Read KO E TOH TAPU KATOA TONGA Tesalonaiká 1 3 Bible Online

Tesalonaiká 1 3 - KO E TOH TAPU KATOA TONGA bible

Tesalonaiká 1 3

¹KO IA, ‘i he ‘ikai te ma kei fakama‘uma‘u, na‘a ma pehē, ‘e lelei mu‘a ke tuku au toko taha ‘i ‘Ātenisi;

²ka u fekau atu ‘a Tīmote ko si‘i tokoua ‘omaua, pea ko e kau ngāue mo e ‘Otua ‘i he Kōsipeli ‘o Kalaisi; koe‘uhi ke ne poupou kimoutolu, pea ke ne enginaki telia ho‘omou lotu:

³ke ‘oua na‘a ue‘i ha toko taha ‘i he ngaahi mamahi ko ia. Seuke, ‘oku mou lāu‘ilo ko e me‘a ia ‘oku tau nofo ki ai.

⁴He na‘a mo e taimi ko ia na‘a mau ‘iate kimoutolu ai, na‘a mau sinaki tala atu, ko hotau nafa ke fakamamahia — ‘a ē ā kuo hoko foki, pea kuo e‘a ni ia kiate kimoutolu.

⁵Ko hono ‘uhinga ia na‘e ‘ikai te u kei mafakama‘uma‘u ai ‘e au foki, ka u fekau atu ke u ‘ilo ki ho‘omou lotu, na‘a ‘iloange kuo fai homou ‘ahi‘ahi‘i ‘e he Toko Taha-Fakatauvele, pea hoko ‘emau ngangau ko e kulanoa.

⁶Ka kuo toki lava mai ‘a Tīmote meiate kimoutolu, pea kuo ne talanoalelei‘ia mai ho‘omou tui mo ho‘omou ‘ofa; kae ‘uma‘ā ho‘omou manatu ‘ofa mai ma‘u ai pē; mo ho‘omou holi ke sio kiate kimautolu, ‘o hangē tofu pē ko ‘emau holi ke mamata atu.

⁷Pea ‘i he‘emau fanongo ki he me‘a ko ia, kāinga, neongo e fu‘u faingata‘a mo e mamahi na‘a mau ‘i ai, ka na‘a mau ma‘u fiemālie ‘iate kimoutolu koe‘uhi ko ho‘omou tui.

⁸Seuke, kuo mau mo‘ui leva ‘o kapau ‘oku mou tu‘u ma‘u ‘i he ‘Eiki.

⁹‘Io, ko e hā ha fakafeta‘i te mau fa‘a ‘atu ki he ‘Eiki koe‘uhi ko kimoutolu, ke hoa mo e fu‘u fiefia ‘oku mau fiefia ‘aki ‘i he ‘ao ‘o homau ‘Otua, koe‘uhi ā ko kimoutolu.

¹⁰Pea ‘oku makehe ange fau ‘emau lotu ‘i he pō mo e ‘aho ke tau femātaaki, pea ke mau fakakakato ‘a e ngaahi me‘a ‘oku mou kei tōmui ai ‘i he lotu.

¹¹Pea tauange mo e ‘Afio ‘a e ‘Otua ko ‘etau Tamai, mo hotau ‘Eiki ko Sīsū, ke ne faka‘atā homau hala kiate kimoutolu!

¹²Pea ‘ofa ke ngaohi kimoutolu ‘e he ‘Eiki ke lahi mo hulu atu ho‘omou fe‘ofa‘aki, mo ho‘omou ‘ofa ki he kakai kehe, ‘o hangē ko e ‘ofa ‘amautolu kiate kimoutolu!

¹³Koe‘uhi ke ne fakatu‘uma‘u homou loto, ke ta‘emele hono mā‘oni‘oni ‘i he ‘ao ‘o e ‘Otua ko ‘etau Tamai, ‘oka hoko mai hotau ‘Eiki ko Sīsū ‘oku ha‘ofia ia ‘e he‘ene kau mā‘oni‘oni kotoa pē.[2]