Read KO E TOH TAPU KATOA TONGA KO SIOSIUA 15 Bible Online

KO SIOSIUA 15 - KO E TOH TAPU KATOA TONGA bible

KO SIOSIUA 15

¹PEA na‘e fai talotalo ma‘a e matakali ‘o ha‘a Siuta ma‘a honau ngaahi fāmili. Na‘e a‘u ia ki he kau‘ā ‘o ‘Ītomi, ‘io, ‘i he feitu‘u tonga na‘e a‘u ki he Toafa ‘o Sini, ‘a ia ko e taupotu ‘o e fonua ki he tonga.

²Pea ko honau kau‘ā tonga na‘e kamata mei he ngata‘anga ‘o e Tahi Māsima, mei he muitolotolo ‘oku hanga ki he feitu‘u tonga:

³pea na‘e ‘alu atu mei he potu tonga ‘o e Hakenga ‘o ‘Akelapimi, ‘o ne fou atu ki Sini, ‘o ‘alu hake mei he potu tonga ‘o Kētesipanea, ‘o ne fou atu ‘i Heseloni, ‘o ‘alu hake ‘i ‘Ātala, ‘o takai hake ki he Kālaka‘a:

⁴‘o ne fou atu ki ‘Asimona, ‘o ne ‘asi atu ‘i he vaitafe ‘o ‘Isipite, pea tū‘ulu ‘a e kau‘ā ki tahi. Ko homou kau‘ā tonga ia.

⁵Pea ko e kau‘ā hahake ko e Tahi Māsima, ‘o a‘u ki he ngata‘anga ‘o Soatani. Pea ko e kau‘ā ‘o e matāfonua ki he tokelau na‘e kamata mei he muitolotolo ‘o e tahi ‘i he ngata‘anga ‘o Soatani:

⁶pea na‘e ‘alu hake ‘a e kau‘ā ‘i Pete-hokela, ‘o ‘alu atu mei he potu tokelau ‘o Pete-‘ālapa, pea na‘e hake ‘a e kau‘ā ki he Maka ‘o Pōhani ko e hako ‘o Lūpeni:

⁷pea ‘alu hake ‘a e kau‘ā ki Tēpili, mei he tele‘a ‘o ‘Ākoli, ‘o fou fakatokelau ‘o hanga ki Kilikali, ‘a ia ‘oku fe‘unga mo e Hakenga Kula ‘a ia ‘oku ‘i he kau vaitafe ki he tonga: pea fai atu ‘a e kau‘ā ki he vai ko ‘Eni-semesi, ‘o ne a‘u ki ‘Eni-lokeli.

⁸Pea ‘alu hake ‘a e kau‘ā ‘i he tele‘a ‘o e Foha ‘o Hīnomi, ‘o a‘u ki he mui mo‘unga ‘o e Siepusi (ko Selusalema ia), ‘o tuku ia ki he tokelau: pea ‘alu hake ‘a e kau‘ā ki he tumutumu ‘o e mo‘unga ‘a ia ‘oku tu‘u mei lulunga, ‘o hanga ki he tele‘a ‘o Hīnomi, pea ‘oku ne tu‘u taupotu foki ki he tokelau ‘i he Tele‘a-Lifaimi.

⁹Pea afe atu ‘a e kau‘ā mei he funga mo‘unga ki he fauniteni ‘o e vai ‘i Nefitoa, ‘o ne fou atu ki he ngaahi kolo mo‘unga ‘o ‘Efiloni, pea taafeafe atu ‘a e kau‘ā ki Pā‘ala (ko Kiliati-sialimi ia):

¹⁰pea takai hake ‘a e kau‘ā mei Pā‘ala ki lulunga, ‘o fai atu ki Mo‘unga-Seia, ‘o ‘uhi atu ‘i he mui mo‘unga ‘o Sialima, ‘o tuku ia ki he tonga (ko Kesaloni ia), ‘o ne hifo ki Peta-semesi.

¹¹‘O fou atu ‘i Tīmina: pea ‘alu atu ‘a e kau‘ā ‘i he mui mo‘unga ‘o ‘Ekiloni, ‘o tuku ia ki he tonga: pea afe ‘a e kau‘ā ki Sikeloni, ‘o fou atu ki he mo‘unga ko Pā‘ala, ‘o ‘uhi atu ki Siapinili: pea na‘e tū‘ulu ‘a e kau‘ā ki tahi.

¹²Pea ko e kau‘ā lulunga ko e Tahi Lahi mo hono matāfonua. Ko e kau‘ā fonua ia ‘o ha‘a Siuta mo honau ngaahi fāmili takatakai.

¹³Pea ko Kēlepi ko e foha ‘o Sīfune na‘a ne vahe ki ai ha tofi‘a ‘i he lotolotonga ‘o ha‘a Siuta, ‘o fakatatau ki he fekau ‘a e ‘Eiki kiate ia, ko e kolo ‘o ‘Aape ko e tupu‘anga ‘o ‘Ānaki (ko Hepeloni ia).

¹⁴Pea kapusi mei ai ‘e Kēlepi ‘a e tolu‘i hako ‘o ‘Ānaki, ‘a Sesai mo ‘Ahimani mo Talimai: ko e ngaahi fo‘i ‘Ānaki kinautolu.

¹⁵Pea ne ‘alu hake mei ai ki he kakai Tēpili: (ka ko hono hingoa mu‘a ‘o Tēpili ko Kiliati-sefa).

¹⁶Pea lea hake ‘a Kēlepi, Ko ia te ne taa‘i ‘a Kiliati-sefa, ‘o ne hamu ia, te u ‘ange ki ai ‘a hoku ‘ōfefine ko ‘Ākesa ke na nonofo.

¹⁷Pea kapa ia ‘e ‘Ōtenili ko e foha ‘o Kēnasi ko e tokoua ‘o Kēlepi; pea ne ‘ange ki ai ‘a hono ‘ōfefine ko ‘Ākesa moono uaifi.

¹⁸Pea ‘i he faifai pea ha‘u ‘a e fefine kiate ia, na‘a ne o‘i ia[7] ke kole mei he‘ene tamai ha vao; Ko ia na‘e puna hifo ‘a e fefine mei he‘ene ‘asi. Pea lea kiate ia ‘e Kēlepi, Ko e hā ‘au?

¹⁹Pea tali ‘e ia, ‘Omi haku tāpuaki; he kuo ke tuku au ‘i he fonua Tonga, ke ke foaki foki ha matavai. Pea ne ‘ange kiate ia ‘a e ngaahi matavai ‘olunga mo lalo.

²⁰Ko e tofi‘a eni ‘o e matakali ‘o ha‘a Siuta, mo honau ngaahi fāmili.

²¹Pea ko e ngaahi kolo taupotu ‘o e matakali ‘o ha‘a Siuta ki he tafafonua ‘o ‘Ītomi ‘i he feitu‘u ko Tonga, ko Kapesili, mo ‘Ēteli, mo Siakuli;

²²mo Kina mo Tīmona, mo ‘Ātata:

²³mo Kētesi, mo Hasoa, mo ‘Itinani:

²⁴ko Sifi, mo Tēlemi, mo Pealoti;

²⁵mo Hasoa-fo‘ou, mo e ngaahi kolo ‘o Hesiloni (ko Hasoa ia):

²⁶ko ‘Āmami, mo Sema, mo Mōlata;

²⁷mo Hasa-kata, mo Hesimoni mo Pete-pāleti:

²⁸mo Hasa-sūhali mo Peasipa, mo Sisiotia;

²⁹ko Pā‘ala, mo Simi, mo ‘Āsimi;

³⁰mo ‘Elitolati, mo Kēsili, mo Hoama;

³¹mo Sikilaki, mo Matemana, mo Sanesana;

³²mo Lepaoti, mo Silehimi, mo ‘Eni, mo Līmoni: ko e kotoa ‘o e ngaahi kolo ko e uofulu mā hiva, pea ai mo honau ngaahi vilisi.

³³‘I he Sēfelaa, ko ‘Esitaoli, mo Sola, mo ‘Āsena:

³⁴mo Sānoa, mo ‘Eni-kānimi, ko Tapua mo ‘Ēnami;

³⁵ko Siamuti mo ‘Atulami, ko Soko mo ‘Āseka:

³⁶mo Sa‘alaimi, mo ‘Atitaimi, mo Kētela, mo Ketelotaimi: ko e kolo ‘e hongofulu mā fā mo honau ngaahi vilisi.

³⁷Ko Sīnani, mo Hātasa, mo Mikitali-kati;

³⁸mo Tīlani, mo Mīsipa, mo Siokitili;

³⁹ko Lākisi, mo Posikata, mo ‘Ekeloni;

⁴⁰ko Kāponi, mo Lāmami, mo Kitelisi;

⁴¹mo Keteloti, ko Pete-Tākoni, mo Naama, mo Māketa: ko e kolo ‘e hongofulu mā ono mo honau ngaahi vilisi.

⁴²Ko Līpina, mo ‘Ēteli, mo ‘Āsani;

⁴³mo ‘Īfeta, mo ‘Āsena, mo Nēsipi;

⁴⁴mo Kī‘ila mo ‘Akisipi, mo Mālesa: ko e kolo ‘e hiva mo honau ngaahi vilisi.

⁴⁵Ko ‘Ekiloni mo e ngaahi kolo na‘e fakaongo kiate ia, pea mo hono ngaahi vilisi;

⁴⁶mei ‘Ekiloni, ‘o fai ki tahi, ‘a e ngaahi kolo kotoa na‘e ‘i he tafa‘aki ‘o ‘Asitoti, mo honau ngaahi vilisi.

⁴⁷Ko ‘Asitoti mo hono ngaahi kolo fakaongo, mo hono ngaahi vilisi; ko Kesa mo hono ngaahi kolo fakaongo, mo hono ngaahi vilisi; ‘o a‘u ki he vaitafe ‘o ‘Isipite, mo e Tahi Lahi mo hono matāfonua.

⁴⁸Pea ‘i he fonua mo‘unga, ko Sāmili, mo ‘Iatili, mo Soko;

⁴⁹mo Tana, mo Kiliati-sana (ko Tēpili ia),

⁵⁰mo ‘Ānapi, mo ‘Esitemo, mo ‘Ānimi:

⁵¹mo Kōseni, mo Hōloni, mo Kilo: ko e kolo ‘e hongofulu mā taha mo honau ngaahi vilisi.

⁵²Ko ‘Ālapi, mo Tuma, mo ‘Ēsani:

⁵³mo ‘Ianimi, mo Pete-tapua, mo ‘Ēfeki;

⁵⁴mo Hūmeta, mo Kiliati-A‘apa (ko Hepeloni ia), mo Sioa: ko e ngaahi kolo ‘e hiva mo honau ngaahi vilisi.

⁵⁵Ko Maoni, ko Kāmeli, mo Sifi, mo Siuta;

⁵⁶mo Sisilili mo Sioketeami, mo Sānoa;

⁵⁷ko e Kaini, ko Kipea mo Tīmina; ko e kolo ‘e hongofulu mo honau ngaahi vilisi.

⁵⁸Ko Halihuli, ko Pete-sua, mo Kētoa;

⁵⁹mo Ma‘alati, mo Pete-‘ānoti, mo ‘Eletekoni; ko e kolo ‘e ono mo honau ngaahi vilisi.

⁶⁰Ko Kiliati-peali (ko Kiliati-sialimi ia), mo Lapa; ko e kolo ‘e ua mo hona ngaahi vilisi.

⁶¹‘I he Toafa, ko Pete-‘ālapa, ko Mītini mo Sēkaka;

⁶²Mo Nipisani, mo Kolo-māsima, mo ‘Eni-keti: ko e kolo ‘e ono mo honau ngaahi vilisi.

⁶³Ka ko e me‘a ki ha‘a Siepusi, ‘a ia na‘e nofo ‘i Selusalema, na‘e ‘ikai ke lava ‘e ha‘a Siuta ke kapusi kinautolu, ka ‘oku nau nonofo, ‘a ha‘a Siepusi mo ha‘a Siuta, ‘i Selusalema, ‘o a‘u ki he ‘aho ni.