikuonga pea ta‘engata, ‘Ēmeni.

²¹Mou tala hoku ‘ofa ‘ia Kalaisi Sīsū ki he kakai lotu tāutaha. ‘Oku ‘ofa atu ‘a e kāinga ‘oku nonofo mo au.

²²‘Oku ‘ofa atu ‘a e kakai lotu kotoa pē, pea lahi taha ‘a kinautolu ‘oku mei he Loto‘ā ‘o Sisa.

²³Ko e Kelesi ‘a e ‘Eiki ko Sīsū Kalaisi, ‘ofa ke ‘i homou laumālie ia.