Read KO E TOH TAPU KATOA TONGA KO SIOSIUA 17 Bible Online

KO SIOSIUA 17 - KO E TOH TAPU KATOA TONGA bible

KO SIOSIUA 17

¹PEA fai ‘a e talotalo ma‘a e matakali ‘o Manase; he ko e ‘uluaki foha ia ‘o Siosifa. Ko e me‘a kia Mākili, ko e ‘uluaki foha ‘o Manase ko e tupu‘anga ‘o Kiliati, ko e pāte‘i tau ia, ko ia na‘e tō kiate ia ‘a Kiliati mo Pēsani.

²Ka ko e talotalo na‘e fai ma‘a hono toe ‘o e hako ‘o Manase, ‘a honau ngaahi fāmili: ma‘a ha‘a ‘Apiesa, mo ha‘a Hēleka, mo ha‘a ‘Āselieli, mo ha‘a Sikemi, mo ha‘a Hēfeli, mo ha‘a Sēmita: ko e hako tangata ia ‘o Manase ko e foha ‘o Siosifa ‘i he lau fāmili.

³Ka ko Silofehati ko e foha ‘o Hēfeli, ko e foha ‘o Kiliati, ko e foha ‘o Mākili, ko e foha ‘o Manase, na‘e ‘ikai ha‘ane fānau tangata, ko e ngaahi ‘ōfefine pē: pea ko e hingoa ‘eni ‘o hono ngaahi ‘ōfefine, ko Māhala, mo Noa, ko Hōkela, Milika, mo Tīlisa.

⁴Pea nau ha‘u ki he ha‘oha‘onga ‘o ‘Eliesa ko e taula‘eiki mo Siosiua ko e foha ‘o Nuni, mo e hou‘eiki, ‘o nau pehē, Na‘e tu‘utu‘uni ‘e Sihova kia Mōsese ke ne ‘omi hamau tofi‘a fakataha mo homau kāinga. Pea ko ia na‘a ne vahe tofi‘a kiate kinautolu fakataha mo e kāinga ‘o honau tupu‘anga, ‘o hangē ko e folofola ‘a Sihova.

⁵Ko ia na‘e tō ha vahe ‘e hongofulu kia Manase — tuku kehe ‘a Kiliati mo Pēsani, ‘a ia ‘oku ‘i he kauvai ‘e taha ‘o Soatani;

⁶he na‘e ma‘u tofi‘a ‘e he hako fefine ‘o Manase fakataha mo hono hako tangata: pea ko e fonua ko Kiliati na‘e ma‘u ‘e hono toe ‘o e hako tangata ‘o Manase.

⁷Pea ko e vahe ‘o Manase na‘e kamata mei ‘Āseli, ‘o fai ki Mikimetata, ‘a ia ‘oku ‘i he ‘ao ‘o Sikemi: pea na‘e ‘alu ‘a e kau‘ā ‘i he to‘omata‘u ki he nofo ‘i ‘Enitapua.

⁸Ko e fonua ‘o Tapua na‘e kau kia Manase: ka ko Tapua, ‘a. ia ‘oku ‘i he kau‘ā ‘o Manase, na‘e kau ia ki ‘Ifalemi.

⁹Pea na‘e ‘alu hifo ‘a e kau‘ā ki Vaikaho‘ia ‘i hono potu tonga: ko e ngaahi kolo ko ia ‘i he ngaahi kolo ‘o Manase na‘e kau ki ‘Ifalemi: pea ko e kau‘ā ‘o Manase na‘e ‘alu ‘i he potu tokelau ‘o e vai, ‘o tū‘ulu ki tahi:

¹⁰ko hono potu tonga na‘e kau ki ‘Ifalemi, ka ko e tokelau na‘e ‘ia Manase. Pea ko hono kau‘ā ko e tahi: Pea na‘a nau lave ki ‘Āseli ‘i he tokelau, pea ki ‘Īsaka mei hahake.

¹¹Pea na‘e kau kia Manase ‘i ‘Īsaka mo ‘Āseli ‘a Pete-sani mo hono ngaahi kolo fakaongo, pea mo ‘Ipileami mo hono ngaahi kolo fakaongo, mo e kakai ‘o Toa mo hono ngaahi kolo fakaongo,[8] mo e kakai ‘o ‘Enitoa mo hono ngaahi kolo fakaongo, mo e kakai ‘o Ta‘anaka mo hono ngaahi kolo fakaongo, mo e kakai ‘o Mekito mo hono ngaahi kolo fakaongo, ‘io, ‘a e Tolu‘i Mo‘unga.

¹²Ka na‘e ‘ikai lava ‘e ha‘a Manase ke kapusi ‘a e kakai mei he ngaahi kolo ko ia: he na‘e kikihi ‘a e ha‘a Kēnani ke nofo ‘i he potu ko ia.

¹³Ka ‘i he faifai ‘o kaukaua ‘a ha‘a ‘Isileli, na‘a nau fakafatongia‘i ‘a ha‘a Kēnani, ka na‘e ‘ikai te nau kapusi ‘aupito.

¹⁴Pea fakalea ange ‘e he hako ‘o Siosifa kia Siosiua, ‘o pehē, Ko e hā kuo ke vahe mei ai ha ‘inasi pē taha mo ha tofi‘a pē taha? Ka ko e kakai lahi au: he kuo tu‘ulāhoko mai hoku tāpuaki ‘e he ‘Eiki!

¹⁵Pea tali ‘e Siosiua kiate kinautolu, Kapau ko e kakai lahi koe, pea ‘alu hake ‘e koe ki he vao, ‘o huo ma‘au ‘i ai, ‘i he fonua ‘o ha‘a Pēlisi, mo ha‘a Lifaimi, ‘o kapau ‘oku ke ‘efihia ‘i Mo‘unga-‘Ifalemi.

¹⁶Pea lea mai ‘a e hako ‘o Siosifa. ‘Oku ‘ikai te mau hao ‘i he mo‘unga, pea ko e ngaahi ha‘a Kēnani ‘oku nofo ‘i he talalo ‘oku nau ma‘u sāliote ukamea, ‘e kinautolu ‘oku nofo ‘i Petesani mo hono ngaahi kolo fakaongo, mo kinautolu ‘i he talalo ‘o Sisilili.

¹⁷Pea lea ‘a Siosiua ki he hako ‘o Siosifa, ‘a ‘Ifalemi mo Manase, ‘o pehē, Ko e kakai lahi koe, pea, ‘oku lahi ‘a e ivi ‘oku ke ma‘u: ‘e ‘ikai taha pē ho vahe, kae ‘o‘ou ‘a e fonua mo‘unga: pea neongo ko e vao ia, ka te ke huo, pea ‘e ‘o‘ou hono ngaahi tele‘a: he te ke kapusi ‘a e ha‘a Kēnani neongo ‘oku nau fakasāliote ukamea, pea neongo ‘enau mālohi.