Read KO E TOH TAPU KATOA TONGA Kolosé 1 Bible Online

Kolosé 1 - KO E TOH TAPU KATOA TONGA bible

Kolosé 1

¹TŪ ko kimaua — ‘a Paula ko e ‘aposetolo ‘a Kalaisi Sīsū ‘i he tu‘utu‘uni ‘a e ‘Otua, mo si‘i kāinga ko Tīmote — ko ‘ema tohi ki he kakai lotu ‘i Kolose, ko e kau tui ‘oku kāinga ‘ia Kalaisi.

²‘Ofa ke mou ma‘u kelesi mo e fiemālie mei he ‘Otua ko ‘etau Tamai.

³Ko e fakafeta‘i pē kuo ma fai ki he ‘Otua, ko e Tamai ‘a hotau ‘Eiki ko Sīsū Kalaisi, mo e hūfia ma‘u pē kimoutolu,

⁴talu ‘ema fanongo ki ho‘omou tui kia Kalaisi Sīsū, pea mo ho‘omou ‘ofa tauhi ma‘u ki he kau lotu kotoa pē;

⁵‘a ia ‘oku tupu mei ho‘omou ‘amanaki ki he me‘a kuo tuku tauhi ma‘amoutolu ‘i Hēvani: ‘a ia ne mou fanongo mu‘a ki ai ‘i he malanga‘aki ‘o e akonaki mei he Kōsipeli:

⁶‘a e Kōsipeli na‘e a‘u atu, pea ‘oku nofo mo kimoutolu, ‘o hangē foki ‘ene ‘i māmani kātoa, ‘o ne fakatupu fua mo mafola, ‘o hangē foki ‘ene fai ‘iate kimoutolu, talu e ‘aho ne mou fanongo ki hono tala ‘o e kelesi ‘a e ‘Otua, mo ongona, ‘i hono anga totonu:

⁷‘a ē ne mou ako ‘ia ‘Epafasi, ko si‘oma kaungā tamaio‘eiki ‘ofeina ‘omaua,[1] pea ko e faifekau ‘a Kalaisi kei lototō kiate kimaua;

⁸pea ko ia foki na‘a ne fakahā mai ho‘omou ‘ofa ‘i he Laumālie.

⁹Ko ia, ko kimaua foki, talu e ‘aho na‘a ma fanongo ki ai, ‘oku ‘ikai tuku ‘ema hūfia kimoutolu, mo ‘ema kōlenga ke mou pōtopoto‘i ‘i he ‘ilo ki hono finangalo, ko e me‘a ‘i he poto kehekehe mo e ‘ilo kehekehe ‘oku mei he Laumālie;

¹⁰koe‘uhi ke taau ho‘omou laka pea mo e ‘Eiki, ‘o hu‘u ki he me‘a kotoa pē te ne hōifua ai; ‘o mou fakatupu fua, ko e ngaahi ngāue lelei kehekehe; mo mou tupulekina ko e me‘a ‘i he ‘ilo ki he ‘Otua;

¹¹kuo fakamālohi kimoutolu ‘aki ‘a e mafai kotoa pē, ‘o taau mo e māfimafi ‘o ‘ene ‘Afio lāngilangi‘ia, ke mou lava ai ke kātaki fiefia ‘a e me‘a kotoa pē mo e kakai kotoa pē;

¹²mo mou fakafeta‘i ki he Tamai,[2] ‘a ia na‘a ne ngaohi kimoutolu ke mou taau ke ‘inasi ‘i he tofi‘a ko ia ‘o e kau mā‘oni‘oni ‘a ia ‘oku ‘i he maama —

¹³‘a ‘ene ‘Afio na‘a ne hamusi kitautolu mei he pule ‘a Po‘uli, mo ne hiki kitautolu ki he pule‘anga ‘o hono ‘Alo ‘Ofa‘anga:

¹⁴pea ‘i he‘etau tu‘u ‘iate ia kuo tau ma‘u ‘a e huhu‘i, ko e fakamolemole ‘etau ngaahi angahala;

¹⁵‘a ia ko e ‘Īmisi ia ‘o e ‘Otua ko e Ta‘ehāmai, ko e ‘Uluaki ia na‘e fakatupu, ko e Kimu‘a ‘i he me‘a kotoa pē kuo ngaohi:

¹⁶koe‘uhi na‘e tefito kiate ia ‘a e ngaohi ‘o e me‘a kotoa pē, ‘a e me‘a ‘i he langi mo e me‘a ‘i māmani, ‘a e me‘a hā mai mo e me‘a ta‘ehā mai, neongo ko ha fa‘ahinga ma‘u taloni, pe ko ha fa‘ahinga hou‘eiki, pe ko ha fa‘ahinga pule, pe ko ha fa‘ahinga ma‘u tu‘unga;

¹⁷‘io, kuo ngaohi ‘a e me‘a kotoa pē ‘iate ia pea ma‘ana, pea ko e mu‘a ‘a ‘Ene ‘Afio kae kimui ‘a e me‘a kotoa pē, pea ‘oku fema‘uma‘utaki ‘iate ia ‘a e me‘a kotoa pē:

¹⁸pea ko ‘Ene ‘Afio ko e ‘Ulu ‘o e Sino ko ia ko e Siasi; he ko e Kamata ia, ko e ‘Uluaki na‘e fakatupu mei he kau Pekia; koe‘uhi ke ne hoko ‘i he me‘a kotoa pē ko e Tu‘ukimu‘a.

¹⁹He na‘e finangalo ‘a Kātokatoa ke fale ‘i He‘ene ‘Afio;

²⁰pea ko e me‘a ‘iate ia ke toe fakalelei ‘a e me‘a kotoa pē ki He‘ene ‘Afio; ‘io, hili ‘ene fai ‘a e fakamelino ‘aki ‘a e ta‘ata‘a[3] ‘i he Kolosi ‘o‘ona, pea ke fakalelei ‘iate ia ‘a e ngaahi me‘a kotoa pē, pe ‘oku ‘i Māmani pe ‘oku ‘i Langi.

²¹Pea ko kimoutolu foki na‘e fakahee‘i mu‘a, pea mou nofo ko e ngaahi fili ‘i loto, ‘o hā ‘i ho‘omou ngaahi ngāue na‘e kovi; ka ‘i he taimi ni kuo ne fakalelei kimoutolu ‘aki ‘a e pekia ‘a hono sino kakano,

²²koe‘uhi ke ne ‘atu kimoutolu ‘oku mou mā‘oni‘oni mo ta‘emele mo ta‘elau‘i ‘i he‘ene ‘afio hifo.

²³Kehe ‘o kapau te mou nofo ma‘u ‘i he lotu, kuo pulusi ki he tu‘unga, mo ma‘uma‘uluta, pea ta‘emahiki mei he ‘amanaki fakakōsipeli; ‘a e Kōsipeli ko ia ‘a ia na‘a mou fanongo ki ai, ‘a ia ne malanga‘aki ki he me‘a mo‘ui kotoa pē ‘i he lalo langi, ‘a ia na‘a ku hoko, ‘a au Paula, ko hono faifekau.

²⁴Ko e me‘a ‘oku ou fai ‘i he taimi ni, ko e fiefia ‘i he‘eku ngaahi mamahi koe‘uhi ko kimoutolu, ‘o u fai ‘i hoku kakano ni ‘a e fakakakato ‘o e ngaahi mamahi ‘a Kalaisi ‘oku toe ke fai koe‘uhi ko hono sino ko e siasi:

²⁵‘a ia na‘a ku hoko au ko e faifekau ki ai, ke fai ‘a e lakanga na‘e tuku kiate au ma‘amoutolu, ‘a ia ko e sētuata ‘a e ‘Otua, ke ‘osiki ‘a e Folofola ‘a e ‘Otua —

²⁶‘a e misiteli ko ia ne fufū ‘i he ngaahi kuonga mo e ngaahi to‘utangata kuo hili, ka kuo fakae‘a ‘eni ki hono kakai tapu:

²⁷‘a ia na‘e finangalo ‘a e ‘Otua ke faka‘ilo kiate kinautolu hono lahi faufau ‘o e lāngilangi‘ia ‘o e misiteli ko ia ‘i he lotolotonga ‘o e Senitaile; ‘a ia ko eni, ko e ‘iate kimoutolu ‘a Kalaisi, ko e faka‘amanaki ki he lāngilangi‘ia.

²⁸‘A ia ‘oku mau ongoongoa, he‘emau valoki ‘a e tangata kotoa pē, mo akonekina ‘a e tangata kotoa pē, ‘aki ‘a e fa‘ahinga poto kotoa pē; koe‘uhi ke mau ‘atu ‘a e tangata kotoa pē kuo haohaoa ‘ia Kalaisi Sīsū.

²⁹Pea ‘oku te fai ke ongosia foki kita, ‘i he fefa‘uhi ke lava ‘a e me‘a ko ia; ‘o taau mo e ivi ‘o ‘Ene ‘Afio ‘oku ngāue ‘i hoku loto, ‘o fu‘u mālohi.