Read KO E TOH TAPU KATOA TONGA KO SIOSIUA 13 Bible Online

KO SIOSIUA 13 - KO E TOH TAPU KATOA TONGA bible

KO SIOSIUA 13

¹PEA kuo motu‘a ‘a Siosiua, ‘o a‘ua‘u. Pea folofola ‘a Sihova kiate ia, Kuo ke motu‘a mo a‘ua‘u, ka ‘oku toe lahi ‘aupito ‘a e fonua ke ma‘u.

²Ko eni ‘a e fonua ‘oku toe: ko e ngaahi feitu‘u ‘a e kakai Filisitia; pehē mo e Kēsuli;

³‘O fai mei Sīhoa, ‘a ia ‘oku ‘i he matāfonua ‘o ‘Isipite, ‘o a‘u ki he kau‘ā ‘o ‘Ekiloni mei he tokelau, ‘a ia ‘oku lau ki ha‘a Kēnani: ko e ‘ulu-nima ‘o e kau Filisitia; ‘a ha‘a Kesa, mo ha‘a ‘Asitoti mo ha‘a ‘Asikeloni, ‘a ha‘a Kati, mo ha‘a ‘Ekiloni: ko e ha‘a ‘Avi foki ‘i he tonga:

⁴‘a e fonua kotoa ‘o ha‘a Kēnani, mo Meala ‘a ia ‘oku kau ki he kakai Saitoni, ‘o a‘u ki ‘Ēfeki, mo e kau‘ā ‘o ha‘a ‘Āmoli, mo e fonua ‘o ha‘a Kīpeli:

⁵mo Lepanoni kātoa, ‘a hono feitu‘u ki hahake, mei Peali-Kata ‘i he talalo ‘o e mo‘unga ko Heamoni, ‘o a‘u ki he hū‘anga ki Hēmati;

⁶‘a e kau nofo kotoa ‘i he fonua mo‘unga mei Lepanoni ki Misilefotimaimi, ‘a e kau Saitoni kātoa — te u kapusi kinautolu kotoa mei he ‘ao ‘o ‘Isileli, Kaekehe ke ke vahe ia ki ha‘a ‘Isileli mo‘onau tofi‘a, ‘o hangē ko ‘eku tu‘utu‘uni kiate koe.

⁷Pea ko eni ke ke vahevahe ‘a e fonua ki he matakali ‘e hiva mo e vaeua ‘o e matakali ‘o Manase, mo‘onau tofi‘a.

⁸[Ko e matakali ko ia foki na‘e ma‘u tofi‘a fakataha mo ha‘a Lūpeni mo ha‘a Kata, ‘a ia na‘e foaki kiate kinautolu ‘e Mōsese ‘i he kauvai ‘o Soatani ki hahake: na‘a nau ma‘u ‘o tatau mo e foaki ‘a Mōsese ko e Sevāniti ‘a Sihova:

⁹mei ‘Aloeli, ‘a ia ‘oku ‘i he kau tele‘a ‘o ‘Alanoni, mo e kolo ‘oku ‘i he loto tele‘a, pea mo e Misoa kotoa ‘o Mētepa, ‘o a‘u ki Tīponi;

¹⁰mo e ngaahi kolo kotoa pē ‘o Sīhoni ko e Tui ‘Āmoli, ‘a ia na‘a ne hau ‘i Hesiponi, ‘o a‘u ki he kau‘ā ‘o ha‘a ‘Āmoni;

¹¹pea mo Kiliati, mo e tafafonua ‘o e kakai Kēsuli mo e kakai Maaka, pea mo Mo‘unga Heamoni kotoa, mo Pēsani kotoa ‘o a‘u ki Sālika;

¹²ko e pule‘anga kotoa ‘o ‘Oki ‘i Pēsani, ‘a ia na‘a ne hau ‘i ‘Asiteloti mo ‘Etilei (ko e toko taha ia na‘e toe ‘i he toenga Lifaimi) he ko kinautolu na‘e taa‘i ‘e Mōsese, mo kapusi.

¹³Ka na‘e ‘ikai kapusi ‘e ha‘a ‘Isileli ‘a e kakai Kēsuli, pe ko e kakai Maaka: ka ‘oku nofo ‘a e Kēsuli mo e Maaka ‘i he lotolotonga ‘o ‘Isileli ‘o a‘u ki he ‘aho ni.

¹⁴Ko e matakali ‘o Līvai pe na‘e ‘ikai te ne ‘ange ki ai ha tofi‘a: ko e ngaahi feilaulau-tutu ‘a Sihova ko e ‘Otua ‘o ‘Isileli ko hono tofi‘a pē ia, ‘o hangē ko e folofola na‘a ne fai kiate ia.

¹⁵Pea tufa ‘e Mōsese ki he matakali ‘o ha‘a Lūpeni ‘o fakatatau ki honau ngaahi fāmili.

¹⁶Pea ko honau kau‘ā na‘e kamata mei ‘Aloeli, ‘a ia ‘oku ‘i he kau tele‘a ‘o ‘Alanoni, mo e kolo ‘i he loto tele‘a, pea kau ki ai ‘a e Misoa kotoa ‘o a‘u ki Mētepa:

¹⁷ko Hesiponi mo hono ngaahi kolo ‘i he Misoa: ko Tīponi mo Pāmoti-peali, mo Pete-peali-meoni:

¹⁸mo Siahasa, mo Ketemoti, mo Mefaati:

¹⁹mo Kiliataimi, mo Sīpima, mo Sīleti-Sāhali ‘i he mo‘unga ‘o e tele‘a:

²⁰mo Pete-peoli, mo e lauua ‘o Pīsika, mo Pete-sisimoti:

²¹mo e ngaahi kolo ‘o e Misoa mo e pule‘anga kotoa ‘o Sīhoni ko e Tu‘i ‘Āmoli, ‘a ia na‘e hau ‘i Hesiponi, pea taa‘i ‘e Mōsese fakataha mo e hou‘eiki Mitiani, ‘a ‘Evi, mo Lēkemi, mo Siuli, mo Hua, mo Lepa, ko e hou‘eiki na‘e nofo ‘i he fonua kae ngaohi kava kia Sīhoni.

²²(Ko Pēlami foki ko e foha ‘o Peoli, ko e tongafisi, na‘e tāmate‘i ‘e ha‘a ‘Isileli ‘aki ‘a e heletā, fakataha mo e kakai na‘e tāmate‘i.)

²³Pea na‘e ai ha lave ‘o e kau‘ā ‘o ha‘a Lūpeni ki Soatani, mo hono tafafonua. Ko ia ‘a e tofi‘a ‘o ha‘a Lūpeni, ‘o fakatatau ki honau ngaahi fāmili, ko honau ngaahi kolo mo honau ngaahi vilisi.

²⁴Pea tufa ‘e Mōsese ki he matakali ‘o Kata, ‘io, ki he hako ‘o Kata, ‘o fakatatau ki honau ngaahi fāmili.

²⁵Pea na‘e tō mai honau vahe; ko Siasea mo e ngaahi kolo ‘o Kiliati, mo e vaeua ‘o e fonua ‘o ha‘a ‘Āmoni, ‘o a‘u ki ‘Aloeli, ‘a ia ‘oku ‘i he ‘ao ‘o Lapa;

²⁶pea na‘e fai mei Hesiponi ki Lama-Mīsipa mo Petonimi, pea mei Mehanemi ki he tafafonua ‘o Tēpili;

²⁷pea ‘i he Tele‘a na‘e kau ai ‘a Pete-hālami, mo Pete-nimila, mo Sūkote mo Sāfoni, ‘a e toe ‘o e pule‘anga ‘o Sīhoni ko e Tu‘i Hesiponi: ‘a Siotani mo hono tafa‘aki, ‘o a‘u ki he ngata‘anga ‘o e tahi ‘o Kineleti, ‘a e kauvai ‘o Soatani ki hahake.

²⁸Ko e tofi‘a ia ‘o ha‘a Kata ‘o faka-e-honau-ngaahi-fa‘ahinga, ko honau ngaahi kolo mo honau ngaahi vilisi.

²⁹Pea na‘e vahe tofi‘a ‘e Mōsese ki he vaeua ‘o e matakali ‘o Manase; pea na‘e fai fakafāmili ki he vaeua ‘o e matakali ‘o Manase.

³⁰Pea ko honau vahe na‘e kamata mei Mehanemi: ko Pēsani kātoa, ko e pule‘anga kotoa ‘o ‘Oki ko e Tu‘i Pēsani, pea mo e ‘ū-vilisi ‘o Siaili, ‘a ia ‘oku ‘i Pēsani, ko e onongofulu‘i kolo:

³¹mo e vaeua ‘o Kiliati, ko ‘Asiteloti foki mo ‘Etilei, ko e ongo kolo hau ‘o ‘Oki ‘i Pēsani, na‘e ‘ange ia ki he hako ‘o Mākili ko e foha ‘o Manase, ‘io, ki he vaeua ‘o ha‘a Mākili, vahe fakafāmili.

³²Ko e ngaahi tofi‘a ia na‘e tufa ‘e Mōsese ‘i he ‘Alapā ‘o Moape, ‘i he kauvai ‘o Soatani ki hahake, fe‘unga mo Sielikō.

³³Ka ki he matakali ‘o Līvai na‘e ‘ikai ‘ange ‘e Mōsese ha tofi‘a: ko Sihova ko e ‘Otua ‘o ‘Isileli ko honau tofi‘a pē ia; ‘o hangē ko ‘ene folofola na‘e fai kiate kinautolu.]