Read KO E TOH TAPU KATOA TONGA KO SIOSIUA 18 Bible Online

KO SIOSIUA 18 - KO E TOH TAPU KATOA TONGA bible

KO SIOSIUA 18

¹PEA kātoa mai ‘a e fakataha ‘o ha‘a ‘Isileli ki Sailo, ‘o nau fokotu‘u ‘a e Tēniti Fe‘iloaki‘anga ‘i he potu ko ia: pea na‘e vaivai ‘a e fonua kiate kinautolu.

²Ka na‘e kei toe ‘i ha‘a ‘Isileli ha matakali ‘e fitu kuo te‘eki vahe hanau tofi‘a.

³Pea lea ‘a Siosiua ki ha‘a ‘Isileli, Ko futu ho‘omou fakatuai ke ‘alu atu ‘o ma‘u ‘a e fonua kuo foaki kiate kimoutolu ‘e Sihova ko e ‘Otua ‘o homou tupu‘anga?

⁴‘Omi hamou tu‘unga tangata ‘e toko tolu mei he matakali takitaha; Pea te u fekau atu kinautolu, pea te nau tutu‘u ‘o ‘alu atu ki he fonua, ‘o tohi ia koe‘uhi ko ha vahe tofi‘a ka fai:

⁵pea nau toki ha‘u kiate au. Pea te nau vahevahe ia ko e tofi‘a ‘e fitu; ‘e nofo ai pē ‘a Siuta ‘i hono vahe ‘i he feitu‘u ko Tonga, pea ko e fale ‘o Siosifa te nau nofo ai pe ‘i honau vahe ‘i he tokelau.

⁶Pea te mou tohi ‘a e fonua ko e tofi‘a ‘e fitu, pea te mou ‘omi hono tohi kiate au ki heni: pea te u fai ‘a e talotalo[9] ma‘amoutolu ‘i heni ‘i he ‘ao ‘o Sihova ko hotau ‘Otua.

⁷He ‘oku ‘ikai ke tofi‘a fakataha mo kimoutolu ‘a e kau Līvai, he ko e ngāue fakataula‘eiki kia Sihova ko honau tofi‘a ia: pea ko Kata mo Lūpeni, mo e vaeua ‘o e matakali ‘o Manase, kuo nau ma‘u honau tofi‘a ‘i he kauvai ‘e taha ‘o Soatani ki hahake, ‘a ia na‘e tufa kiate kinautolu ‘e Mōsese ko e Sevāniti ‘a Sihova.

⁸Pea na‘e tutu‘u ‘a e tu‘unga me‘a, ‘o ‘alu: pea tu‘utu‘uni ‘e Siosiua kiate kinautolu na‘e ‘alu ke tohi ‘a e fonua, ‘o pehē, ‘Alu, ‘o foli ‘a e fonua, ‘o tohi ia, pea foki kiate au, pea te u fai ‘a e talotalo ma‘amoutolu ‘i heni, ‘i he ‘ao ‘o Sihova ‘i Sailo.

⁹Pea ‘alu atu ‘a e kau tangata, ‘o nau ‘asi atu ‘i he fonua, ‘o nau tohi ia fakafo‘i kolo ‘i ha tohi, ko e tofi‘a ‘e fitu: pea na‘a nau omi kia Siosiua, ki he ‘apitanga ‘i Sailo.

¹⁰Pea fai talotalo ‘e Siosiua ma‘anautolu ‘i Sailo, ‘i he ‘ao ‘o e ‘Eiki: pea na‘a ne vahevahe ai ‘a e fonua ki ha‘a ‘Isileli, ‘o faka-e-honau-ngaahi-vahe.

¹¹Pea na‘e tō mai ‘a e ‘inasi ‘o e matakali ‘o ha‘a Penisimani mo honau ngaahi fāmili: pea na‘e ‘alu atu honau vahe ‘i he vaha‘a ‘o ha‘a Siuta mo ha‘a Siosifa.

¹²Pea ko honau kau‘ā ‘i honau matāfonua ki he tokelau na‘e kamata mei Soatani; ‘o ‘alu hake ki he mui mo‘unga ‘o Sielikō, ‘o tuku ia ki he saute, ‘o ‘alu hake ‘i he fonua mo‘unga ki lulunga, ‘o tū‘ulu ki he toafa ‘o Pete-‘āveni.

¹³Pea mole atu ‘a e kau‘ā mei ai ki Lusa, ki he mui mo‘unga ‘o Lusa, ki he tokelau (ko Pēteli ia); pea ‘alu hifo ‘a e kau‘ā ki ‘Ataloti-‘ātali ‘i he tafa‘aki mo‘unga ‘oku tu‘u mei he potu saute ‘o Pete-holoni-lalo.

¹⁴Pea afe atu ‘a e kau‘ā, ‘o takai ‘a e matāfonua lulunga ki he tonga, mei he mo‘unga ‘oku ‘i he ‘ao ‘o Pete-hōloni ‘i hono potu tonga, pea na‘e tū‘ulu ki Kiliati-peali (ko Kiliati-sialimi ia), ko e kolo ‘o ha‘a Siuta: ko hono feitu‘u lulunga ia.

¹⁵Pea ko hono matāfonua tonga na‘e kamata mei he taupotu ‘o Kiliati-sialimi, pea ‘alu atu ‘a e kau‘ā ki lulunga,[10] ‘o tū‘ulu ki he fauniteni ‘o e vai ‘o Nefitoa:

¹⁶pea ‘alu hifo ki he ngata‘anga ‘o e mo‘unga ‘oku hanga ki he tele‘a ‘o e foha ‘o Hīnomi, ‘a ia ‘oku tu‘u ‘i Tele‘a-Lifaimi mei he tokelau, pea ‘alu hifo ia ki he tele‘a ‘o Hīnomi ki he mui mo‘unga ‘o ha‘a Siepusi, ‘o tuku ia ki he tokelau: pea ‘alu hifo ki ‘Eni-lokeli:

¹⁷pea afe mei he tokelau, ‘o fou atu ki ‘Eni-semesi, ‘o mole atu ki Keliloti, ‘a ia ‘oku fehangahangai mo Hakenga Kula, ‘o ‘alu hifo ki he Maka ‘o Pōhani ko e hako ‘o Lūpeni:

¹⁸pea ‘alu atu ai ki he mui mo‘unga ‘oku hanga ki he ‘Alapā ‘o tuku ia ki he saute, ‘o hifo ki he ‘Alapā:

¹⁹pea ‘asi atu ‘a e kau‘ā ki he mui mo‘unga ‘o Pete-hokela, ‘o tuku ia ki he saute: pea na‘e tū‘ulu ‘a e kau‘ā ki he muitolotolo noate ‘o e Tahi Māsima, ‘a e ngata‘anga ‘o Soatani mei he tonga: ko e kau‘ā tonga ia.

²⁰Pea ko Soatani ko e kau‘ā ia ‘i he matāfonua hahake. Ko e tofi‘a ia ‘o ha‘a Penisimani, ‘a hono ngaahi kau‘ā takatakai, mo hono ngaahi vahe.

²¹Pea ko eni ‘a e ngaahi kolo na‘e kau ki he matakali ‘o ha‘a Penisimani, mo honau ngaahi fāmili, ko Sielikō, mo Pete-hokela, mo ‘Emeki-kesisi:

²²mo Pete-‘ālapa, mo Sima-laimi, mo Pēteli:

²³mo e ‘Āvimi, mo Pala, mo ‘Ōfila:

²⁴mo Kēfali-‘Āmoni, mo e ‘Ōfeni, mo Kepa: ko e kolo ‘e hongofulu mā ua mo honau ngaahi vilisi.

²⁵Ko Kinione, mo Lama, mo Pealoti:

²⁶mo Mīsipa, mo Kēfila, mo Mosia:

²⁷mo Lēkemi, mo ‘Ilipili, mo Tālala:

²⁸mo Siela, ‘a ‘Ēlefi, mo Siepusi (ko Selusalema ia), ‘a Kipiati, ‘a Kiliati: ko e kolo ‘e hongofulu mā fā mo honau ngaahi vilisi. Ko e tofi‘a ia ‘o ha‘a Penisimani mo honau ngaahi fāmili.