Read KO E TOH TAPU KATOA TONGA KO SIOSIUA 14 Bible Online

KO SIOSIUA 14 - KO E TOH TAPU KATOA TONGA bible

KO SIOSIUA 14

¹PEA ko eni ‘a e ngaahi tofi‘a na‘e ma‘u ‘e ha‘a ‘Isileli ‘i he fonua ko Kēnani, ‘a ia na‘e vahe kiate kinautolu ‘e ‘Eliesa ko e taula‘eiki mo Siosiua ko e foha ‘o Nuni, mo e hou‘eiki ‘ulumotu‘a ‘o e ngaahi matakali ‘o ha‘a ‘Isileli:

²na‘e tufa talotalo kiate kinautolu ‘o hangē ko e tu‘utu‘uni ‘a Sihova ‘ia Mōsese, ‘io, ki he matakali ‘e hiva mo e vaeua ‘o e matakali.[6]

³(He kuo vahe tofi‘a ‘e Mōsese ki he matakali ‘e ua mo e vaeua ‘o e matakali, ‘i he kauvai ‘e taha ‘o Soatani, pea na‘e ‘ikai te ne vahe ha tofi‘a ki ha‘a Līvai fakataha mo kinautolu).

⁴He ko e hako ‘o Siosifa kuo matakali ua, ko Manase mo ‘Ifalemi; pea na‘e ‘ikai vahe tofi‘a ki he kau Līvai ‘i he fonua, ko e ngaahi kolo pe ke nofo ai, pea mo e ngaahi ‘api takatakai ma‘a ‘enau monumanu mo ‘enau koloa.

⁵Hangē ko e tu‘utu‘uni ‘a Sihova ‘ia Mōsese na‘e pehē ‘a e fai ‘a ha‘a ‘Isileli ‘i he‘enau vahe ‘a e fonua.

⁶Pea fe‘unu‘i mai ‘a ha‘a Siuta kia Siosiua ‘i Kilikali: pea fakalea ange kiate ia ‘e Kēlepi ko e foha ‘o Sīfune ko e ha‘a Kēnasi ‘o pehē, ‘Oku ke mea‘i ‘a e me‘a na‘e folofola‘aki mai ‘e Sihova kia Mōsese ko e tangata ‘o ‘Elohimi ‘o kau kiate au mo koe ‘i Kētesipanea.

⁷Na‘a ku fāngofulu ta‘u ‘i he fekau au ‘e Mōsese, ko e sevāniti ‘a Sihova, ke u ‘alu mei Kētesipanea ke asiasi ‘a e fonua; peau foki mo au ‘a e tala na‘e hoa mo hoku loto.

⁸Ka ko e kāinga na‘e ‘alu hake mo au na‘a nau fakavaivai‘i ‘a e loto ‘o e kakai: ka ko au na‘a ku topuva‘e taha mo Sihova ko hoku ‘Otua.

⁹Pea na‘e fuakava ‘a Mōsese ‘i he ‘aho ko ia ‘o pehē, ‘Ilo ‘e au ‘o kapau ‘e ‘ikai hoko ‘a e kelekele na‘e tu‘u ai ho va‘e ko ho tofi‘a, mo ho hako ‘o ta‘engata, koe‘uhi kuo te topuva‘e taha mo Sihova ko hoku ‘Otua.

¹⁰Pea ko eni, vakai, hangē ko ‘ene folofola, kuo tauhi ‘e Sihova ‘eku mo‘ui ‘i he ta‘u ‘e fāngofulu mā nima ko ē, talu ‘ene fai ‘a e folofola ko ia kia Mōsese, pea lolotonga ‘a e hā‘ele ‘a ‘Isileli ‘i he Toafa: pea ko eni, vakai, kuo u valungofulu-mā-nima ta‘u eni he ‘aho ni.

¹¹‘Oku ou kei mālohi tatau he ‘aho ni mo e ‘aho na‘e fekau ai au ‘e Mōsese: hangē ko hoku ivi he taimi ko ē, ko hoku ivi ai pē ia he taimi ni, pe ke tau pe ke ‘alu ki ‘uta mo foki mai.

¹²Pea ko ia ke ke tuku kiate au ‘a e mo‘unga ni, ‘a ia na‘e kau ki ai ‘a e folofola ‘a Sihova he ‘aho ko ē he na‘a ke fanongo he ‘aho ko ē, tā ‘oku ‘i ai ‘a e kau ‘Ānaki, mo e ngaahi kolo lalahi kuo ‘aa‘i: hei‘ilo ‘e kau ‘a e ‘Eiki mo au, pea te u kapusi kinautolu ‘o hangē ko ‘ene folofola.

¹³Pea fai ‘e Siosiua hono tāpuaki‘i, ‘o ne vahe ‘a Hepeloni kia Kēlepi ko e foha ‘o Sīfune moono tofi‘a.

¹⁴(‘A ē ā na‘e tō ai ‘a Hepeloni kia Kēlepi ko e foha ‘o Sīfune, ko e ha‘a Kēnasi, ko hono tofi‘a ‘o a‘u ki he ‘aho ni; koe‘uhiā na‘a ne topuva‘e taha mo Sihova ko e ‘Otua ‘o ‘Isileli,

¹⁵Ka ko e hingoa mu‘a ‘o Hepeloni ko e Kiliati-A‘apa (ko e kolo ‘o ‘Ā‘apa; ko e tangata lahi ia ‘i he kau ‘Ānaki). Pea na‘e mālōlō ‘a e fonua mei he tau.