Read KO E TOH TAPU KATOA TONGA Tesalonaiká 1 5 Bible Online

Tesalonaiká 1 5 - KO E TOH TAPU KATOA TONGA bible

Tesalonaiká 1 5

¹PEA ko e me‘a ki he ngaahi taimi mo e ngaahi kuonga, kāinga, koe‘uma‘ā ha‘amau tohi atu.

²He ‘oku mou ‘ilo kānokano, ko e hoko mai ‘a e ‘aho ‘o e ‘Eiki ‘oku hangē ko e ha‘u ‘a e kaiha‘a ‘i he pō.

³Tokaange ha taimi ‘oku nau pehē, ‘Oku tau lelei mo tu‘umālie, fakafokifā ‘oku tu‘u mai ‘a mala, ‘o hangē ko e langā ki he fefine feitama: pea ‘e ‘ikai ‘aupito te nau hao.

⁴Ka tala‘ehai ‘oku mou ‘i he po‘uli, kāinga, ke mo‘utāmakia kimoutolu ‘e he ‘aho ko ia, ‘o hangē ha kaiha‘a.

⁵He ko e fānau kimoutolu kotoa pē ‘a e maama, mo e fānau ‘a e ‘aho; ‘oku ‘ikai ‘a e pō kitaua, ‘uma‘ā ‘a e po‘uli.

⁶‘Āua; pea ke ‘oua te ta mohe ‘o hangē ko e kakai kehe, ka ta ‘ā pē ‘o faka‘ehi‘ehi mei he konā.

⁷He ko kinautolu ‘oku mohe ‘oku mohe ‘i he pō; pea ko kinautolu ‘oku konā ‘oku konā ‘i he pō.

⁸Ka ko kitaua ko e kakai ‘o e ‘aho; ko ia, ta faka‘ehi‘ehi mu‘a mei he konā. Kae‘uma‘ā kuo ta ‘ai ‘a e kofu tau ko e tui mo e ‘ofa, pea mo e ‘amanaki mo‘ui mo‘ota tatā tau.

⁹He na‘e ‘ikai ke tu‘utu‘uni kitaua ‘e he ‘Otua ke houhau‘ia, ka ke lava‘i mai ‘a e fakamo‘ui ‘i hota ‘Eiki ko Sīsū Kalaisi;

¹⁰‘a ia na‘a ne pekia koe‘uhi ko kitaua, koe‘uhi, pe ‘oku ta ‘ā, pe ‘oku ta mohe, kehe ke ta fakataha ‘i he mo‘ui feangai mo ia.

¹¹Ko ia, ke mou fetokoni‘aki kimoutolu, pea fefai‘aki homou langa hake, hangē ā foki ‘oku mou fai.

¹²Pea ko eni ‘oku mau kole kiate kimoutolu, kāinga, ke mou ‘ilo ‘a kinautolu ‘oku fakafitefita‘a ‘iate kimoutolu, pea ‘oku ‘anautolu homou pule‘i ‘i he ‘Eiki, mo homou tākitala‘i.

¹³Pea ke mou tokanga ‘ofa ‘aupito ‘aupito kiate kinautolu, koe‘uhi ko si‘enau ngāue. Mou fekoekoe‘i.

¹⁴Pea ko eni, kāinga, ‘oku mau enginaki atu ke mou tākitala‘i ‘a e kau maumau tu‘utu‘uni; lōtaki ‘a e lotosi‘i; poupou ‘a e vaivai; ke mou anga mokomoko ki he kakai kotoa pē.

¹⁵Vakai ke ‘oua na‘a ai ha taha ‘e totongi ‘a e kovi ‘a ha taha ‘aki ha kovi; kaekehe ke mou tuli ai pē ki he me‘a ‘oku lelei ma‘a e taha, pea ma‘a e kakai kotoa pē.

¹⁶Fiefia ma‘u ai pē.

¹⁷Lotu ta‘etuku.

¹⁸Fakafeta‘i ‘i he me‘a kotoa pē, he ko e tu‘utu‘uni ia ‘a e ‘Otua ma‘amoutolu ‘ia Kalaisi Sīsū.

¹⁹‘Oua ‘e fu‘ifu‘i ‘a e Laumālie:

²⁰‘oua ‘e ta‘etoka‘i ‘a e ngaahi malanga palofisai;

²¹ka mou sivi kotoa pē: ‘ilonga pē ‘a e lelei, puke ma‘u ia;

²²‘ilonga ha me‘a ‘oku fa‘ahinga mo e kovi, faka‘ehi‘ehi mei ai.

²³Pea ko e ‘Afio ‘a e ‘Otua, ‘a ia ‘oku ‘a‘ana ‘a e nonga, ‘ofa ke ne fakamā‘oni‘oni‘i faka‘āufuli ‘a kimoutolu! ‘Io, ‘i he hoko mai ‘a hotau ‘Eiki ko Sīsū Kalaisi, ‘ofa kuo haofaki homou laumālie, mo e loto, mo e sino, ‘o kakato mo ta‘emele!

²⁴Ko ia ‘oku ne ui kimoutolu ki ai, ko e Toko Taha ia ‘oku fai ki he‘ene lea, pea te ne fai foki ‘a e me‘a ni.

²⁵Kāinga, mou hūfia kimautolu.

²⁶Mou fekita ki he kāinga kotoa pē ‘aki ha ‘uma tapu.

²⁷Ko e ‘Eiki ē ‘oku ou fekau atu ai kiate kimoutolu, ke mou lau ‘a e ‘ipiseli ni ki he kāinga kotoa pē.

²⁸Ko e kelesi ‘a hotau ‘Eiki ko Sīsū Kalaisi, ‘ofa ke ‘iate kimoutolu ia!