Read KO E TOH TAPU KATOA TONGA Tesalonaiká 1 2 Bible Online

Tesalonaiká 1 2 - KO E TOH TAPU KATOA TONGA bible

Tesalonaiká 1 2

¹SEUKE, ‘oku mou lāu‘ilo, kāinga, ‘a e anga ‘o ‘emau hoko atu kiate kimoutolu; tala‘ehai ko e me‘a ma‘ama‘a.

²Kaekehe, neongo kuo toki fakamamahi‘i kimautolu mo ngaohikovi‘i ‘i Filipai, ‘a ia ‘oku mou ‘ilo ki ai, ka ko e me‘a ‘i homau ‘Otua na‘a mau fai mālohi ‘emau malanga‘aki ‘a e Kōsipeli ‘a e ‘Otua kiate kimoutolu, neongo na‘e lahi ‘a e faingata‘a.

³He ko ‘emau fai akonaki ‘oku ‘ikai tupunga ‘i ha‘amau hē, ‘uma‘ā ha‘amau tokanga ta‘etaau, mu‘a hake hano fai fakahekeheke.

⁴Ka ko e anga na‘a mau anga‘aki ‘i homau sivi ‘e he ‘Otua, pea lelei ai kiate ia ke tuku kiate kimautolu ‘a e Kōsipeli, ko ia ia ‘oku mau lea ai ni: ‘oku ‘ikai te mau fai ke mālie‘ia ai ‘a e kakai, ka ko e ‘Otua, ‘a ia ‘oku ne sivi homau loto.

⁵‘Io, ‘anefē ha‘amau fai ha lea ko e fakalai? ‘oku mou ‘ilo pē; pea ‘anefē ha‘amau fai ha me‘a ‘a ia ko e kofu pē ‘o ha‘amau mānumanu? ko e ‘Otua ē ko e fakamo‘oni ki ai.

⁶Pea ‘anefē ha‘amau tangi ke fakahīkihiki‘i ‘e he kakai, ‘e kimoutolu, pe ‘e ha kakai kehe? ka na‘e faingofua pē ‘emau fai faka‘ei‘eiki, he ko e kau ‘Aposetolo ‘a Kalaisi.

⁷Kaekehe na‘a mau ‘i homou lotolotonga ‘o angalelei pē; hangē tofu pē ha fefine toutama[1] ‘a ia ‘oku ne tauhi si‘ene fānau ‘a‘ana,

⁸pehē ‘i he‘emau ‘ofa u‘uu‘u kiate kimoutolu na‘a mau faka‘amu ke ‘atu, ‘o ‘ikai ko e Kōsipeli pē ‘a e ‘Otua, ka ko si‘emau mo‘ui foki — kae fēfē, he ne mou hoko ko homau ‘ofa‘anga.

⁹He ‘oku mou manatu, ‘e kāinga, ‘emau fakaongosia mo ‘emau fakafitefita‘a. Na‘a mau malanga‘aki ‘a e Kōsipeli ‘a e ‘Otua kiate kimoutolu, ka mau ngāue ‘i he ‘aho mo e pō kiate kimautolu, ke ‘oua na‘a fakamafasia hamou toko taha.

¹⁰Ko kimoutolu ‘a e fakamo‘oni, ‘io, mo e ‘Otua foki, ki he molumalu mo totonu mo ta‘emele ‘emau fakafeangai kiate kimoutolu ‘a e kau lotu.

¹¹‘Ā, ‘oku mou ‘ilo pē, hangē ko e fai ‘a ha tamai ki he‘ene fānau ‘a‘ana, na‘e pehē ‘emau enginaki kimoutolu tāutaha, mo lōtaki, mo tapou.

¹²Ke mou laka ‘o taau mo e ‘Otua, ‘a ia ‘oku ne ui kimoutolu ke hū ki hono pule‘anga mo hono lāngilangi.

¹³Ko ia, ko kimautolu foki ‘oku mau fai ta‘etuku ‘emau fakafeta‘i ki he ‘Otua; koe‘uhi ‘i ho‘omou tali ‘a e folofola ongo telinga — ‘a ia na‘e fakafofonga ‘iate kimautolu, ka ko e me‘a ‘a e ‘Otua — fakafeta‘i na‘e ‘ikai ko e lea ‘a e tangata na‘a mou ma‘u, ka ko e folofola ‘a e ‘Otua, he ko ia mātē pē, pea ko e me‘a foki ‘oku ngāngāue ‘iate kimoutolu ‘oku tui.

¹⁴He vakai, na‘a mou hoko, kāinga, ko e kau fa‘ifa‘itaki ki he ngaahi siasi ‘a e ‘Otua, ‘a e ngaahi siasi ‘i Siutea ‘oku ‘ia Kalaisi Sīsū; he ‘oku tatau homou tautekovia ‘e homou kakai pea mo kinautolu ‘e he kakai Siu.

¹⁵‘a e fa‘ahinga na‘a nau fakapoongi ‘a Sīsū ko e ‘Eiki, mo e kau palōfita, pea fakafe‘ātungia kimautolu: pea ‘oku ‘ikai te nau fai ha anga ‘oku mālie ki he ‘Otua; pea ko e fakafili ki he kakai kotoa pē, he‘enau ta‘ofi ‘emau malanga ki he Senitaile ke nau mo‘ui.

¹⁶‘Ā, ko e fai ai pē ke fakakakato ‘enau ngaahi hia; ka kuo tō kiate kinautolu ‘a e houhau ‘o li‘oa mai.

¹⁷Pea ko kimautolu, kāinga, ‘i homau vaetu‘ua meiate kimoutolu; (ko ‘etau femātaaki pē na‘e vaetu‘ua, kae ma‘u pē ‘a e loto) kuo te‘eki ke meimei houa, pea makehe atu ‘emau feinga ke tau toe femātaaki ko e holi ka ko ha holi.

¹⁸Ko ia, na‘a mau tokanga ke ‘alu atu, ‘io, ‘e au Paula; ‘o ‘ikai tu‘o taha pē, kae tu‘o ua: ka na‘e felei homau hala ‘e Sētane.

¹⁹He kofa‘ā ia homau ‘amanaki‘anga, mo e fiefia‘anga mo e pale te mau pōlepole ai ‘i he ‘ao ‘o hotau ‘Eiki ko Sīsū, ‘oka hā mai? ‘Ikai ko kimoutolu foki?

²⁰‘Io, ko kimoutolu ko homau fakalāngilangi, mo homau fakafiefia.