Read KO E TOH TAPU KATOA TONGA KO SIOSIUA 16 Bible Online

KO SIOSIUA 16 - KO E TOH TAPU KATOA TONGA bible

KO SIOSIUA 16

¹PEA na‘e fai talotalo ma‘a e hako ‘o Siosifa, pea tō kiate kinautolu ‘o pehē; na‘e kamata mei Soatani, fe‘unga mo Sielikō, ‘i he vai ‘o Sielikō mei hahake, ‘a e toafa, ‘o ‘alu hake mei Sielikō, pea fou ‘i he fonua mo‘unga ki Pēteli;

²pea na‘e ‘uhi atu mei Pēteli ki Lusa, pea fou atu ki he tafafonua ‘o ha‘a ‘Āleki ‘Ataloti;

³pea na‘e hifo ai ki lulunga ki he tafafonua ‘o ha‘a ‘Iafeleti, ‘o a‘u ki he tafafonua ‘o Pete-holoni-lalo mo Kēseli: pea ne tū‘ulu ki tahi.

⁴Pea ma‘u honau tofi‘a ‘e he hako ‘o Siosifa, ‘a Manase mo ‘Ifalemi.

⁵Pea ko e vahe ‘o ha‘a ‘Ifalemi mo honau ngaahi fāmili, ‘io, ko e kau‘ā ‘o honau tofi‘a na‘e kamata mei hahake, mei ‘Ataloti-‘ātali, ‘o fai atu ki Pete-holoni-‘olunga;

⁶pea ‘alu atu ‘a e kau‘ā ki lulunga ‘i Mikimetata, ‘o tuku ia ki he tonga; pea toki takai hake ‘a e kau‘ā ki hahake ki Ta‘anata-sailo, pea fou atu ai ki he potu hahake ‘o ‘Ianoa;

⁷pea hifo ai mei ‘Ianoa ki ‘Ataloti mo Na‘ala‘a, pea lave ki Sielikō, ‘o tū‘ulu ki Soatani.

⁸Mei Tapua na‘e ‘alu ‘a e kau‘ā ki lulunga ki Vai-kaho‘ia; pea na‘e ‘asi atu ki tahi. Ko e tofi‘a ia ‘o e matakali ‘o ha‘a ‘Ifalemi mo honau ngaahi fāmili.

⁹Pea ai mo e ngaahi kolo na‘e vahe‘i ‘Ifalemi ‘i he loto tofi‘a ‘o ha‘a Manase, ‘a e ngaahi kolo ko ia mo honau ngaahi vilisi.

¹⁰Ka na‘e ‘ikai te nau kapusi ‘a e kakai Kēnani na‘e nofo ‘i Kēseli, ka ka nofo ai pē ‘a e kau Kēnani ‘i he lotolotonga ‘o ‘Ifalemi, ‘o a‘u ki he ‘aho ni, ‘o nau ngāue fatongia.