Read KO E TOH TAPU KATOA TONGA KO SIOSIUA 10 Bible Online

KO SIOSIUA 10 - KO E TOH TAPU KATOA TONGA bible

KO SIOSIUA 10

¹PEA ‘i he fanongo ‘e ‘Ātonai-Sēteki ko e Tu‘i Selusalema[4] kuo kapa ‘e Siosiua ‘a ‘Ai, ‘o faka‘auha ia; ‘o hangē ko ‘ene fai ki Sielikō mo hono tu‘i, kuo pehē ‘ene fai ki ‘Ai mo hono tu‘i ‘o‘ona; pea mo e alea melino ‘a e kakai Kipioni mo ha‘a ‘Isileli,

²pea ‘oku nau nonofo; na‘a nau manavahē ‘aupito, he ko e kolo lahi ‘a Kipioni, ‘o hangē ha taha ‘o e ngaahi kolo hau, pea na‘e lahi ia ‘i ‘Ai, pea ko e kau to‘a hono kakai fuli pē.

³Ko ia na‘e fekau atu ai ‘e ‘Ātonai-Sēteki ko e Tu‘i Selusalema kia Hōhami ko e Tu‘i Hepeloni, pea kia Pīlami ko e Tu‘i Siamuti, pea kia Siafia ko e Tu‘i Lākisi, pea kia Tēpili ko e Tu‘i ‘Ekeloni, ‘o pehē,

⁴Ha‘u kiate au, ‘o tokoni mai ka tau taa‘i ‘a Kipioni, he kuo nau alea melino mo Siosiua mo ha‘a ‘Isileli,

⁵Ko ia ko e tu‘i ‘e toko nima ‘o ha‘a ‘Āmoli, ko e Tu‘i Selusalema, ko e Tu‘i Hepeloni, ko e Tu‘i Siamuti, ko e Tu‘i Lākisi, ko e Tu‘i ‘Ekeloni, na‘a nau fakataha ‘o ‘alu hake mo ‘enau ngaahi kongakau, pea na‘a nau nofo atu ki Kipione ke tau‘i.

⁶Pea fekau atu ‘e he kau Kipione kia Siosiua ki he ‘apitanga ‘i Kilikali, ‘o nau pehē, ‘Oua na‘a vaivai ho nima ‘i he fai ma‘a ho‘o kau tamaio‘eiki: hake mai ke vave, pea fakamo‘ui kimautolu, mo tokoni mai: he kuo tātānaki mai ‘a e ngaahi tu‘i kotoa pē ‘o ha‘a ‘Āmoli ‘oku nofo mo‘unga ke tau‘i kimautolu.

⁷Ko ia na‘e ‘alu hake ‘a Siosiua mei Kilikali, ‘a ia mo e kakai kotoa pē na‘e ‘i he tau, pea mo hono kotoa ‘o e kau to‘a.

⁸Pea folofola ‘a Sihova kia Siosiua, ‘Oua te ke manavahē kiate kinautolu: he kuo u tuku kinautolu ki ho nima; ‘e ‘ikai mātu‘u ‘i ho ‘ao hanau momo‘i tangata.

⁹Ko ia na‘e ha‘u fakafokifā pē ‘a Siosiua kiate kinautolu, ko e fai po‘uli pe ‘ene ‘alu hake mei Kilikali.

¹⁰Pea na‘e veuveuki kinautolu ‘e Sihova ‘i he ‘ao ‘o ‘Isileli, pea na‘a ne taa‘i kinautolu ‘i Kipione ko e tā ka ko ha tā ‘o ne tuli kinautolu ‘i he hakenga ‘o Pete-holoni, ‘o ne te‘ia kinautolu ‘o a‘u ki ‘Āseka mo Māketa.

¹¹Pea lolotonga ‘enau hola mei he ‘ao ‘o ‘Isileli, ‘i he hifonga ‘o Peteholoni, ‘iloange na‘e lī hifo kiate kinautolu ‘e Sihova mei langi ha ngaahi maka lalahi ‘o a‘u ki ‘Āseka, pea nau mate ai: na‘e tokolahi ‘a e mate ‘i he ‘uha maka ‘i he mate ‘i he heletā, ‘i honau taa‘i ‘e ha‘a ‘Isileli.

¹²Ko e taimi ko ia na‘e fakatau folofola ai ‘a Siosiua kia Sihova ‘i he ‘aho na‘e tukuange ai ki ha‘a ‘Isileli ‘e Sihova ‘a e kau ‘Āmoli, pea na‘a ne pehē ‘i he ‘ao ‘o ‘Isileli, La‘ā, tatali pe koe ‘i Kipione; Mo koe, Māhina, ‘i he tele‘a ‘o ‘Esialoni.

¹³Pea na‘e tatali ‘a e la‘ā, pea na‘e tu‘u ‘a e māhina, Kae‘oua ke tautea honau ngaahi fili ‘e he pule‘anga. ‘Ikai ‘oku tu‘u ‘a e me‘a ko ia ‘i he Tohi ko Sesa? Pea na‘e tu‘u ‘a e la‘ā ‘i he loto langi, pea na‘e ‘ikai te ne fakavave ‘ene ‘alu hifo, ‘o ‘aho kātoa nai.

¹⁴Pea na‘e ‘ikai ha toe ‘aho hangē ko ia ‘i mu‘a pe ki mui, ke fakaongo ai ‘a e ‘Eiki ki he le‘o ‘o ha tangata: he na‘e tau ‘a Sihova ma‘a ‘Isileli.

¹⁵Pea foki ‘a Siosiua, pea ha‘u mo ia ‘a ‘Isileli kātoa ki he ‘apitanga ‘i Kilikali.

¹⁶Pea hola ‘a e nima‘i tu‘i ko ia, ‘o nau toi ‘i he ‘ana ‘i Māketa.

¹⁷Pea na‘e fakahā kia Siosiua, ‘o pehē, Kuo ‘iloa ‘a e tu‘i ‘e toko nima: ‘oku nau toi ‘i he ‘ana ‘i Māketa.

¹⁸Pea lea ai ‘a Siosiua, Fakateka maka lalahi ki he ngutu ‘ana, pea tuku ai ha kau tangata ke le‘o kinautolu:

¹⁹Ka ko kimautolu, ‘oua te mou tatali; tuli, ki homou ngaahi fili, ‘o taa‘i honau tukutau; ‘oua ‘e tuku ke nau hū ki honau ngaahi kolo; he kuo tuku kinautolu ki homou nima ‘a Sihova ko homou ‘Otua.

²⁰Pea ‘i he faifai pea ‘osiki ‘e Siosiua mo ha‘a ‘Isileli honau taa‘i, ko e tā lahi ‘aupito, kae‘oua ke nau ‘osi ai, pea kuo hū honau toenga na‘e toe ki he ngaahi kolo kuo ‘aa‘i,

²¹pea na‘e toki foki ‘a e kakai kātoa kia Siosiua ki he ‘apitanga ‘i Māketa, kuo nau tu‘umālie: na‘e ‘ikai ‘emo ha ‘elelo ‘e taha ki ha‘a ‘Isileli.

²²Pea lea ‘a Siosiua, Fakaava ‘a e ngutu ‘ana, pea ‘omi mei ai ‘a e tu‘i ‘e toko nima ko ia kiate au.

²³Pea nau fai pehē, ‘o nau ‘omi kiate ia ‘a e nima‘i tu‘i ko ia mei he ‘ana, ‘a e Tu‘i Selusalema, ‘a e Tu‘i Hepeloni, ‘a e Tu‘i Siamuti, ‘a e Tu‘i Lākisi, ‘a e Tu‘i ‘Ekeloni.

²⁴Pea kuo ‘omi ‘a e ngaahi tu‘i ko ia kia Siosiua, pea ui ange ‘e ia ‘a e kau tangata ‘Isileli kotoa pē, ‘o ne pehē ki he ngaahi kapiteni ‘o e kau tau na‘a nau ō mo ia, ‘Unu‘unu mai, ‘o ‘ai homou va‘e ki he kia ‘o e ngaahi tu‘i ko ia. Pea na‘a nau ‘unu‘unu mai, ‘o ‘ai honau va‘e ki honau kia.

²⁵Pea pehē ‘e Siosiua kiate kinautolu, ‘Oua te mou manavahē, pea ‘oua te mou tailiili; mou lototo‘a, mo tu‘u kalikali; he ‘e fai pehē ‘e Sihova ki homou ngaahi fili kotoa pē te mou fai tau ki ai.

²⁶Pea hili ia na‘e taa‘i kinautolu ‘e Siosiua, ‘o ne tāmate‘i, ‘o ne tautau kinautolu ‘i ha ‘akau ‘e nima: pea na‘a nau tāupe ‘i he ‘akau, ‘o a‘u ki he efiafi.

²⁷Pea ‘i he faifai Pea hoko ‘a e tō ‘a e la‘ā, na‘e fekau ‘e Siosiua, pea nau ‘ohifo kinautolu mei he ngaahi ‘akau, ‘o lī ki he ‘ana na‘a nau toitoi ai, pea na‘a nau ‘ai maka lalahi ki he ngutu‘i ‘ana, ‘a ia ‘oku tu‘u ‘o a‘u ki he ‘aho ni.

²⁸Pea na‘e kapa ‘e Siosiua ‘a Māketa ‘i he ‘aho ko ia, ‘o ne tā ia ‘aki ‘a e mata ‘o e heletā, pea mo hono tu‘i; na‘a ne faka‘auha: kinautolu mo e kakai kotoa pē na‘e ‘i ai; ‘o ‘ikai te ne fakatoetoe ha momo‘i toko taha; pea na‘a ne fai: ki he Tu‘i Māketa. ‘o hangē ko ‘ene fai ki he Tu‘i Sielikō.

²⁹Pea hiki ‘a Siosiua mo ‘Isileli kātoa mei Māketa ki Līpina, ‘o ne fai tau mo Līpina:

³⁰Pea tuku mo ia ‘e Sihova ki he nima ‘o ‘Isileli, pea mo hono tu‘i foki, pea na‘a ne taa‘i ia ‘aki ‘a e mata ‘o e heletā, pea mo e kakai na‘e ‘i ai; na‘e ‘ikai te ne fakatoetoe ai ha toko taha; pea na‘a ne fai ki hono tu‘i, ‘o hangē ko ia na‘a ne fai ki he Tu‘i Sielikō.

³¹Pea hiki ‘a Siosiua mo ‘Isileli kātoa mei Līpina ki Lākisi, ‘o ne nofo ki ai, ‘o fai tau mo ia.

³²Pea tuku ‘e Sihova ‘a Lākisi ki he nima ‘o ‘Isileli, pea na‘a ne kapa ia ‘i hono ua ‘o e ‘aho, ‘o ne taa‘i ia ‘aki ‘a e mata ‘o e heletā, pea mo e kakai kotoa na‘e ‘i ai, ‘o hangē tofu pē kuo ne fai ki Līpina.

³³Ko e taimi ko ia na‘e ha‘u ‘a Hōlami ko e Tu‘i Kēseli ke tokoni ki Lākisi; ka ka taa‘i ‘e Siosiua ‘a ia mo hono kakai, kae‘oua ke ‘ikai kei toe hano toko taha.

³⁴Pea hiki ‘a Siosiua mo ‘Isileli kātoa mei Lākisi ki ‘Ekeloni, ‘o nau nofo ki ai,

³⁵‘o fai tau mo ia. Pea na‘a nau kapa ia ‘i he ‘aho pē ko ia, ‘o nau taa‘i ia ‘aki ‘a e mata ‘o e heletā; pea ne faka‘auha ‘i he ‘aho ko ia ‘a e kakai kotoa pē na‘e ‘i ai, ‘o hangē tofu pē kuo ne fai ki Lākisi.

³⁶Pea ‘alu hake ‘a Siosiua mo ‘Isileli kātoa mei ‘Ekeloni ki Hepeloni, ‘o nau fai tau ki ai.

³⁷Pea na‘a nau kapa ia, ‘o nau taa‘i ia ‘aki ‘a e mata ‘o e heletā, mo hono tu‘i, mo hono ngaahi kolo, pea mo e kakai kotoa na‘e ‘i ai: na‘e ‘ikai te ne fakatoe ha momo‘i toko taha, ‘o hangē tofu pē ‘ene fai ki ‘Ekeloni: ‘io, na‘a ne faka‘auha ia mo e kakai kotoa na‘e ‘i ai.

³⁸Pea foki ‘a Siosiua mo ‘Isileli kātoa ki Tēpili, ‘o nau fai tau ki ai.

³⁹Pea na‘a ne puke ia mo hono tu‘i, mo hono ngaahi kolo; pea na‘a nau taa‘i kinautolu ‘aki ‘a e mata ‘o e heletā, pea na‘a nau faka‘auha ‘a e kakai kotoa na‘e ‘i ai; na‘e ‘ikai te ne fakatoetoe ha toko taha; ‘o hangē ko ia na‘a ne fai ki Hepeloni, na‘e pehē ‘ene fai ki Tēpili mo hono tu‘i; ‘o tatau foki mo ‘ene fai ki Līpina mo hono tu‘i.

⁴⁰Ko ia na‘e taa‘i ‘e Siosiua ‘a e fonua kotoa, ‘a e Mo‘unga mo e feitu‘u ko Tonga, mo e Sēfela‘a, mo e ngaahi lauua, mo honau ngaahi tu‘i kotoa pē; na‘e ‘ikai te ne fakatoe ha toenga: pea ko kinautolu kotoa pē na‘e mānava na‘a ne faka‘auha, ‘o hangē ko e tu‘utu‘uni ‘a Sihova ko e ‘Otua ‘o ‘Isileli.

⁴¹‘Io, na‘e taa‘i kinautolu ‘e Siosiua mei Kētesi-panea ‘o a‘u ki Kesa, pea mo e fonua kotoa ‘o Kōseni, ‘o a‘u ki Kipioni.

⁴²Pea ko e ngaahi tu‘i kotoa ko ia, mo honau ngaahi fonua, na‘e ma‘u ‘e Siosiua ‘i ha fo‘i tā pē taha; he ko Sihova ko e ‘Otua ‘o ‘Isileli na‘a ne tau ma‘a ‘Isileli,

⁴³Pea foki ‘a Siosiua, pea ha‘u mo ia ‘a ‘Isileli kātoa ki he ‘apitanga ‘i Kilikali.