Read KO E TOH TAPU KATOA TONGA Kolosé 2 Bible Online

Kolosé 2 - KO E TOH TAPU KATOA TONGA bible

Kolosé 2

¹HE ‘oku ou loto ke mou mea‘i ‘a e fu‘u lahi ‘o e fefa‘uhi ‘oku ou fai koe‘uhi ko kimoutolu, mo e kāinga ‘i Leotisia, ‘io, ‘a kimoutolu kotoa pē kuo te‘eki ke mamata ki hoku mata fakasino;

²‘a ‘eku feinga ke fiemālie homou loto, he fetu‘utu‘utaki kimoutolu, ko e me‘a ‘i ho‘omou fe‘ofo‘ofani, pea koe‘uhi ke mou ‘osiki ‘a e fu‘u koloa ko ia, ko e ‘ilo fakapapau mo e ‘ilo kānokano, ‘io, ‘a e ‘ilo faka‘āufuli ki he misiteli faka‘otua, ‘a ia ko Kalaisi:[4]

³‘a ia ‘oku fa‘oaki ai hono kātokatoa ‘o e koloa poto mo e koloa ‘ilo, ‘o fufū pē.

⁴‘Oku ou lea pehē, koe‘uhi ke ‘oua na‘a fakahala‘i kimoutolu ‘e ha taha, ‘i ha‘ane lea fakaoleole.

⁵He neongo ‘oku ou mama‘o mo‘oni fakasino, ka ‘oku ou ‘iate kimoutolu ‘i loto, ‘o u fiefia pē, mo tokanga‘i ‘a e maau ‘o ho‘omou nofo, mo e aka taumama‘o ‘o ho‘omou tui kia Kalaisi.

⁶Ko ia, ko e me‘a ‘i ho‘omou ma‘u ‘a Kalaisi Sīsū ko e ‘Eiki, pea mou fou ‘iate ia pē;

⁷ko e kakai kuo aka ‘iate ia, pea ‘oku langa hake ‘iate ia, pea ‘oku faka‘a‘au ke kaukaua ‘i he lotu, ‘i hono anga na‘e akonekina ai kimoutolu, ‘o mou tupulekina ai, pea ō mo ia ‘a e fa‘a fakafeta‘i.

⁸Mou vakai na‘a faifai pea ai ha taha te ne fai‘aki ‘ene poto fie filōsefa, ‘a ia ko e koto muna mo e kākā, ‘o ne holataki kimoutolu ‘i he ‘alunga ‘o e ngaahi tu‘utu‘uni fakaeono‘aho ‘a e kakai, ‘io, ‘i he ‘alunga ‘o e ngaahi ‘elemēniti ‘o e lotu ‘a ia ‘oku fakamaama, ‘o ‘ikai ‘i he ‘alunga faka-Kalaisi.

⁹Koe‘uhi ‘oku fale ‘i He‘ene ‘Afio hono kātokatoa ‘o e ‘Otua, ‘o nofo sino;

¹⁰pea kuo mou ‘osi fonu ‘i ho‘omou tu‘u ‘iate ia, ‘a ‘Ene ‘Afio ‘a ia ko e ‘ulu ‘o e fa‘ahinga pule mo ma‘u tu‘unga kotoa pē.

¹¹Pea na‘e kamu foki ‘a kimoutolu ‘iate ia, ko ha kamu ta‘efai ‘e ha nima, ko e hu‘ihu‘i ‘o e sino kakano‘ia, ko e kamu ‘oku ‘a Kalaisi:

¹²‘a ia na‘e fai ‘i homou kaungā telio mo ia ‘i he papitaiso, pea ‘i he me‘a ko ia na‘e kaungā fokotu‘u kimoutolu mo ia, ko e me‘a ‘i ho‘omou tui ki he ngāue ‘a e ‘Otua, ‘a ‘ene fokotu‘u ia mei he pekia.

¹³Ko kimoutolu foki, lolotonga na‘a mou mate ‘i ho‘omou ngaahi faihala, pea ‘i ho‘omou ta‘ekamu, ‘a ē ko ho‘omou kei kakano‘ia, na‘a ne kaungā fokotu‘u hake kimoutolu mo ia, hili ‘ene fakamolemole ‘etau ngaahi faihala kotoa pē.

¹⁴‘Io, hili ‘ene tāmate‘i ‘a e tohi ne fakamo‘ua kitautolu ‘aki hono ngaahi tu‘utu‘uni, ‘a e tohi ko ia na‘e tu‘u ko hotau fili: ‘io, kuo ne ‘ave ‘a e tohi mo ‘ene pūnufu‘u mai, he na‘a ne tukifa‘o ia ki hono Kolosi;

¹⁵mo ne hu‘ihu‘i meiate ia ‘a e kau pule mo e kau ma‘u tu‘unga,[5] ‘o ne mātu‘aki faka‘ali‘ali kinautolu, he‘ene sipikaki kinautolu ‘i He‘ene ‘Afio.

¹⁶Ko ia, ke ‘oua na‘a ai ha taha te ne anga‘i kimoutolu ‘i ha kai pe ha inu, pe ‘i ha me‘a hangē ko ha kātoanga, pe ha fakamāhina fo‘ou, pe ha Sāpate;

¹⁷he ko e ngaahi me‘a ko ia ko ha ‘ata pē ‘o ha ngaahi me‘a ka hoko, ka ko e sino ‘o e ngaahi me‘a ko ia ‘oku tefito kia Kalaisi.

¹⁸Pea ke ‘oua na‘a fakahala‘i kimoutolu ‘e ha taha ke mole homou pale, he‘ene loto ke fou ‘i he “fakavaivai” tokua, mo e lotu ki ha kau ‘āngelo, he‘ene ‘eke noa pē ki he ngaahi me‘a tokua “kuo ne sio ki ai,” kuo fakafuofuolahi ia ko e me‘a ‘i hono “‘atamai” tokua, (‘a e ‘atamai ‘o hono kakano);

¹⁹ka ko e taha ‘oku ‘ikai kuku ki he ‘Ulu, ‘a ia ‘oku ma‘u tokoni mei ai, pea ‘oku fema‘uma‘utaki mei ai, ‘a e sino kotoa, ko e me‘a ‘i he ngaahi hokotanga hui mo e ngaahi uoua, ‘o ne tupu ai, ko e tupu faka‘otua.

²⁰‘Ē, kapau leva na‘a mou kaungā pekia mo Kalaisi, ‘o ‘ata‘atā ai mei he ngaahi ‘elemēniti ‘o e lotu ‘a ia ‘oku fakamaama, ko e hā ‘oku mou fai ‘o hangē ‘oku mou kei mo‘ui fakamaama, ‘e kātaki ke tu‘utu‘unia kimoutolu ‘i he falengā tu‘utu‘uni mo akonaki ‘a e tangata;

²¹‘o pehē, ‘Oua ‘e ala ki ai, ‘uma‘ā ha kamata, ‘io, pe momo‘i lave ki ai —

²²‘osi, ko e ngaahi me‘a ia kotoa pē ‘oku nofo ke ‘auha ‘i hono kai —

²³‘a ia ko e fa‘ahinga tu‘utu‘uni ‘oku matamata poto mo‘oni ko e ‘i ai ha fakalahi ‘o ‘ete lotu, mo ha fu‘u fakavaivai, mo e ta‘ema‘ema‘ekina hoto sino; ka ‘oku ‘ikai ko e ‘i ai ha‘ane momo‘i ‘aonga ke ta‘ofi ‘a e fai ke topono ‘a e kakano.