Read KO E TOH TAPU KATOA TONGA KO SIOSIUA 1 Bible Online

KO SIOSIUA 1 - KO E TOH TAPU KATOA TONGA bible

KO SIOSIUA 1

¹PEA hili ‘a e pekia ‘a Mōsese ko e Sevāniti ‘a Sihova, na‘e folofola ‘a e ‘Eiki kia Siosiua ko e foha ‘o Nuni, ‘a ia na‘a ne tauhi ‘a Mōsese, ‘o ne pehē.

²Ko Mōsese ko ‘eku Sevāniti kuo pekia; Pea ko eni ke ke tu‘u koe ‘o ‘alu ki he kauvai ‘e taha ‘o Soatani na, ‘a koe mo e kakai ni kātoa, ‘o a‘u ki he fonua ‘a ia ‘oku ou foaki ni kiate kinautolu, ‘io, ki ha‘a ‘Isileli,

³‘Ilonga ha potu ‘e tu‘u ai homou ‘aofiva‘e, kuo u ‘atu ni mo‘omoutolu, ‘o hangē ko e lea na‘a ku fai kia Mōsese.

⁴Te mou ngata mei he Toafa pea mo Lepanoni ena, ‘o fai atu ki he vaitafe lahi, ‘a ‘Eufaletesi, ko e fonua kotoa ‘o ha‘a Heti, ‘o a‘u ki he tahi lahi ‘i he tō‘anga la‘ā.

⁵‘E ‘ikai lava ‘e ha taha ke tu‘u kiate koe lolotonga ho‘o mo‘ui: hangē ko ‘eku ‘ia Mōsese, ‘e pehē ‘eku ‘iate koe: ‘e ‘ikai te u fakatukuhāusia‘i koe, ‘uma‘ā ha‘aku li‘aki.

⁶Ke ke lototo‘a ‘o tu‘u kalikali; he ko koe te ke fakahoko ki he kakai ni honau tofi‘a, ‘a e fonua na‘a ku fuakava ai ki he‘enau ngaahi kui ke foaki mo‘onautolu.

⁷Kehe pē ke ke lototo‘a, mo ke tu‘u kalikali ‘aupito, ‘o tokanga ke fai ki hono kotoa ‘o e lao, ‘a ia na‘e tu‘utu‘uni atu ‘e Mōsese ko ‘eku sevāniti: ‘oua te ke afe mei ai ki he to‘omata‘u pe ki he to‘ohema, koe‘uhi ke ke fai fakapotopoto ‘i he me‘a kotoa pē te ke ‘alu ki ai.

⁸‘E ‘ikai mahu‘i mei ho ngutu ‘a e tohi lao ko ia, ka te ke fakalaulauloto ki ai ‘i he ‘aho mo e pō, koe‘uhi ke ke tokanga ke fai ‘o hangē ko e me‘a kotoa kuo tohi ai; he te ke toki monū‘ia ‘i he me‘a ‘oku ke fou ai, pea te ke fai fakapotopoto ai.

⁹‘Ikai kuo u kouna koe? Ke ke lototo‘a, mo tu‘u kalikali; ‘oua te ke manavahē, pea ‘oua te ke tailiili; he ko Sihova ko ho ‘Otua te ne ‘iate koe ‘i he me‘a kotoa ‘oku ke ‘alu ki ai.

¹⁰Pea tu‘utu‘uni ‘e Siosiua ki he kau ‘ōfisa ‘o e kakai, ‘o pehē,

¹¹Mou ‘alu atu ‘i he loto ‘apitanga, ‘o fanongonongo ki he kakai ‘o pehē, Tokonaki hamou ‘oho; he ‘i he te‘eki ke ‘osi ha ‘aho ‘e tolu te mou ‘alu atu ki he kauvai ‘e taha ‘o Soatani na, ko ho‘omou ‘alu atu ke ma‘u ‘a e fonua, ‘a ia ‘oku ‘atu ‘e Sihova ko homou ‘Otua ke mou ma‘u.

¹²Pea lea ‘a Siosiua ki ha‘a Lūpeni, mo ha‘a Kata, mo e vaeua ‘o e matakali ‘o Manase, ‘o pehē,

¹³Manatu ki he me‘a na‘e tu‘utu‘uni kiate kimoutolu ‘e Mōsese ko e Sevāniti ‘a Sihova, ‘o pehē, Ko Sihova ko homou ‘Otua ‘oku ne tuku ke mou mālōlō, pea te ne foaki kiate kimoutolu ‘a e fonua ko eni.

¹⁴Ko homou kau fefine, ko homou tamaiki, mo ho‘omou fanga manu, te nau nofo ‘i he fonua na‘e ‘atu ‘e Mōsese ‘i he feitu‘u mai ki heni ‘o Soatani; ka ko kimoutolu te mou laka fakakongakau ‘i he ‘ao ‘o homou kāinga ke tokoni kiate kinautolu, ‘io, ‘a ho‘omou kau to‘a kotoa pē;

¹⁵kae‘oua ke tuku ‘e he ‘Eiki ke mālōlō homou kāinga, ‘o hangē ko kimoutolu, pea nau ma‘u ‘e kinautolu foki ‘a e fonua kuo tuku mo‘onautolu ‘e Sihova ko homou ‘Otua: pea te mou toki foki ki he fonua kuo tō kiate kimoutolu, pea te mou ma‘u ia, ‘a e fonua na‘e ‘atu ‘e Mōsese ko e Sevāniti ‘a Sihova ‘i he feitu‘u ‘o Soatani ki he hopo‘anga la‘ā.

¹⁶Pea na‘a nau tali kia Siosiua, ‘o pehē, Ko e me‘a kotoa pē kuo ke tu‘utu‘uni mai te mau fai, pea ‘ilonga ha potu te ke fekau kimautolu ki ai te mau ‘alu.

¹⁷Hangē ko ‘emau fakaongo kia Mōsese ‘i he me‘a kotoa pē, ‘e pehē ‘emau fakaongo kiate koe: kehe pē ke ‘iate koe ‘a Sihova ko ho ‘Otua, ‘o hangē ko ‘ene ‘ia Mōsese.

¹⁸‘Ilonga ha taha te ne paetaku ho‘o fekau, ‘o ‘ikai te ne talangofua ki he me‘a ‘oku ke tala ‘i ha‘o tu‘utu‘uni ‘e fai kiate ia, ‘e mate ‘a e tangata ko ia: kehe pē ke ke lototo‘a, mo ke tu‘u kalikali.