Read KO E TOH TAPU KATOA TONGA KO SIOSIUA 11 Bible Online

KO SIOSIUA 11 - KO E TOH TAPU KATOA TONGA bible

KO SIOSIUA 11

¹PEA ‘i he fanongo ki ai ‘a Siapini ko e Tu‘i Hasoa, na‘a ne fekau atu kia Siopapi ko e Tu‘i Mātoni, pea ki he Tu‘i Similoni, mo e Tu‘i ‘Akisafi,

²pea ki he ngaahi tu‘i mei he tokelau, ‘i he fonua mo‘unga, mo e ‘Alapā ki he potu tonga ‘o Kineloti, mo e Sēfelaa, pea mo e potu tafungofunga ‘o Toa ‘i lulunga,

³ki he ha‘a Kēnani ‘i hahake mo hihifo, pea ki ha‘a ‘Āmoli mo ha‘a Heti mo ha‘a Pēlisi, mo ha‘a Siepusi ‘i ha fonua mo‘unga, pea mo ha‘a Hevi ‘i he talalo, ‘o Heamoni ‘i he fonua ko Mīsipa.

⁴Pea na‘a nau ‘alu mo ‘enau ngaahi kongakau kotoa pē, ko e kakai tokolahi ‘o hangē ko e ‘one‘one ‘i he matātahi hono lau, pea ko e me‘a tokolahi ‘aupito ‘a e hoosi mo e sāliote.

⁵Pea fetautaulaki ‘a e ngaahi tu‘i ko ia, pea na‘a nau omi, ‘o nofo fakataha ‘i he Vai ‘o Mēlomi ke fai tau mo ‘Isileli.

⁶Pea folofola ‘a e ‘Eiki kia Siosiua, ‘Oua te ke manavahē kiate kinautolu: he fe‘unga mo e taimi ni ‘apongipongi te u tuku honau kotoa, ‘e au, kuo nau mate ‘i he ‘ao ‘o ha‘a ‘Isileli: te ke hele uoua ‘enau fanga hoosi, pea tutu ‘enau ngaahi sāliote ‘aki ‘a e afi.

⁷Ko ia na‘e hoko fakafokifā pē ‘a Siosiua kiate kinautolu mo e kau tau kotoa, ofi ki he vai ‘o Mēlomi, ‘o ne ‘ohofia kinautolu.

⁸Pea na‘e tuku kinautolu ‘e Sihova ki he nima ‘o ‘Isileli, pea na‘a nau taa‘i kinautolu, ‘o tuli ‘o a‘u ki fu‘u Saitoni, mo Misilefotimaimi, mo Mīsipa Luoluo ‘i hahake: pea na‘a nau taa‘i kinautolu kae‘oua ke ‘ikai kei toe ha taha.

⁹Pea na‘e fai ki ai ‘e Siosiua, ‘o hangē ko e folofola ‘a e ‘Eiki kiate ia: na‘a ne hele uoua ‘enau fanga hoosi mo tutu ‘enau ngaahi sāliote ‘i he afi.

¹⁰Pea foki mai ‘i he taimi ko ia ‘a Siosiua, ‘o ne kapa ‘a Hasoa, pea ko hono tu‘i na‘a ne taa‘i ‘aki ‘a e heletā: he ko Hasoa ‘i he taimi mu‘a ko e ‘ulu ia ‘o e ngaahi pule‘anga kotoa ko ia.

¹¹Pea na‘a nau taa‘i ‘a e kakai kotoa na‘e ‘i ai ‘aki ‘a e mata ‘o e heletā, mo faka‘auha kinautolu: na‘e ‘ikai toe ha taha na‘e kei manava: pea na‘a ne tutu ‘a Hasoa ‘aki ‘a e afi.

¹²Pea ko e ngaahi kolo fua pē ‘a e ngaahi tu‘i ko ia, mo honau ngaahi tu‘i foki, na‘e puke ‘e Siosiua, ‘o taa‘i ‘aki ‘a e mata ‘o e heletā, ‘o ne faka‘auha kinautolu; ‘o hangē ko e tu‘utu‘uni ‘a Mōsese ko e Sevāniti ‘a Sihova.

¹³Ka ko e ngaahi kolo pē na‘e tu‘u takitaha ‘i hono mo‘unga, na‘e ‘ikai tutu ia ‘e ‘Isileli: ngata ‘i Hasoa pē taha na‘e tutu ‘e Siosiua.

¹⁴Pea ko e koloa ‘o e ngaahi kolo ko ia mo hono mānumanu, na‘e vete ia ‘e ha‘a ‘Isileli ma‘anautolu; ka ka ‘ilonga ha tangata na‘a nau taa‘i ia ‘aki ‘a e mata ‘o e heletā, kae‘oua ke ‘osi honau faka‘auha: na‘e ‘ikai te nau tuku ha toko taha na‘e kei manava.

¹⁵‘O hangē ko e tu‘utu‘uni ‘a Sihova ki he‘ene tamaio‘eiki ko Mōsese, na‘e pehē ‘a e tu‘utu‘uni ‘a Mōsese kia Siosiua, pea na‘e pehē mo e fai ‘e Siosiua: na‘e ‘ikai te ne tuku li‘aki ha momo‘i me‘a ‘i he ngaahi tu‘utu‘uni na‘e fai ‘e he ‘Eiki kia Mōsese.

¹⁶Ko ia na‘e puke ‘e Siosiua ‘a e fonua kotoa ko ia, ‘a e fonua mo‘unga mo e feitu‘u kotoa ko Tonga, mo e feitu‘u kotoa ‘o Kōseni, mo e Sēfelaa, mo e ‘Alapā, pea mo e feitu‘u mo‘unga ‘o ‘Isileli mo hono Sēfelaa:

¹⁷mei Mo‘unga Molemole ‘i he hakenga ki Seia, ‘o a‘u ki Peali-kata ‘i Lepanoni Vaha‘a-mo‘unga ‘i he talalo ‘o e Mo‘unga ko Heamoni; pea ko honau ngaahi tu‘i kotoa pē na‘a ne Puke ‘o tāmate‘i.

¹⁸Na‘e fuoloa ‘a e fai tau ‘a Siosiua mo e ngaahi tu‘i ko ia.

¹⁹Na‘e ‘ikai ha kolo na‘e alea melino mo ha‘a ‘Isileli, ngata pē ‘ia ha‘a Hevi na‘e nofo ‘i Kipione: na‘a nau ma‘u kotoa ‘i he tau.

²⁰He na‘e mei he ‘Eiki ‘a e fakato‘a honau loto ke nau fakafepaki mo ha‘a ‘Isileli, koe‘uhiā ke ne faka‘auha kinautolu, ‘o ‘oua ‘e fai ha ‘ofa ki ai, kaekehe ke ne faka‘osi kinautolu, ‘o hangē ko e tu‘utu‘uni ‘a e ‘Eiki kia Mōsese.

²¹Pea ko e taimi ko ia na‘e ha‘u ‘a Siosiua, ‘o ne tu‘usi ‘a e kau ‘Ānaki mei he fonua Mo‘unga, mei Hepeloni, mei Tēpili, mei ‘Ānapi, ‘io, mei he feitu‘u mo‘unga kotoa ‘o Siuta, pea mei he feitu‘u mo‘unga kotoa ‘o ‘Isileli: na‘e faka‘auha kinautolu ‘e Siosiua fakataha mo honau ngaahi kolo.

²²Na‘e ‘ikai toe ha kau ‘Ānaki ‘i he fonua ‘o ha‘a ‘Isileli: na‘e ngata pē ‘i Kesa mo Kati, mo ‘Asitoti, na‘e toe ai ha ni‘ihi.

²³Ko ia na‘e ma‘u ‘e Siosiua ‘a e fonua kotoa, ‘o hangē tofu pē ‘a e folofola ‘a Sihova kia Mōsese; pea na‘e tuku ia ‘e Siosiua ki ha‘a ‘Isileli mo‘onau tofi‘a, ‘o fakatatau ki honau ngaahi vahevahe fakamatakali. Pea na‘e mālōlō ‘a e fonua mei he tau.