Read KO E TOH TAPU KATOA TONGA Kolosé 3 Bible Online

Kolosé 3 - KO E TOH TAPU KATOA TONGA bible

Kolosé 3

¹PEA kapau leva na‘e kaungā fokotu‘u kimoutolu mo Kalaisi, pea mou ngāue ki he ngaahi me‘a ‘o ‘olunga, ‘a e potu ‘oku ‘i ai ‘a Kalaisi, he‘ene ‘Afio mei he to‘omata‘u ‘o e ‘Otua.

²Ke hu‘u ho‘omou tokanga ki he ngaahi me‘a ‘o ‘olunga, ‘o ‘ikai ki he ngaahi me‘a ‘oku ‘i māmani;

³he kuo mou pekia, pea ko ho‘omou mo‘ui ‘oku fufū fakataha mo Kalaisi ‘i he ‘Otua.

⁴Pea ka ‘iloange ‘e fakahā mai ‘a Kalaisi, ‘a ia ko ‘etau mo‘ui, pea ‘e toki fakahā ‘a kimoutolu foki fakataha mo ia ‘i he lāngilangi‘ia.

⁵Ko ia, mou ‘ai ke mate leva homou ngaahi kupu ‘oku ‘i māmani, ko e fe‘auaki, anga‘uli, havala, holi pango; kae‘uma‘ā ‘a e mānumanu, ‘a ia ko e tauhi ‘aitoli tofu pē ia:

⁶he ko e ngaahi me‘a ko ia ‘oku hoko mei ai ‘a e houhau ‘a e ‘Otua.[6]

⁷Ko e ngaahi me‘a ko ia na‘e fou ai ‘a kimoutolu ‘i mu‘a, lolotonga na‘a mou kei mo‘ui ki he ngaahi me‘a ko ia.

⁸Ka ‘i he taimi ni ke mou tuku ‘e kimoutolu foki ‘a e me‘a pehē kotoa pē, ‘a e ‘ita, ‘a e lili, ‘a e lotokovi; ta‘ofi homou ngutu mei he lau‘ikovi mo e kape.

⁹‘Oua ‘e loi ‘i ho‘omou feangai, he kuo mou hu‘ihu‘i ‘a e motu‘a tangata, mo ‘ene ngaahi falengā ngāue;

¹⁰pea kuo mo ‘ai ‘a e tangata fo‘ou, ‘a ia ‘oku fai ai pē hono fakafo‘ou ‘i he ‘īmisi ‘o ‘Ene ‘Afio na‘a ne ngaohi ia, ke ne hokosi ‘a e ‘ilo kānokano:

¹¹pea ko e tu‘u ko ia ‘oku ‘ikai ai ke Kalisi mo Siu, ke kamu mo ta‘ekamu, ke pāpeliane, Sitia, pōpula, tau‘atāina: ka kuo hoko ia kotoa ko Kalaisi pē, pea ko Kalaisi ‘oku ‘i ai takitaha.

¹²Ko ia, ke mou fai ‘o taau mo e kau fili ‘e he ‘Otua, ‘a ia ‘oku tapu mo ‘ofeina ‘o mou ‘ai; ‘a e fatu ‘oku langa ‘i he fai meesi mo e anga‘ofa mo e faka‘aki‘akimui mo e anga kātaki mo e anga mokomoko;

¹³pea ka ai ha taha ‘oku ne kovi‘ia ‘i ha taha ‘i ha me‘a, ke mou fekātaki‘aki pē mo fefakamolemole‘aki; ‘io, ‘o hangē foki ne fakamolemole kimoutolu ‘e he ‘Eiki, ke pehē pē mo kimoutolu.

¹⁴Pea mou kofu tu‘a ‘aki ‘a e ngaahi me‘a ko ia kātoa ‘a e ‘ofa, ‘a ia ko e fakama‘u ‘o e haohaoa.

¹⁵Pea tuku ‘a e fakamelino ‘a Kalaisi ke fakamaau ‘i homou loto, ‘a ia foki na‘e fakaului kimoutolu ke lava ‘i ho‘omou sino taha: kae‘uma‘ā ke mou hoko ko e kau fai fakafeta‘i.

¹⁶Ke mātu‘aki nofo‘ia kimoutolu ‘e he folofola ‘a Kalaisi, ‘o tu‘u ‘i he fa‘ahinga poto kotoa pē: ‘o mou fefai‘aki homou akonekina mo e valoki ‘aki ‘a e ngaahi Saame, mo e ngaahi himi, mo e ngaahi hiva fakalaumālie, ‘o fai fakakelesi pē, mo mou hiva ‘i homou loto ki he ‘Eiki.

¹⁷Pea neongo pe ko e hā ha me‘a te mou fai, ha lea, pe ha ngaue, mou fai kotoa pē ‘i he huafa ‘o e ‘Eiki ko Sīsū, mo mou fakafeta‘i ‘iate ia ki he ‘Otua ko e Tamai.

¹⁸‘a e kau fefine, mou anganofo ki homou ngaahi husepāniti, ‘a ia na‘e taau leva ke mou fai he ko e kakai lotu.

¹⁹‘a e kau tangata, mou ‘ofa ki homou ngaahi uaifi, ‘o ‘oua ‘e kona homou loto kiate kinautolu.

²⁰‘a e fānau, mou talangofua ki ho‘omou mātu‘a ‘i he me‘a kotoa pē, he ko e me‘a faka‘ofo‘ofa ia ‘i he lotu.

²¹‘a e ngaahi tamai, ‘oua te mou fakahoha‘asi ho‘omou fānau, na‘a faifai pea nau loto kina.

²²‘a e kau tamaio‘eiki, mou talangofua ki ho‘omou ngaahi ‘eiki fakasino ‘i he me‘a kotoa pē; ‘o ‘ikai ‘i he fai fakamamata, ‘o hangē ko ha kakai kimoutolu ‘oku fai ke mālie‘ia ‘a e tangata pē, ka mou fai lototō pē, telia ‘a e ‘Eiki.

²³‘Ilonga ha me‘a te mou fai, ngāue fie ngāue ki ai, he ko e ngāue ki he ‘Eiki, ‘o ‘ikai ki he kakai:

²⁴‘o mou ‘ilo, ko e ‘Eiki ia te mou ma‘u mei ai ‘a e totongi totonu, ko e ma‘u tofi‘a. Ko e ‘Eiki, ko Kalaisi ia ‘oku mou nofo tamaio‘eiki ki ai.

²⁵Seuke, ‘ilonga ‘a ia te ne ngāue ta‘etotonu te ne ma‘u ‘a e totongi ‘o ‘ene ngāue ta‘etotonu na‘e fai: pea tala‘ehai ‘oku ‘i ai ha filifilimānako.

²⁶‘a e ngaahi ‘eiki, mou fai ho‘omou ngāue foki, ‘o ‘atu ki ho‘omou kau tamaio‘eiki ‘a e me‘a ‘oku totonu mo taau, ko ho‘omou ‘ilo ‘oku ‘i ai hamou ‘Eiki foki ‘i Langi.