Read KO E TOH TAPU KATOA TONGA KO SIOSIUA 2 Bible Online

KO SIOSIUA 2 - KO E TOH TAPU KATOA TONGA bible

KO SIOSIUA 2

¹PEA fekau atu mei Sītimi ‘e Siosiua ko e foha ‘o Nuni ha ongo tangata ke mataki fakafufū, ‘o ne pehē, ‘Alu ‘o vakai ‘a e fonua, kae‘uma‘ā ‘a Sielikō. Pea na ō ‘o na hū ki he fale ‘o ha fefine fe‘auaki na‘e hingoa ko Lēhapi, ‘o na mohe ai.

²Pea na‘e fakahā ki he Tu‘i Sielikō, ‘o pehē, Ta na‘e omi po‘uli ‘anenai ha tu‘unga me‘a mei ha‘a ‘Isileli ke mataki‘i ‘a e fonua.

³Pea ‘alu ‘a e fekau ‘a e Tu‘i Sielikō kia Lēhapi, ‘o pehē, ‘Omi kitu‘a ‘a e tu‘unga me‘a na‘e ha‘u kia koe, ‘a ia kuo hū ki ho fale, he kuo nau omi ke mataki‘i ‘a e fonua kotoa.

⁴Pea ‘ave ‘e he fefine ‘a e ongo tangata, ‘o ne fufū kinaua; pea ne pehē, Mo‘oni na‘e ha‘u kiate au ‘a e tu‘unga me‘a, ka na‘e ‘ikai te u ‘ilo pe ko e kakai mei fē:

⁵pea fe‘unga nai mo e songo ‘o e matanikolo, po‘uli, na‘e ‘alu ki tu‘a ‘a e kau tangata, ‘oku ‘ikai te u ‘ilo pe na‘a nau ‘alu ki fē: tuli ki ai ke vave; he te mou ma‘u kinautolu.

⁶Ka kuo ne ‘ohake kinaua ki he tu‘a fale, ‘O ‘ufi‘ufi ‘aki ‘a e ngaahi kau‘i falakesi, ‘a ia kuo ne fola ‘i he tu‘a fale.

⁷Ka ka tuli ‘e he kau tangata kiate kinaua ‘i he hala ki Soatani, ‘o a‘u ki he ngaahi a‘a‘anga: pea ‘i he sītu‘a leva ‘a e kau tangata na‘e tuli ki he ongo me‘a, na‘a nau songo ‘a e matanikolo.

⁸Pea ‘i he te‘eki ke na tākoto ke mohe, na‘e ‘alu hake ‘a e fefine ki he tu‘a fale, ‘o ne pehē ki he ongo tangata.

⁹‘Oku ou ‘ilo kuo foaki ‘e Sihova ‘a e fonua ni kiate kimoutolu, pea kuo tō homou ngeia kiate kimautolu, pea kuo vai ‘a e loto ‘o e kakai kotoa pē ‘o e fonua ni koe‘uhi ko kimoutolu.

¹⁰He kuo mau fanongo ki he fakamātu‘u ‘e Sihova ‘a e Tahi kulokula ‘i homou ‘ao ‘i ho‘omou hū mai mei ‘Isipite; pea mo e me‘a na‘a mou fai ki he ongo tu‘i ‘Āmoli ‘i he kauvai ko ē ‘o Soatani, ‘a Sīhoni mo ‘Oki, ‘a ia ne mou faka‘auha.

¹¹Pea ‘i he‘emau fanongo ki ai, na‘e vai homau loto, pea na‘e ‘ikai kei ha loto ‘o ha taha koe‘uhi ko kimoutolu: he ko homou ‘Otua ko Sihova ko ia ‘oku ‘Otua ‘i langi ‘i ‘olunga, pea ki māmani ‘i lalo.

¹²Pea ko eni ke mo fuakava mai mu‘a ‘ia Sihova, ko e me‘a ‘i he‘eku fai ‘ofa kiate kimoua, ko ia te mo fai ‘ofa ‘e kimoua foki ki he fale ‘o ‘eku tamai, mo tuku mai ha fakamo‘oni pau:

¹³pea te mo fakamo‘ui ‘eku tamai, mo ‘eku fa‘ē, mo hoku ngaahi tuonga‘ane, mo hoku ngaahi tokoua, mo ia kotoa pē ‘oku nau ma‘u, pea te mo fakahaofi ‘emau mo‘ui mei he mate.

¹⁴Pea pehē ‘e he ongo tangata ki he fefine, Ko ‘ema mo‘ui ‘e fetongi ho‘omou mo‘ui, ‘o kapau ‘e ‘ikai te mou fakahā ‘ema me‘a ni;[1] pea ka faifai pea tuku mai ‘e Sihova ‘a e fonua, pea te ma fai kiate koe ‘a e ‘ofa mo e mo‘oni.

¹⁵Pea na‘a ne tuku hifo kinaua ‘aki ha maea ‘i he kātupa; he na‘e tu‘u hono fale ‘i he funga ‘a ‘o e kolo, pea na‘a ne nofo ‘i he ‘a.

¹⁶Pea ne pehē kiate kinaua, ‘Alu ki he mo‘unga, na‘a ma‘u kimoua ‘e he kau tuli; pea mo toi ai ‘o ‘aho tolu, kae‘oua ke foki mai ‘a e kau tuli, pea hili ia pea mo fai ho‘omo fononga.

¹⁷Pea lea kiate ia ‘a e ongo tangata, ‘Oku ma fie ta‘ehalaia ‘i ho‘o fuakava ni, ‘a ia kuo ke fakafuakava‘i ai kimaua.

¹⁸Ko eni, ka mau ka omi ki he fonua ni, ko e maea filo kulokula ni te ke fakama‘u ‘i he kātupa, ‘a ia na‘a ke tuku hifo ai kimaua: pea te ke fakataha kiate koe ki fale ‘a ho‘o tamai mo ho‘o fa‘ē, mo ho ngaahi tuonga‘ane, mo e fale kotoa ‘o ho‘o tamai.

¹⁹Pea ka ‘ilonga ha taha ‘e ‘alu ki tu‘a ‘i he matapā ‘o ho fale, ‘e ‘i hono ‘ulu ‘o‘ona ‘a hono toto, ka ko kimaua te ma ‘ata‘atā mei ai: ka ‘ilonga ‘a ia ‘oku ‘iate koe ‘i fale, ko hono toto ‘e ‘i homa ‘ulu, ‘o kapau ‘e ala ha taha kiate ia.

²⁰Ka ‘o kapau te ke fakahā ‘ema me‘a ni, te ma ‘ata‘atā ai mei ho‘o fuakava, ‘a ia kuo ke fakafuakava ai kimaua.

²¹Pea pehē ‘e he fefine, Ke fai pe ‘o hangē ko ia kuo mo lea‘aki. Pea ne tukuange kinaua, pea na ō: pea ne fakama‘u ‘a e maea kulokula ‘i he kātupa.

²²Pea na ō ‘o a‘u ki he mo‘unga, pea na‘a na nofo ai ‘o ‘aho tolu, kae‘oua ke foki mai ‘a e kau tuli: pea na‘e kumi ‘e he kau tuli ‘i he hala kotoa, kae ‘ikai ma‘u.

²³Pea foki ‘a e ongo tangata, ‘o ‘alu hifo mei he mo‘unga, pea na a‘a atu, ‘o na a‘u kia Siosiua ko e foha ‘o Nuni, pea na fakamatala kiate ia ‘a e me‘a kotoa kuo hoko kiate kinaua.

²⁴Pea na pehē kia Siosiua, Ta kuo tuku mai ‘e Sihova ‘a e fonua ni ki hotau nima; kae‘uma‘ā, kuo vai foki ‘a e loto ‘o e kakai kotoa ‘oku nofo ai koe‘uhi ko kitautolu.